2 Sakonɔ 8 - WE NU GALE 1995

Salɔmɔ dɛa ngɔ gili to kpi do kpi

¹ Salɔmɔ dɛa zi dɛa to tɔa Tɛmpɛloe 'da NWA, do tɔa nwa 'da a ngboo ni 'do sabɛlɛ 'bu nɛ bɔa, nɛ ma e.

² 'Do nɛ, nɛ a 'dafa 'da lenɔ kɛ Hiramɛ, nwa ngɔ nù Tirɛ, hã zi ma hã a ni, nɛ a a obe Israɛlɛ kɔ nɛ.

³ 'Do nɛ, nɛ a nɛ, nɛ a bi le Hamatɛ-Soba, nɛ a ba ma.

⁴ Nɛ a 'dafa 'da le Tadmɔrɛ, kɛ ma ngɔ 'bili tɛ nùi si li gba zɔ̃ i ni, nɛ a 'dafa 'bɔ lenɔ vɛ̃ tɛ ngɔ nù Hamatɛ kɛ a bi zi ma, nɛ a ba ma ni, takɔ a usu onyɔngɔmɔ mɔ́ a kɔ nɛ.

⁵ Nɛ a 'dafa 'bɔ 'da le Bɛtɛ-Horoni kɛ si gbãlã ngɔ, do kɛ si ba gɔtɔ. Mɛ zi a ole kɛ gba ngbo zĩ ma takpa, nɛ wa wia kpe nu nɛ, nɛ wa gɔmɔ ni.

⁶ Nɛ a 'dafa 'bɔ le Balatɛ do lenɔ vɛ̃ kɛ a usu do nyɔngɔmɛnɔ 'da a, do kɛnɔ a a do ongilingili bolonɔ, do kɛnɔ ombalatanɔ 'da a wa ɔ kɔ nɛ ni. Nɛ a dɛa tɔanɔ vɛ̃ kɛ a kɔ̃a zi we dɛ ma tɛ kɔ le Yeruzalɛmɛ, do ngɔ kala Libanɛ, do ngɔ nùnɔ vɛ̃ kɛ ma ti mbula 'da a ni.

⁷ Nɛ ngɔ nùi ni, ombe wele, kɛ wa a obe Israɛlɛ gɔ ni, wa zi boe. Owinɔ ni zi a Ohiti, Oamori, Opɛrizi, Ohivi do Oyebuzi.

⁸ Owinɔ ni wa 'bana zi dɛ di ni, we kɛ obe Israɛlɛ wa gbɛ̃ zi wa gɔ. Nɛ nwa Salɔmɔ hã zi dɛa to kolofenɔ hã wa. Nɛ wa 'bana dɛ ngɔ nùi ni tia do sɔɛ gɛ.

⁹ Nwa Salɔmɔ è zi obe Israɛlɛ do owi dɛ kolofe gɔ. Nɛ nde wa zi a osodanɔ 'da a, do ogã wi ngɔ osodanɔ, do Owi kù ongilingili, do owi kũ ombalata.

¹⁰ Nɛ a saka zi ogã wi kama bɔa do 'bu wa mɔlɔ na, wa zɔ mɔ tɛ owi dɛa tonɔ 'da a.

¹¹ Nɛ 'do ki ni, nɛ Salɔmɔ ba nu a, nɛ wuke 'da a, kɛ a a be 'da nwa ngɔ nù Ezipeto ni, a kulu kɔ Gba Ngbo nwa 'da Davidi, nɛ a si dɛ kɔ tɔa nwa kɛ Salɔmɔ dɛa hã a ni. A si dɛ i mɔ, we kɛ Salɔmɔ na, wuke 'dɛ ɛ wè tɛ ɔ dɛ kɔ tɔa nwa 'da Davidi, nwa ngɔ obe Israɛlɛ gɔ. Mba gɔ, mɛ a tɔa kɛ wa ia zi Sanduku Gba Tɔkɛ 'da NWA kɔ nɛ. Nɛ we duzu ma, tɔanɔ di ni ni ma santo.

¹² Nɛ 'do nɛ, nɛ Salɔmɔ ba sa'de, nɛ wa dɔ we dɔnggɔ do NWA Gale dɛ ngɔ gbagala kɛ a dɛa ma hã a, dati tɔa Tɛmpɛloe ni.

¹³ Nɛ a hã dɔnggamɛnɔ ni do 'da kɔ̃ tũ hã dɔnggamɛnɔ ngboo, ɔ nɛ kɛ mbula 'da Mɔizɛ tɔ́a ni. A hã dɔnggamɔ do kɔ̃ tũ kpe tɛ wi, do kuti kɔ zɛkɛ, do mbe ogã ɛngganɔ talɛ kɔ sabɛlɛ: Ɛngga Nyɔngɔ Mapa kɛ wa à ina hana mapa tɛ nɛ gɔ, do Ɛngga Kala Kpalɛ, do Ɛngga Ɔ ti Da.

¹⁴ Salɔmɔ dɛa mbula olo nu baa a Davidi, nɛ a kɛ̃a tonɔ hã onganganɔ do 'da zu wa. Nɛ a ia olevitɛnɔ na, wa ga zuma we dɔnggɔ do NWA tũ kpo kpo, nɛ wa gala 'bɔ onganganɔ tɛ kɔ tonɔ 'da wa. Nɛ a kɛ̃ 'bɔ dɛa to 'da Owi zɔ mɔ tɛ nu tɔanɔ do 'da ngɔ gili owinɔ ni. A kɛ̃a wa do 'da nu tɔa do nu tɔa, ɔ nɛ kɛ Davidi, wi 'da Gale ba zi do nu a ni.

¹⁵ Nɛ wa èlè dɛ mbulanɔ kɛ Davidi hã ngɔ onganganɔ do olevitɛnɔ, tabi kɛnɔ ma zɔa omɔ olo gã golenɔ ni kpo gɔ.

¹⁶ Na mɛ ni, nɛ mɛnɔ vɛ̃ kɛ Salɔmɔ lingga zi we dɛ ma, yolo do ndo nyanga dɛ tɔa Tɛmpɛloe gbaa we hɔ Sɔkpɔ nɛ ni, ma dɛa tɛ̃ ɛ. Nɛ tɔa Tɛmpɛloe ma Sɔkpɔ zi vɛ̃ do dia nɛ.

¹⁷ 'Do nɛ, nɛ Salɔmɔ kulu ngɔ, nɛ a nɛ tɛ Esioni-Gebɛrɛ do Elatɛ. Olenɔ bɔa ni, ma dɛ nu kolo gba lì Sala Tɔ̃, kɛ ma tɛ ngɔ nù Edɔmɛ ni.

¹⁸ Nɛ nwa Hiramɛ saka sanga Owi to kɔ masuanɔ 'da a, kɛ wa dɛa toe 'do nɛ nyɛla ni, nɛ a tombo wa hã nwa Salɔmɔ na, wa gala owinɔ 'da a kɔ toe. Nɛ Owi to kɔ masuanɔ ni vɛ̃, wa nɛa zi tɛ ngɔ nù Ofirɛ, nɛ wa kala mɔ mbali nɛa ngɔ tɔnɛ 'bu ngɔ nɛ talɛ, nɛ wa si do ma hã nwa Salɔmɔ.