2 Sakonɔ 9 - WE NU GALE 1995

Wuko nwa ngɔ nù Saba nɛa we zɔ Salɔmɔ

¹ Wuko nwa ngɔ nù Saba zila sako dɔ̃lɔ̃ li 'da Salɔmɔ, nɛ a nɛ we yamba sila a do onganda aka we, we zɔ hã zã 'da a. Tɛ nɛ mɔ́ a Yeruzalɛmɛ i, nɛ a kala gba gili wi tonɔ 'da a, do osamo. Nɛ osamonɔ wa kala tolo nɔ yɔmbɔ, do mɔ mbali dɛlɛ wena mba do ota olo gã gole. Wa nɛa we hɔ 'da Salɔmɔ i, nɛ a aka a ngɔ lɛnggɛnɔ vɛ̃ kɛ a 'dafa zi we aka do a ni.

² Nɛ Salɔmɔ gisa nu aka wenɔ, kɛ a aka do a ni vɛ̃, nɛ aka we kpo gànà a gɔ.

³ Wuko nwa ngɔ nù Saba zila lɛnggɛ hãnɔ 'da Salɔmɔ, nɛ a zɔa tɔa nwa kɛ a dɛa ni, nɛ a ɔngbɔ do ma wena.

⁴ A nɛa 'bɔ we zɔ nyɔngɔmɛnɔ kɛ wa nyɔngɔ kɔ tɔa 'da nwa Salɔmɔ, do tɛlɛ tɛ kɛ wa 'dafa do tɔa ɔinɔ, do tulunɔ 'da Owi olo li a, do odia tulunɔ 'da owi tonɔ, kɛ wa hã zi nyɔngɔmɛnɔ do dɔɛ hã wa ni, nɛ sila a gɔnɔ. Kɔ a zɔa wá 'bɔ odɔnggamɛnɔ Salɔmɔ hã zi hã NWA kɔ Tɛmpɛloe ni, nɛ ma ba we nu a.

^5-6 Nɛ a tɔ̃ hã nwa na: “Dati tɛ mɔ mi i nga, mi zila zi sako dɔlɔ li 'da mɔ, do we hã zã 'da mɔ kɔ le 'da mi i, nɛ mi ba zi kafi nɛ. Kɔ mi tɛa wá, hã mi zɔa, nɛ nde wenɔ mi zila zi ni vɛ̃ a gbãlã we. Mɛnɔ kɛ mi zɔa do gbali mi gɛ, ma be na mɛnɔ mi zila zi we nɛ ni, ma 'bana sanga iko. Hã zã 'da mɔ do kpamɛnɔ 'da mɔ, ma la ngɔ kɛnɔ mi zila zi we nɛ do zala mi ni.

⁷ Owi tonɔ 'da mɔ, do owinɔ kɔ tɔa nwa 'da mɔ vɛ̃, wa do dia 'dɔkɔlɔ! We duzu kɛ wa tɛ dungu 'da fala fai do mɔ, nɛ wa tɛ zele lɛnggɛnɔ 'da mɔ, kɛ ma dunu do hã zã ni.

⁸ E kɔ Owele wa dɔnggɔ NWA Gale 'da mɔ, kɛ a saka mɔ we dungu nwa ngɔ obe Israɛlɛ ni! NWA Gale saka mɔ do nwa ngɔ winɔ gɛ na, mɔ gala wa, takɔ wa dɛ mbulanɔ, nɛ mɔ gɔnɔ wenɔ 'da wa do bɔlɔ nɛ Tua kɛ a kɔ̃a gɛnɛ wa, nɛ a kɔ̃a na, wa 'bana nza fai.”

⁹ 'Do nɛ, nɛ wuko nwa ngɔ nù Saba hã mɔ mbali kɔlɔ do tɔnɛ talɛ do dɔ nɛ hã Salɔmɔ. Nɛ a hã 'bɔ gba gili nɔ yɔmbɔ do ota olo gã gole hã a. Gili nɔ yɔmbɛ ni dɛlɛ zi la li ngele, nɛ nwa Salɔmɔ zɔ̀ zi mbe kuti nɛ ni dati fala kpo gɔ.

¹⁰ Owi dɛa to kɔ masuanɔ 'da nwa Hiramɛ do Salɔmɔ kɛ wa nɛa zi ngɔ nù Ofirɛ i ni, wa si do omɔ mbali, do ogba gili te santalɛ, do ota olo gã gole.

¹¹ Nɛ nwa Salɔmɔ kala te santalɛnɔ ni, nɛ a dɛ do 'dinggili kɔ tɔa Tɛmpɛloe 'da NWA Gale, do kɔ tɔa nwa 'da a. Nɛ a dɛ 'bɔ mbe do omɔ zɛ biã, do obe kundu, do ogã kundu hã Owi ga Zumanɔ. Owinɔ wa zɔ̀ zi mbe tɛlɛ tɛ ote na mɛ ni fala kpo ngɔ nù Yuda gɔ.

¹² Nwa Salɔmɔ hã zi tɛ mɛ 'bɔ odɔnggamɔ hã wuko nwa ngɔ nù Saba. Dɛ ngɔ nɛ, a hã 'bɔ mɛnɔ kɛ wuko nwa ni kɔ̃a we kpa nɛ, nɛ a aka we nɛ ni vɛ̃ hã a. Nɛ mɛnɔ ni dɛlɛ nɛa ngɔ kɛnɔ wuko nwa ni hã zi ma dati hã a ni. Dɛ 'do nɛ, nɛ wuko nwa ni do owinɔ 'da a, wa si dɛ ngɔ nùi 'da wa.

Kpamɛnɔ 'da nwa Salɔmɔ

¹³ Kɔ sabɛlɛ kpo iko, nɛ nwa Salɔmɔ kpa zi mɔ mbali vɛ̃ tɔnɛ 'bu nɛ bɔa.

¹⁴ A kpa 'bɔ mbili takoe kɛ Owi be golenɔ wa futa ma ngɔ golenɔ 'da wa, mba do mɔ mbali do fɛ̃a mɔ bole kɛ onwa ngɔ nù Arabi do ogã wi ngɔ lenɔ wa futa zi hã a ni.

¹⁵ Nwa Salɔmɔ ba zi nu a, nɛ wa de ogã ngele kama bɔa, nɛ wa nãlã mɔ mbali se'de. Wa nãlã mɔ mbali kɛ ma wia do kilo gazɛlɛ ni tɛ gã ngelenɔ ni kpo kpo vɛ̃.

¹⁶ Nɛ wa dɛa 'bɔ obe ngele kama talɛ, nɛ wa nãlã nɔ mbali se'de. Nɛ wa nãlã mɔ mbali kɛ ma wia do kilo talɛ ni tɛ be ngelenɔ ni kpo kpo vɛ̃. Nɛ nwa Salɔmɔ kala ngelenɔ ni, nɛ a a ma kɔ mbe tɔa 'da a kɛ wa sa li nɛ na “Kɔla Libanɛ” ni.

¹⁷ Nwa ba 'bɔ nu a, nɛ wa bɛ̃lɛ̃ gã kpongbo nwa. Nɛ wa gɛzɛ tɛ nɛ do gogo fɔlɔ, nɛ wa nãlã mɔ mbali kɛ 'dɔlɔ nɛ zã nɛ bina ni tɛ nɛ.

¹⁸ Wa ia kpongbo nwa ni do ngɔ, nɛ wa kũ ngɔ 'dinggili nyanga wi gazɛlɛ sɛ nɛ wa hɔ se'de de. Wa dula zi mɔ mbali, nɛ wa e dɛ ti kpongbo nwa ni we a nyanga wi ngɔ nɛ. Nɛ kpongbo nwa ni zi do 'baka nɛ bɔa. Nɛ wa sɛa ogbɔgbɔ bɔa, nɛ wa a wa kɛ zã nɛ, mbe kpo ngɔ gale, nɛ mbe kpo ngɔ ngawili kɔ.

¹⁹ Wa sɛa 'bɔ ogbɔgbɔ 'bu ngɔ wa bɔa, nɛ wa a wa do 'da ngalangalanɔ ni bɔa bɔa. Wa a wa gazɛlɛ tɛ ngɔ ngawili kɔ, nɛ gazɛlɛ tɛ ngɔ gale. Fo mbe kpongbo nwa na mɛ ni zi ngɔ gele nù bina.

²⁰ Wa dɛa obilanɔ 'da nwa Salɔmɔ vɛ̃ do mɔ mbali, nɛ osaninɔ vɛ̃ kɔ tɔa “Kɔla Libanɛ” ni, ma zi 'bɔ do mɔ mbali kɛ 'dɔlɔ nɛ 'bànà zã nɛ gɔ. Wa dɛ̀ zi mɔ kpo do fɛ̃a mɔ bolo gɔ, we kɛ 'da fala 'da Salɔmɔ, wa zɔ zi fɛ̃a mɔ bolo li wa yala iko.

²¹ Nwa Salɔmɔ zi do omasua kɛ owinɔ 'da Hiramɛ hã wa ba zi ma ni. A tombo zi ma nyɛlɛ ndũu, nɛ ma la sabɛlɛ talɛ, nɛ masuanɔ ni ma si do omɔ mbali, fɛ̃a mɔ bolo, gogo fɔlɔ, odafa, do onɔɛ hã a.

²² Nwa Salɔmɔ nɛa zi ngɔ ogele nwanɔ ngɔ nù gɛ vɛ̃ do kpamɔ, do hã zã.

²³ Mba gɔ, Gale hã zi hã zã hã a, nɛ Onwanɔ ngɔ nù gɛ vɛ̃ wa tɛ zi we aka a do we.

²⁴ Nɛ kɔ sabɛlɛ kpo kpo, winɔ vɛ̃ wa tɛ zi do odɔnggamɔ hã a, ɔ nɛ omɔ kɛ wa dɛa do fɛ̃a mɔ bolo, do mɔ mbali, otulu, omɔ bi bolo, onɔ yɔmbɔ, ombalata, do opunda.

²⁵ Salɔmɔ dɛa zi tɔa we ongilingili bolonɔ, do ombalatanɔ. A zi do ongilingili koto nalɛ, do ombalata koto 'bu ngɔ nɛ bɔa. Nɛ a a ombe mɛnɔ ni dɛ kɛ zã a tɛ Yeruzalɛmɛ, nɛ a kɛ̃ ombe dɛ kɔ lenɔ kɛ wa 'dafa zi we a do ma ni.

²⁶ Salɔmɔ nɛa zi ngɔ Onwanɔ vɛ̃ kɛ li ngbala lenɔ 'da wa kpɔa ngba ɛ do gã lì Efratɛ, nɛ ma la gbaa tɛ ngɔ nù 'da Ofilisti, gbaa we hɔ tɛ li ngbala nù Ezipeto ni.

²⁷ Do 'da fala to nwa 'da a, ofɛ̃a mɔ bolo dɛlɛ zi kɔ le Yeruzalɛmɛ ɔ nɛ ogbãlã ta iko ni. Nɛ oma'baya sɛdrɛ ma dɛlɛ zi 'bɔ ɔ nɛ te sikɔmɔrɛ, kɛ ma hɔ ngɔ nùi kɛ si ba gɔtɔ ni.

²⁸ Nɛ nde we duzu ombalatanɔ 'da Salɔmɔ, wa oso zi wa ngɔ nù Ezipeto, do kɔ mbe ogele lenɔ.

Salɔmɔ fia

²⁹ Tala mɛnɔ vɛ̃ kɛ Salɔmɔ dɛa ni, wa kɔma ma kɔ o'bukunɔ kɛ li nɛ a: “Dɛa Toe 'da Natanɛ, wi gba olo nu Gale” do “Wenɔ 'da Ahia, wi Silo, wi gba olo nu Gale” do “Wenɔ 'da Yedo, wi zɔ gulu mɔ.” Nɛ talɛ 'buki ni, ma tɔ̃a 'bɔ lɛnggɛ 'da Yeroboamɛ, nwa ngɔ nù Israɛlɛ kɛ a a be 'da Nɛbatɛ ni.

³⁰ Salɔmɔ dɛa zi to nwa tɛ Yeruzalɛmɛ ngɔ obe Israɛlɛ vɛ̃ 'do 'bu sabɛlɛ nalɛ.

³¹ Kɔ a fia, nɛ wa mi a tɛ kɔ Gba Ngbo nwa 'da baa a Davidi. Nɛ be 'da a Roboamɛ dungu nwa olo a.