2 KORINTƐ 1 - WE NU GALE 1995

¹ Wi a mi Polo, wi nɛ toe 'da Yezu Kristo ɔ nɛ kɛ zã Gale kɔ̃a ni, do nya lɛ Timote, lɛ kɔmɔ mbɛti gɛ hã nɛ, owinɔ kɔ eklezia 'da Gale tɛ Korintɛ, fala nɛ kpo do owinɔ 'da Gale ngɔ nù Akai vɛ̃.

² E kɔ Baa lɛ Gale, do Nwa 'da lɛ Yezu Kristo wa be dia zã 'da wa hã nɛ, nɛ wa dɛ na, nɛ ɔ do gɛ̃a sila.

Polo hã iɔ̃nae hã Gale

³ Lɛ dɔ́nggɔ́ Gale, Baa Nwa 'da lɛ Yezu Kristo. A a Baa wi kɛ a do 'bako li a wena, nɛ a a Gale kɛ a nganda sila lɛ fai.

⁴ A nganda sila lɛ kɔ 'bako 'da lɛ vɛ, takɔ lɛ ngboo ni, lɛ ĩ tɛ 'bɔ ti nganda sila ongba lɛ kɔ 'bakonɔ 'da wa, ɔ nɛ kɛ a dɛ ma do lɛ ni.

⁵ Mba gɔ, ɔ nɛ kɛ lɛ mba kpo do Kristo kɔ gba gili 'bakonɔ 'da a ni, Gale a nganda 'bɔ sila lɛ wena do wala 'da kpo Kristo ni.

⁶ Kɔ fala kɛ lɛ ma ngɔ nyɔngɔ 'bako, nɛ nde gulu nɛ na, Gale hã ngawi hã nɛ do wala 'da lɛ, takɔ nɛ kpasa. Hã fala kɛ Gale nganda sila lɛ, nɛ nde gulu nɛ 'bɔ na, sila nɛ nganda, takɔ nɛ ĩ ti kunu sila nɛ kɔ kpo kpo 'bakoe kɛ lɛ zɔ ma gɛ.

⁷ Na mɛ ni, lɛ wia we gbini zã lɛ do nɛ gbãlã we. Mba gɔ, lɛ ĩ na, ɔ nɛ kɛ nɛ nyɔngɔ 'bako fala nɛ kpo do lɛ ni, nɛ nde nɛ kpa 'bɔ kpo kpo ngawi kɛ Gale hã ma hã lɛ ni.

⁸ Onyae, lɛ kɔ̃a we gba ta zu nɛ ngɔ ngamɛnɔ lɛ zɔa zi tɛ ngɔ nù Azi ni. Dĩ tole 'bakoe ni ma nɛa zi ngɔ lɛ, nɛ lɛ lingga zi na, lɛ fe sɛ iko.

⁹ Gbãlã we, lɛ lingga zi na, wa 'bili sɛ we 'da lɛ na, wa gbɛ lɛ. Nɛ ma dɛa zi tɛ̃ ɛ na mɛ ni na, dɔ lɛ gbini 'bɔ zã lɛ do ngawi 'da lɛ wele nɛ gɔ, nɛ nde lɛ gbini zã lɛ do Gale kɛ a tunu ofionɔ kɔ fio ni.

¹⁰ Wi a Gale a kpasa zi lɛ kɔ ngamɔ fie ni, nɛ a kpasa sɛ 'bɔ lɛ mbé nɛ. Gbãlã we, lɛ gbini zã lɛ do a na, a kpasa sɛ 'bɔ lɛ mbé nɛ.

¹¹ Mba gɔ, nɛ ngboo nɛ gala sɛ lɛ do sambala 'da nɛ. Na mɛ ni, nɛ Gale a gese sɛ nu sambala 'da ogili winɔ kɛ wa sambala a we lɛ ni, nɛ Owele wena wa hã sɛ iɔ̃nae hã a we duzu lɛ.

Polo kpula linggamɔ nɛ gɛnɛ 'dɛ ɛ

¹² Mɛ lɛ dɔnggɔ tɛ lɛ do ma ni, ma kɛ: Gbãlã zã lɛ ngboo ni ma tɔ̃ hã lɛ na, dungu 'da lɛ kɛ lɛ dungu nɛ ngɔ nùi gɛ ni, ma a bɔlɔ. Lɛ dɛ mɔ do wala olo nɛ, ɔ nɛ kɛ zã Gale kɔ̃a ni. Da zu nɛ wena a kɛ na, dungu 'da lɛ sanga nɛ ni ma a dia. Lɛ dɛ́ mɔ do hã zã mɔ́ winɔ ngɔ nùi gɛ gɔ, nɛ nde dia zã 'da Gale a kã lɛ.

^13-14 Kɔ wenɔ kɛ lɛ kɔmɔ hã nɛ gɛ, lɛ kɔ̀mɔ̀ gele we gɔ, lɛ kɔma tati a wenɔ kɛ nɛ tɔlɔ, nɛ nɛ zele gulu nɛ ni. Tia do sɔɛ gɛ, nɛ tɛ zèlè gulu wenɔ lɛ tɔ̃a hã nɛ ni vɛ́ gɔ. Nɛ nde mi lengge na, 'do nɛ, nɛ nɛ zele sɛ gulu nɛ vɛ do dia nɛ. Kɔ 'da fala Yezu a hɔ sɛ nɛ ni, nɛ nɛ dɔnggɔ sɛ tɛ nɛ do lɛ, ɔ nɛ kɛ lɛ dɔnggɔ sɛ tɛ mɛ 'bɔ tɛ lɛ do nɛ ni.

¹⁵ Nɛ ɔ nɛ kɛ mi zi do kafi kɔ sila mi we mɛnɔ ni sĩ bina ni, mi 'dafa zi na, mi nɛ we zɔ nɛ fala bɔa, takɔ Gale wele nu ɛ tɛ nɛ do wala 'da mi fala bɔa.

¹⁶ Mi 'dafa zi na, mi hɔ 'da nɛ dati, sɛ nɛ mi la dɛ ngɔ nù Masedɔanɛ i de. Kɔ mi yolo Masedɔanɛ i, nɛ mi hɔ 'bɔ 'da nɛ mbé nɛ, takɔ nɛ hã kɔ̃ nɛ hã mi, sɛ a ma gala mi we la gbaa dɛ Yude i de.

¹⁷ Linggamɛ 'da mi zi gɛ a ni. Tabi mi lènggè zi ma 'du ngboo gɔ nde? Tabi 'da fala mi ma zi ngɔ 'dafa linggamɛnɔ ni, nɛ mi lengge mɔ nɛ́ wele iko nde? Na mɛ ni, ma ɔ nɛ kɛ mi tɔ̃ na: “ĩi”, nɛ mi tɔ̃ 'bɔ na: “ɔ̃ ɔ̃” do kpo kpo nu mi ni.

¹⁸ Kɔ mi kana tɛ mi do zu li Gale na, kɛ mi tɔ̃a zi hã nɛ ni, nɛ nde mi tɔ̃̀ zi do nu mi bɔa gɔ.

¹⁹ Mba gɔ, Yezu Kristo, Be 'da Gale kɛ lɛ do Silasi, do Timote, lɛ bia zi we 'da a hã nɛ ni, a tɔ̃́ we do nu a bɔa gɔ, we nu a tati a gbãlã we iko.

²⁰ Kɔ wi a a hã a kɔ̃a dati Gale na, ĩi. Nɛ ombulunɔ vɛ́ kɛ Gale kpua zi ni, ma dɛa tɛ a we duzu a. Kɔ we duzu a, nɛ lɛ dɔnggɔ Gale tɛ tɔ̃ na: “Amɛ!”

²¹ Nɛ wi a Gale hã a 'be lɛ do nɛ nganda wena dɛ kɔ Kristo, nɛ a ia lɛ do Owi dɛa tonɔ 'da a.

²² A gɔnɔ dã 'da a tɛ lɛ we be na, lɛ a winɔ 'da a. Nɛ a ia Hi Wi Santo dɛ kɔ sila lɛ ɔ nɛ mbe nu dia mɛnɔ a usu we lɛ, nɛ a hã sɛ hã lɛ do 'do ni.

²³ Gale a temɔɛ 'da mi. Kɔ fala kɛ mi 'bili bɛlɛ nde, nɛ a gbɛ́ mi! Mi nɛ̀ zi Korintɛ i gɔ, we kɛ mi kɔ̃̀ we hã 'bako hã nɛ gɔ.

²⁴ Lɛ kɔ̃̀ na, lɛ hɛ̃lɛ̃ nɛ we kɔ̃ mɛnɔ kɛ ma wia na nɛ kɔ̃ ma ni hɛ̃lã gɔ, we kɛ lɛ ĩ na, kɔ̃a we 'da nɛ nganda ia. Nɛ lɛ kɔ̃a we dɛ toe do nɛ do tɛlɛ tɛ kɛ na, ma hã yangga hã nɛ.