2 Sakonɔ 5 - WE NU GALE 1995

¹ Salɔmɔ dɛa tɔa Tɛmpɛloe 'da NWA, hã ma nɛa we e vɛ̃, nɛ a ngɛmɛ li mɛnɔ vɛ̃, kɛ baa a Davidi hã zi ma hã NWA ni, nɛ a a ma kɔ 'bili tɔa usu do kpamɛnɔ tɛ kɔ tɔa Tɛmpɛloe. Mɛnɔ ni zi a fɛ̃a mɔ bolo, mɔ mbali do omɔ kpi do kpi.

Wa ia Sanduku Gba Tɔkɛ kɔ tɔa Tɛmpɛloe

² Nɛ do ngba soe ni, nɛ nwa Salɔmɔ sa mɔ hã okumunɔ ngɔ obe Israɛlɛ vɛ̃, do owanɔ ngɔ nu kpalanɔ, do owanɔ ngɔ nu fɛlɛ kulanɔ. A sa mɔ hã wa na, wa mba li ngba wa dɛ Yeruzalɛmɛ, takɔ wa ba Sanduku Gba Tɔkɛ 'da nwa tɛ kɔ Gba Ngbo nwa 'da Davidi, kɛ wa sa 'bɔ li ma na Sioni ni, we e ma tɛ kɔ tɔa Tɛmpɛloe i.

³ Nɛ obe Israɛlɛ vɛ̃ wa mba li ngba wa do ngba soe ɛngga Ɔ ti Da, do zɛkɛ 'da sambo.

⁴ Nɛ okpasa wi ngɔ obe Israɛlɛ vɛ̃, wa nɛa fala nɛ kpo do olevitɛnɔ kɛ wa ba Sanduku Gba Tɔkɛ ni. Nɛ onganganɔ do olevitɛnɔ wa ba ma, nɛ wa la do ma dɛ kɔ Tɛmpɛloe i.

⁵ Nɛ wa ba 'bɔ tɔa Tande kpa ngba wi do Gale, mba do mɛnɔ vɛ̃ kɛ wa dɔnggɔ do a di ni ni, nɛ wa la do ma dɛ kɔ tɔa Tɛmpɛloe i.

⁶ Nɛ nwa Salɔmɔ do obe Israɛlɛ vɛ̃, wa ngɛmɛ ngba wa dɛ dati Sanduki ni, nɛ wa gbɛa obata do ongɔmbɔ dɛlɛ nɛ mba mɔ ni, we dɔnggɔ do Gale.

⁷ 'Do nɛ, nɛ onganganɔ wa ba Sanduku Gba Tɔkɛ, nɛ wa nɛ do ma, nɛ wa e ma kɔ 'bili tɔa kɛ wa 'dafa we nɛ, nɛ wa sa li ma na “Fala kɛ ma santo wena” ni. Nɛ wa ia ma ngboo dɛ ti 'baka ohi mɛnɔ kɛ ma ɔ nɛ wele ni.

⁸ Ohi mɛnɔ ni wa tata zi 'baka wa, nɛ ma kele Sanduku Gba Tɔkɛ fala nɛ kpo do te ngbangboe, kɛ wa ba nɛ ni.

⁹ Ote ngbangbonɔ ni ma dulu zi wena, do tɛlɛ tɛ kɛ na, wele yolo de ngbala Sanduku Gba Tɔkɛ do nu 'bili tɔa ni, nɛ a zɔ ma de wena. Kɔ wele yolo do nza i, nɛ nde a wè tɛ zɔ ma gɔ. Otenɔ ni ma 'bana dɛ di ni tia do sɔɛ gɛ.

¹⁰ Gele mɔ zi kɔ Sanduki bina, tati a tanɔ bɔa, kɛ Mɔizɛ a zi kɔ nɛ tɛ ngɔ kala Sinai i ni. Mɛ zi a ota gba tɔkɛ kɛ NWA gba zi do obe Israɛlɛ, 'do kɛ a fua wa ngɔ nù Ezipeto ni.

^11-14 Onganganɔ kɛ wa zi do 'da fala nɛ ni, wa fɔlɔ zi tɛ wa, nɛ wa hɔ osa wi li Gale. Wi zi tati a ngo gili onganganɔ wa saka zi wa we toe ni iko gɔ, nɛ nde wi zi a onganganɔ vɛ̃. Olevitɛnɔ kɛ wa zi a Owi ga zuma ni, wi a Asafɛ, Hemanɛ, do Yɛdutunɛ, mba do obenɔ 'da wa do mbe owinɔ kɔ nu fɛlɛ wa ni. Wa hi'da zi tulu linɛ kɛ ma ɔ bɛndɛ bɛndɛ ni. Nɛ wa kala zi mbala mɔ bole kɛ wa zɛ do ngbɛ ɛ ni, do ogã kundu, do obe kundu dɛ kɔ̃ wa, nɛ wa yolo nɛ dɛ kɛ zã gbagala do si 'biti gba wese. Nɛ onganga kama bɔa kɛ wa ĩ zi ti dama mɔtũlũ ni, wa yula zi dɔ̃ɔ dɛ kɛ zã wa ni. Nɛ owi dama mɔtũlũnɔ, do tala owi zɛ Zumanɔ vɛ̃, wa mba ngba wa, nɛ wa dɔnggɔ NWA. Nɛ wa ma ngɔ dama mɔtũlũnɔ, do zɛ mbala mɔ bolonɔ, do ombe mɔ zɛ Zumanɔ ni do 'da fala kɛ owi ga Zumanɔ wa ma ngɔ ga na: “Lɛ dɔ́nggó nwa, we kɛ a a wi dia sila, nɛ kɔ̃a zã 'da a do ndɔti nɛ bina.” Do fala ni, nɛ gba kutu ma kpia kɔ Tɛmpɛloe kpã kpã, nɛ onganganɔ wa wè zi 'bɔ we dɛ tonɔ 'da wa gɔ. We kɛ dɔ̃lɔ̃ li 'da nwa ma dunu zi kɔ Tɛmpɛloe vɛ̃.