2 KORINTƐ 10 - WE NU GALE 1995

Dɔ̃lɔ̃ li 'da Polo ma yula 'da Gale

¹ Mi Polo, kɛ ombe wa tɔ̃ na, fala kɛ mi a 'da nɛ i, nɛ mi ba tɛ mi dɛ nù, kɔ mi nɛ hɔ gele fala, nɛ mi dãlã do nɛ wena ni, mi nɛ tɔ̃ we gɛ hã nɛ. Mi aka nɛ do zu li Kristo, kɛ a do mbɔkɔ sila, do dia zã ni na,

² nɛ tɛ hɛ̃̀lɛ̃̀ mi we be ngawi 'da mi 'da fala mi nɛ 'da nɛ i ni gɔ. We kɛ mi lengge we be ma hã winɔ wa tɔ̃ na, lɛ dɛ mɛnɔ gɛ do hã zã mɔ́ wele iko ni.

³ Lɛ a Owele dɛ ngɔ nù gɛ kpaa, nɛ nde lɛ bí do hã zã mɔ́ wele gɔ.

⁴ Mba gɔ, mɔ bi bolonɔ kɛ lɛ bi do ma ni, Owele wa a wa dɛ̀ ma gɔ, nɛ nde mɛ a nganda mɔ bolonɔ 'da Gale. Lɛ kala ma, nɛ lɛ nɛ do ngɔ ngawi 'da owi sɛnɛ Gale. Lɛ 'danga bia we 'da owi bɛlɛnɔ,

⁵ do linggamɛ 'da owi gã zunɔ vɛ́, kɛ ma kpe wala ti winɔ na, wa tɛ ĩ̀ ti Gale gɔ ni. Nɛ lɛ tɛ ngbɔkɔ winɔ na, wa kpolo linggamɛnɔ 'da wa, nɛ wa zele nu Kristo.

⁶ Kɔ fala kɛ lɛ zɔ na, nɛ zila nu Kristo vɛ ia, nɛ lɛ hã sɛ zɛla tɛ hã winɔ sanga nɛ kɛ wa 'bana bɛ nu a ni.

⁷ Ma wia na, nɛ zɔ mɛnɔ do tɛlɛ tɛ kɛ ma nɛ ni iko. Kɔ fala mbe wele lengge na, ɛ a wi 'da Kristo, nɛ a lénggé ngboo sɛ! Nɛ a ĩ́ na, lɛ vɛ a winɔ 'da Kristo ɔ nɛ a ni.

⁸ Gɛnɛ kɔ mi dɔnggɔ tɛ mi do dɛa to nwa kɛ Nwa Gale hã hã lɛ ni, nɛ nde mi wè tɛ ɔ do sape we ma gɔ. Dɛa to nwa gɛ, ma we gala nɛ na, kɔ̃a we 'da nɛ ma gã dɛ dati fai, nɛ nde ma we 'danga kɔ̃a we 'da nɛ 'danga gɔ.

⁹ Mi kɔ̃̀ we kɔmɔ mɔ gbaa gɔ, dɔ nɛ lénggé na, mi fa we hã kili hã nɛ gɔ.

¹⁰ Mba gɔ, ombe wa tɔ̃ na: “Mbɛtinɔ 'da Polo ma nganda wena, nɛ ma dãlã wena. Kɔ fala kɛ a do tɛ a ngboo a sanga lɛ nga, nɛ nde a ĩ̀ ti wele we ngboo gɔ.”

¹¹ Kɔ ma wia na, winɔ wa tɔ̃ we ni wa ĩ na, 'da fala kɛ lɛ hɔ 'da nɛ i, nɛ mɛnɔ lɛ kɔma kɔ mbɛti do gele fala gɛ, lɛ dɛ sɛ ma.

¹² Lɛ kɔ̃̀ we ba tɛ lɛ na, lɛ wia kɔ̃ do ombe winɔ kɛ wa dɔnggɔ tɛ wa nɛ ge nde ni gɔ, nɛ lɛ kɔ̃̀ 'bɔ we we tɛ lɛ do wa gɔ. Fo gbãlã zã wa bina! Wa lengge na, gã wi a wi kɛ a ɔ nɛ lo ni, nɛ wa we tɛ wa do tɛ wa wele nɛ.

¹³ Kɛ 'da lɛ, lɛ dɔ́nggɔ́ sɛ tɛ lɛ la li ngele gɔ. Lɛ dɔnggɔ tɛ lɛ tati nɛ do dɛa toe kɛ Gale hã ma hã lɛ, nɛ ma tumba lɛ na, lɛ nɛ we dɛ to sanga nɛ i ni.

¹⁴ Nɛ nɛ, nɛ a sanga owinɔ kɛ Gale tumba lɛ hã wa ni. Ní a fala kɛ lɛ nɛa zi 'da nɛ i we be Dia Sakoe 'da Kristo hã nɛ ni, nɛ nde lɛ là zi li ngbala dɛa toe Gale hã ma hã lɛ ni gɔ.

¹⁵ Na mɛ ni, lɛ là ngɔ li ngbala toe 'da lɛ gɔ, nɛ lɛ dɔ̀nggɔ̀ tɛ lɛ do toe ogele winɔ wa dɛa gele fala ni gɔ. Nɛ nde lɛ gbini zã lɛ na, kɔ̃a we 'da nɛ gã dɛ dati, takɔ lɛ we tɛ dɛ 'bɔ gã to sanga nɛ nɛ ngɔ kɛ zi ni. Nɛ nde lɛ ku sɛ ngɔ li ngbala kɛ Gale ia ma hã lɛ ni gɔ.

¹⁶ Nɛ 'do nɛ, nɛ lɛ la sɛ 'bɔ we be Dia Sakoe hã owinɔ ngɔ nùnɔ kɛ 'do nɛ i ni, nɛ nde lɛ dɔ́nggɔ́ sɛ tɛ lɛ do dɛa toe kɛ ongba lɛ wa dɛa ma ngɔ nùnɔ kɛ Gale tumba do wa ni gɔ.

¹⁷ Ma ɔ nɛ kɛ wa kɔma kɔ 'Buki 'da Gale na: “Wi kɛ a kɔ̃ we dɔnggɔ tɛ a, nɛ a dɔnggɔ tɛ a do Nwa” ni.

¹⁸ Mba gɔ, wi dɔ̃lɔ̃ li ngboo, wi a wele kɛ a dɔnggɔ tɛ a wele nɛ ni gɔ, nɛ nde wi a wele kɛ Nwa dɔnggɔ a ni.