2 Sakonɔ 6 - WE NU GALE 1995

¹ 'Do nɛ, nɛ Salɔmɔ sambala na: “Aa nwa, mɔ tɔ̃a zi na, ɛ kɔ̃a we ɔ kɔ gba tũ.

² Nɛ nde mi dɛa gã tɔa Tɛmpɛlo hã mɔ, nɛ mɛ a tɔa kɛ mɔ ɔ sɛ dɛ kɔ nɛ fai!”

Salɔmɔ tɔ̃a lɛnggɛ hã obe Israɛlɛ

³ Ɔ nɛ kɛ obe Israɛlɛ wa ngɛmɛ zi li ngba wa vɛ̃ dɛ di ni ni, nɛ Salɔmɔ siki li ɛ dɛ 'da wa, nɛ a na: “E kɔ Gale wele nu a tɛ nɛ!

⁴ Mi hã iɔ̃nae hã NWA Gale 'da lɛ obe Israɛlɛ, we kɛ a dɛa mbuli a kpua zi hã baa mi Davidi ni. A kpua zi mbuli ni na:

⁵ ‘Yolo tɛ kɔ̃ tũi mi fua nɛ, obe Israɛlɛ, winɔ 'da mi, ngɔ nù Ezipeto dɛ nza ni, mi sàkà zi gã le kpo kɔ gã lenɔ vɛ̃ ngɔ nù Israɛlɛ na, wa dɛ tɔa Tɛmpɛlo hã mi dɛ di ni, kɔ mi ɔ kɔ nɛ gɔ. Nɛ mi sàkà zi wele do tɛ mi na, a dungu nwa ngɔ obe Israɛlɛ, owinɔ 'da mi gɔ.

⁶ Nɛ nde mi saka le Yeruzalɛmɛ, takɔ mi ɔ kɔ nɛ we be tɛ mi. Nɛ mi saka 'bɔ mɔ Davidi, takɔ mɔ ɔ gã wi ngɔ owinɔ 'da mi.’ ”

⁷ Salɔmɔ tɔ̃a 'bɔ na: “Ĩ na, baa mi Davidi zi do linggamɔ dɛ tɔa Tɛmpɛlo hã NWA Gale 'da lɛ obe Israɛlɛ boe.

⁸ Nɛ nde nwa tɔ̃a zi hã a na: ‘Linggamɛ mɔ kpa we dɛ tɔa Tɛmpɛloe hã mi ni, ma de wena.

⁹ Nɛ nde wi nɛ dɛ sɛ ma wi a mɔ gɔ, wi sɛ a bulu be 'da mɔ. A sɛ hã a nɛ dɛ tɔa Tɛmpɛloe ni hã mi.’ ”

¹⁰ Nɛ Salɔmɔ tɔ̃ 'bɔ na: “Nɛ zɔ̀ di ngangga ni, nwa dɛa mbuli a kpua zi ni. Mi dungu nwa ngɔ Israɛlɛ dɛ olo baa mi, ɔ nɛ kɛ NWA Gale tɔ̃a zi ni. Nɛ mi dɛa tɔa Tɛmpɛlo hã NWA Gale 'da lɛ obe Israɛlɛ.

¹¹ Nɛ dɛ kɔ Tɛmpɛloe ni, mi 'dafa 'bɔ fala we e do Sanduku kɛ ota gba tɔkɛ nwa gba zi do lɛ obe Israɛlɛ vɛ̃ kɔ nɛ ni.”

Sambala 'da Salɔmɔ

^12-13 Salɔmɔ ba zi nu a, nɛ wa dɛa gbagala do tũ mɔ bolo, nɛ wa e ma dɛ li fanda ni. 'Da du gbagala ni do 'da dɔ nɛ wia kɔ̃ mɛtrɛ bɔa do dɔ nɛ. Nɛ 'da ngala nɛ a mɛtrɛ kpo do dɔ nɛ. Dɛ 'do nɛ, nɛ Salɔmɔ nɛa, nɛ a yolo dɛ dati gbagala 'da nwa ni, nɛ a kũ dɛ ngɔ nɛ, nɛ a gu gba zugolo. Nɛ a siki li a dɛ 'da obe Israɛlɛ vɛ̃ kɛ wa mba li ngba wa di ni ni. Nɛ a kala kɔ̃ a dɛ ngɔ, nɛ a sambala NWA na:

¹⁴ “Aa NWA Gale 'da lɛ obe Israɛlɛ, fo gele gale tɛ li nza i, do ngɔ nù gɛ ɔ nɛ mɔ ni bina! Mɔ èlè gba tɔkɛ mɔ gba zi do owinɔ 'da mɔ ni gɔ. Mɔ tɛ be dia zã 'da mɔ fai hã owanɔ kɛ wa dɛ mbulanɔ 'da mɔ do sila wa vɛ̃ ni.

¹⁵ Mɔ dɛa mbuli kɛ mɔ kpua zi hã baa mi Davidi, wi toe 'da mɔ ni. Gbãlã we, lɛnggɛnɔ vɛ̃ kɛ mɔ tɔ̃a zi hã a ni, mɔ do tɛ mɔ, mɔ dɛa ma sɔɛ gɛ.

¹⁶ Kɔ mi aka mɔ, NWA Gale 'da lɛ obe Israɛlɛ na, mɔ dɛ́ tɛ mɛ 'bɔ olo mbuli kɛ mɔ kpua zi hã baa mi Davidi, wi toe 'da mɔ ni. Mɔ tɔ̃a zi hã a na: ‘Fala kɛ oyaa mɔ wa dɛ mbulanɔ 'da mi, ɔ nɛ kɛ mɔ dɛa zi ni, nɛ 'da fala fai, mbe kpo kɔ wa a dungu sɛ nwa ngɔ obe Israɛlɛ dɛ olo mɔ.’

¹⁷ Ma kɛ mi ala nu mi hã mɔ, NWA Gale 'da lɛ obe Israɛlɛ na, mɔ dɛ́ mbuli mɔ kpua zi hã baa mi Davidi, wi toe 'da mɔ ni!

¹⁸ “Nɛ nde mɔ Gale, mɔ wia we ɔ sanga winɔ ngɔ nù gɛ kpaa nde? Kɛ mɔ gã nɛa ngɔ li nza nɛ ge nde gɛ, tɔlɔ do tɔa kɛ mi dɛa gɛ nde?

¹⁹ Kɔ we bina, NWA Gale 'da mi, mɔ síkí li mɔ dɛ 'da mi, kɔ mɔ zélé ala nui mi ala hã mɔ kɔ sambala 'da mi sɔɛ gɛ.

²⁰ Nɛ tũ do gba wese, mɔ zɔ́ mɔ tɛ tɔa Tɛmpɛloe gɛ do dia li, tua kɛ mɛ a tɔa kɛ mɔ tɔ̃a zi na, wa dɔnggɔ sɛ mɔ dɛ kɔ nɛ. Mɔ zélé sambala mi sambala do mɔ dɛ kɔ nɛ gɛ.

²¹ Mɔ zélé sambala 'da mi, do kɛ 'da obe Israɛlɛ, winɔ 'da mɔ. 'Da fala kɛ wa siki li wa dɛ fala gɛ we sambala mɔ, nɛ mɔ zélé sambala 'da wa. Nɛ mɔ NWA kɛ mɔ dungu li nza i ni, mɔ zélé lɛ, nɛ mɔ fó ku'da 'dã mɛnɔ zu lɛ.

²² “Fala kɛ wa da wele na, a dɛa 'dã mɔ do ngba a, hã wa ngbɔkɔ a na, a tɛ dati gbagala kɔ tɔa Tɛmpɛloe 'da mɔ we kana tɛ̃ a do fio. Hã a kana tɛ̃ a na, ɛ dɛ ma gɔ,

²³ nɛ ma wia na, mɔ NWA, kɛ mɔ dungu li nza i ni, mɔ zele ma, nɛ mɔ gɔnɔ ngbangga 'da Owi tũnɔ 'da mɔ. Sɛ a wi dɛ 'dã mɛ a kpa etumbu, nɛ wa ĩ ti wi bɔlɔ zu na, a do 'dã mɔ bina de.

²⁴ “Mbe gɔ, nɛ obe Israɛlɛ wa bɛ̃ we nu mɔ, nɛ mɔ dɛ na, Owi sɛnɛ wa, wa nɛ ngɔ wa 'da fala bolo. Kɔ wa zɔ ni, hã wa gbala 'dã mɛ 'da wa, tabi wa dɔnggɔ mɔ, tabi wa sambala mɔ, kɔ wa ala nu wa hã mɔ tɛ kɔ tɔa Tɛmpɛloe gɛ,

²⁵ nɛ ma wia na, mɔ NWA, kɛ mɔ dungu li nza i ni, mɔ zele wa. Nɛ mɔ fó ku'da 'dã mɛ ni zu wa, nɛ mɔ gese nùnɔ kɛ mɔ hã zi hã oyaa wa ni hã wa, tua kɛ wa a owinɔ 'da mɔ.

²⁶ “Tabi mbe gɔ, nɛ obe Israɛlɛ wa bɛ̃ we nu mɔ, nɛ mɔ kpe li nza na, kolo tɛ tɛ̃ 'bɔ gɔ. Kɔ wa zɔ ni, hã wa siki li wa dɛ tɛ Tɛmpɛloe gɛ we sambala mɔ, tabi wa dɔnggɔ mɔ, tabi wa ba tɛ wa dɛ nù, hã wa la fala bɛ̃ we nu mɔ nde,

²⁷ nɛ ma wia na, mɔ NWA, kɛ mɔ dungu li nza i ni, mɔ zele wa. Nɛ mɔ fo ku'da 'dã mɛ ni zu wa, tua kɛ wa a owinɔ 'da mɔ. Nɛ ma wia 'bɔ na, mɔ be dia dɛa to tɛ wi hã wa. Nɛ mɔ tómbó kolo ngɔ nùi 'da mɔ, kɛ mɔ hã zi hã wa do mɔ wa ni.

²⁸ “Mbe gɔ, nɛ gba wɔ te ngɔ nùi gɛ, tabi 'dã zɛlɛ, tabi Okpalɛnɔ ma kolo, tabi ma mbulu dɛ ngɔ, tabi odɔla do osisiwele wa te ngɔ nùi. Tabi Owi sɛnɛ obe Israɛlɛ wa le gbaa dɛ kɔ lenɔ 'da wa, kɛ gba ngbo zĩ ma takpa ni, nɛ wa zɛlɛ tɛ wa. Tabi gele fɛna do gele zɛlɛ, ma te 'bɔ ngɔ wa.

²⁹ Kɔ owinɔ 'da mɔ, obe Israɛlɛ, wa zɔ ni, hã wa ma ngɔ ala nu wa hã mɔ do 'bako, tabi wa siki li wa dɛ tɛ Tɛmpɛloe gɛ, kɔ wa kala kɔ wa dɛ ngɔ we sambala mɔ,

³⁰ nɛ ma wia na, mɔ NWA, kɛ mɔ dungu li nza i ni, mɔ zele wa. Nɛ mɔ fo ku'da 'dã mɛ ni zu wa. Nɛ mɔ gala wele do wele do tɛlɛ tɛ dɛa to tɛ̃ a, do 'da kɛ mɔ ĩ ti kɔ sila a ni. Mba gɔ, mɔ zu mɔ kpo, mɔ ĩ ti kɔ sila winɔ vɛ̃.

³¹ Mɔ dɛ́ na mɛ ni, takɔ lɛ obe Israɛlɛ, lɛ dɛ mɛnɔ kɛ zã mɔ kɔ̃a ni, nɛ lɛ dɛ 'bɔ kili mɔ fai, tɛ li dungu nza 'da lɛ vɛ̃, ngɔ nùi mɔ hã zi hã oyaa lɛ ni.

³² “Mbe gɔ, nɛ gele wi kɛ a a be Israɛlɛ gɔ, nɛ a ɔ nyɛlɛ wena ni, a zele we dɔ̃lɔ̃ li 'da mɔ, do we gã mɛnɔ kɛ mɔ dɛ we owinɔ 'da mɔ ni, nɛ a tɛ we dɔnggɔ mɔ, do sambala mɔ tɛ kɔ tɔa Tɛmpɛloe gɛ.

³³ Nɛ ma wia na, mɔ NWA, kɛ mɔ dungu li nza i ni, mɔ zele a. Nɛ mɔ hã mɛnɔ vɛ̃ kɛ a gɔ kɔ̃ mɔ ni hã a. Mɔ dɛ ni, nɛ owinɔ vɛ̃ ngɔ nùi gɛ, wa ĩ sɛ ti mɔ, nɛ wa dɛ sɛ kili mɔ, ɔ nɛ kɛ obe Israɛlɛ, winɔ 'da mɔ, wa dɛ do kili mɔ ni. Nɛ owinɔ vɛ̃ wa ĩ sɛ na, Tɛmpɛloe mi dɛa gɛ, mɛ a mɔ́ mɔ kpaa.

³⁴ “Mbe gɔ, nɛ mɔ ba nu mɔ hã obe Israɛlɛ na, wa nɛ, kɔ wa bi Owi sɛnɛ wa. Kɔ do fala ni, hã wa siki li wa dɛ tɛ le mɔ saka zi ma, do tɔa Tɛmpɛloe mi dɛa hã mɔ gɛ, hã wa sambala mɔ,

³⁵ nɛ ma wia na, mɔ NWA, kɛ mɔ dungu li nza i ni, mɔ zele sambala ala nui 'da wa. Nɛ mɔ gala wa li bole ni.

³⁶ “Aa nwa, mɔ ĩ na, wi zɔlɔ bɛ̃ we nu mɔ mba mba fala kpo iko ni, a bina! Ma kɛ 'da fala kpo, nɛ obe Israɛlɛ wa bɛ̃ sɛ we nu mɔ, nɛ mbe gɔ, nɛ zã mɔ ma nɔ̃lɔ̃ sɛ dɛ tɛ wa. Nɛ mɔ 'dɔlɔ sɛ wa hã owi sɛnɛ wa, nɛ mɔ dɛ na, owinɔ ni wa kala wa do ngbá, nɛ wa si do wa ndũu dɛ kɔ lenɔ 'da wa.

³⁷ Nɛ nde mbe gɔ, nɛ kɔ le ngbá i mɔ ni, nɛ obe Israɛlɛ wa kpa linggamɔ, nɛ wa ma ngɔ ala nu wa hã mɔ. Nɛ wa tɔ̃ na, lo bɛ̃a we nu mɔ, lo dɛa 'dã mɔ, lo káfá gɔ!

³⁸ Nɛ wa gbala 'dã mɛ 'da wa do sila wa vɛ̃ tɛ le 'duli i. Kɔ 'do nɛ, hã wa siki li wa dɛ tɛ nùi kɛ mɔ hã zi hã oyaa wa, do le kɛ mɔ saka zi ma, do tɔa Tɛmpɛloe mi dɛa hã mɔ gɛ, hã wa sambala mɔ do 'da fala ni,

³⁹ nɛ ma wia na, mɔ NWA, kɛ mɔ dungu li nza i ni, mɔ zele sambala ala nui 'da wa, nɛ mɔ gala wa. Nɛ mɔ fo ku'da 'dã mɛ zu wa, nɛ mɔ tɛ lènggè do kɛ wa bɛ̃a we nu mɔ ni gɔ.

⁴⁰ “Aa Gale 'da mi, mɔ gɛ́ zala mɔ, hã mɔ zele sambala 'da mi kɛ mi tɔ̃ ma hã mɔ dɛ fala gɛ.

⁴¹ NWA Gale, mɔ kpé fala nɛ kpo do Sanduku Gba Tɔkɛ 'da mɔ, kɛ ma be ngawi 'da mɔ ni. Nɛ mɔ tɛ́ dɛ fala kɛ wa 'dafa na, mɔ kpe do tɛ mɔ ni. Aa NWA Gale, e kɔ onganganɔ 'da mɔ wa dɛ yangga we kɛ mɔ kpasa wa ni. Nɛ e kɔ owinɔ 'da mɔ wa be yangga 'da wa dɛ nza.

⁴² Aa NWA Gale, mɔ tɛ bɛ gɛnɛ mi nwa kɛ mɔ saka mi gɛ gɔ. Nɛ ta zu mɔ tɛ èlè ngɔ dia dɛa mɛnɔ kɛ mɔ dɛa ma hã wi toe 'da mɔ Davidi ni gɔ.”