2 Sakonɔ 7 - WE NU GALE 1995

Salɔmɔ ia tɔa Tɛmpɛloe hã NWA

¹ Salɔmɔ sambala ia do'do, nɛ nyɛa we yolo li nza i, nɛ ma te tɛ sa'de kɛ wa gbɛa we dɔ we dɔnggɔ do nwa, mba do dɔnggamɔ kɛ ma be dɛa na ni, nɛ ma bɛlɛ. Nɛ dɔ̃lɔ̃ li 'da nwa ma yele kɔ tɔa Tɛmpɛloe vɛ̃.

² Nɛ do 'da fala ni, onganganɔ wa wè tɛ le kɔ tɔa Tɛmpɛloe gɔ, we kɛ dɔ̃lɔ̃ li 'da NWA ma dunu zi kɔ nɛ vɛ̃.

³ Nɛ obe Israɛlɛ vɛ̃ kɛ wa zi di ni ni, wa zɔa nyɛa we kɛ ma yula li nza i, do dɔ̃lɔ̃ li 'da NWA kɛ ma yele tɛ kɔ Tɛmpɛloe ni. Wa nɛa we zɔ ni, nɛ wa gu gba zugolo dɛ fala kɛ wa 'dafa we owinɔ ni. Nɛ wa gu li wa nù, nɛ wa ma ngɔ dɔnggɔ NWA, nɛ wa ga zuma hã a, we duzu kɔ̃a zã, do dia sila 'da a kɛ ma do ndɔti nɛ bina ni.

⁴ Nɛ nwa Salɔmɔ do obe Israɛlɛ vɛ̃ kɛ wa mba li ngba wa dɛ di ni ni, wa hã osa'de, nɛ wa gbɛ we dɔnggɔ do NWA.

⁵ Wa gbɛa zi ongɔmbɛ koto 'bu nɛ bɔa ngɔ nɛ bɔa, do obata do odua koto kama kpo do 'bu nɛ bɔa, we be dɛa na. Wa dɛa ni we e tɔa Tɛmpɛloe hã NWA.

⁶ Do 'da fala ni, onganganɔ wa zi dɛ fala dɛa tonɔ 'da wa, nɛ olevitɛnɔ wa tɛ zɛ zuma do omɔ zɛ Zumanɔ kɛ nwa Davidi dɛa zi ma na, ma ɔ we toe 'da Gale ni. Wa ga zi zuma we dɔnggɔ do nwa we duzu kɔ̃a zã 'da a kɛ ndɔti nɛ bina ni. Nɛ wa ga ɔ nɛ kɛ nwa Davidi bia zi ma hã wa ni. Nɛ onganga bɔa wa yula dɛ dati owinɔ ni vɛ̃, nɛ wa ma ngɔ dama mɔtũlũ. Nɛ owinɔ vɛ̃ wa yolo do nyanga wa.

⁷ Do kpo kɔ̃ tũi ni, nɛ nwa Salɔmɔ ia zi gbogbo fanda vɛ̃ kɛ dati tɔa Tɛmpɛloe ni hã NWA. Nɛ a kala osa'denɔ, do odɔnggamɔ kpalɛnɔ, do Okɛndɔ sa'denɔ kɛ wa gbɛa wa we be dɛa na ni, nɛ a dɔ mɛnɔ ni vɛ̃ dɛ gbogbo fanda ni hã Gale. A dɛa ni, we kɛ gbagala tũ mɔ bole kɛ wa dɔ do sa'denɔ hã Gale ni, ma ga gɔ, nɛ ma wè na, wa dɔ odɔnggamɛnɔ ni vɛ̃ ngɔ nɛ gɔ.

⁸ Do 'da fala nɛ ni, nɛ nwa Salɔmɔ do gba gili obe Israɛlɛ kɛ wa mba zi ngba wa ni, wa dungu ɛngga Ɔ ti Da dɛ kɔ tɔa Tɛmpɛloe 'do tũ sambo. Mɛ zi a gba gili Owele kɛ wa yula nyɛlɛ wena. Wa yula zi tɛ Lɛbo-Hamatɛ si gbãlã ngɔ, gbaa we hɔ tɛ nu lì Ezipeto si ba gɔtɔ.

⁹ Ma nɛa we hɔ tɛ ngbɛ'dɛ'dɛ kɔ̃ tũ ɛngga, nɛ ngɔ gili Owele wa mba li ngba wa, nɛ wa dɛ ɛngga mbé gbagala kɛ wa zĩ ma ni 'do tũ sambo. 'Do nɛ, nɛ wa dɛ 'bɔ tũ sambo, we dungu ɛngga Ɔ ti Da ngboo ni.

¹⁰ 'Do ki ni, nɛ ma hɔ kɔ̃ zɛkɛ 'bu nɛ bɔa ngɔ nɛ talɛ, zɛkɛ 'da sambo, nɛ nwa Salɔmɔ gese obe Israɛlɛ na, wa si. Nɛ wa si do yangga wena, we kɛ NWA wila zi nu a tɛ Davidi, do Salɔmɔ, do obe Israɛlɛ, winɔ 'da a.

NWA bia 'bɔ tɛ a hã Salɔmɔ

¹¹ Nwa Salɔmɔ nɛa we e dɛa to tɔa Tɛmpɛloe 'da NWA Gale, do tɔa nwa 'da a, do omɛnɔ vɛ̃ kɛ a kɔ̃a zi we dɛ kɔ tɔanɔ ni, nɛ NWA bia 'bɔ tɛ̃ ɛ hã a do tũ.

¹² Nɛ a tɔ̃ hã a na: “Mi zila sambala 'da mɔ. Nɛ mi saka fala gɛ, takɔ ma ɔ sɛ do fala hã do dɔnggamɔ hã mi.

¹³ Mbe gɔ, nɛ ngba soe kpo, nɛ mi dɛ sɛ na kolo tɛ tɛ̃ gɔ, tabi mi ba sɛ nu mi hã Onga'di na, wa 'danga le vɛ̃, tabi 'bɔ na 'dã zɛlɛ ma ba owinɔ vɛ̃.

¹⁴ Hã fala kɛ owinɔ 'da mi, kɛ mi ia li mi zu wa ni, wa ba tɛ wa dɛ nù, hã wa bɛ̃ gɛnɛ 'dã mɛnɔ 'da wa vɛ̃, hã wa kɔlɔ do mi, hã wa sambala mi, nɛ mi, kɛ mi dungu li nza i ni, mi gɛ sɛ zala mi we zele wa. Nɛ mi fo sɛ ku'da 'dã mɛnɔ zu wa, nɛ mi dɛ sɛ na, odia mɔ dɛlɛ ngɔ nùi 'da wa dɛ dati.

¹⁵ Kɔ di dɔ̃ ni, mi hũi li mi, nɛ mi gɛ zala mi we zele sambala kɛ nɛ nɛ sambala kɔ tɔa Tɛmpɛloe gɛ ni.

¹⁶ Mi saka ma, nɛ mi e ma na, ma ɔ sɛ do tɔa dɔnggɔ do mi fai. Mi zɔ sɛ mɔ tɛ nɛ, nɛ mi sɛ do dia kɔ sila dɛ 'da nɛ fai.

¹⁷ “Kɔ we duzu mɔ, fala kɛ mɔ yɛnggɛ do li wala 'da mi, ɔ nɛ kɛ baa mɔ Davidi yɛngga zi ni, hã mɔ dɛ olo nu mi vɛ̃, do mbulanɔ kɛ mi hã hã mɔ ni,

¹⁸ nɛ mi dɛ sɛ na, to nwa 'da mɔ nganda, ɔ nɛ mbuli kɛ mi kpua zi hã baa mɔ Davidi ni. Mi kpua zi mbuli ni hã a na, 'da fala fai, mbe kpo kɔ obe zã a, a dungu sɛ nwa ngɔ obe Israɛlɛ olo a.

¹⁹ “Nɛ nde fala kɛ nɛ siki 'do nɛ lo do mi, kɔ nɛ bɛ̃ we nu mi, do ombulanɔ mi ia hã nɛ ni, hã nɛ ma ngɔ dɔnggɔ ogele galenɔ, nɛ nɛ gu nu ti wa,

²⁰ nɛ mi fo sɛ nɛ ngɔ nùi kɛ mi ba hã nɛ gɛ do'do. Nɛ mi da sɛ 'bɔ kɔ mi tɛ tɔa Tɛmpɛloe, kɛ mi wila nu mi tɛ nɛ na, ma ɔ we dɔ̃lɔ̃ li 'da mi ni. Nɛ ogele winɔ vɛ̃ wa mɔmɔ sɛ nɛ obe Israɛlɛ, nɛ wa zɔ sɛ nɛ li wa yala iko.

²¹ Nɛ 'da fala kɛ Owi la walanɔ, wa la sɛ ni, nɛ wa zɔ sɛ tɔa Tɛmpɛloe kɛ ma gã zi wena, kɔ ma dɛa aũ tɔa ni, nɛ wa ɔngbɔ sɛ ɔngba, nɛ ma zɛlɛ sɛ wa wena. Nɛ wa aka sɛ na: ‘Gulu kɛ NWA Gale dɛa do nùi gɛ, do Tɛmpɛloe ni we ge nde?’

²² “Nɛ mbe wele a gese sɛ hã wa na: ‘NWA dɛa ni, we duzu kɛ obe Israɛlɛ wa la fala a, NWA Gale 'da oyaa wa, kɛ a fua zi wa ngɔ nù Ezipeto dɛ nza ni do'do. Kɔ wa ia sila wa ngɔ ogele galenɔ we dɔnggɔ wa. Gulu nɛ hã a hã ngamɛnɔ gɛ vɛ̃ hã wa ni.’ ”