2 Sakonɔ 4 - WE NU GALE 1995

Li omɔ dɛa to kɔ tɔa Tɛmpɛloe

¹ Wa dɛa gbagala do tũ mɔ bolo, nɛ 'da du nɛ, do 'da dɔ nɛ wia kɔ̃, mɛtrɛ 'bu. Nɛ 'da ngala nɛ, mɛ a mɛtrɛ mɔlɔ.

² Wa dula 'bɔ mɔ ɔ korr nɛ gba sani ni do tũ mɔ bolo. 'Da pɛsɛ nu nɛ, mɛ a mɛtrɛ mɔlɔ, nɛ 'da ngala nɛ a mɛtrɛ bɔa do dɔ nɛ, nɛ 'da gã zã nɛ mɛtrɛ 'bu ngɔ nɛ mɔlɔ.

³ Nɛ wa gɛzɛ owili ngɔmbɔ ngɔ lɔnggɔ fɛlɛ bɔa ti zala sani ni zĩ takpa. Wa lɔnggɔ gɛzɛ owili ngɔmbɔ 'bu nɛ bɔa we mɛtrɛ kpo, ni do ni. A dula lɔnggɔ fɛlɛ ngɔmbɔnɔ ni do gba sani fala nɛ kpo.

⁴ Nɛ wa dolo owili ngɔmbɔ 'bu ngɔ wa bɔa do tũ mɔ bolo, nɛ wa e gba sani ni dɛ li 'do wa. Owili ngɔmbɛnɔ ni wa zɔ zi mɔ dɛ li ngba wa talɛ talɛ, nɛ wa siki 'do wa hã ngba wa.

⁵ 'Da gã gba sani ni, mɛ a sãtimɛtrɛ ngbɛ'dɛ'dɛ. Nɛ wa dɛa nu kolo nɛ ɔ nɛ nu kolo bila, kɛ ma wia kɔ̃ do fulɛlɛ kɛ ma bulu zala ɛ bulu ni. Gba sani ni ma wia we le litrɛ lì ɔ nɛ koto kama do 'bu nɛ bɔa ni.

⁶ Nɛ wa dula 'bɔ gã sani tũ mɔ bolo 'bu, nɛ wa kala gã sani mɔlɔ, nɛ wa a ma kɛ zã tɔa Tɛmpɛloe, si ngɔ ngawili kɔ̃, nɛ wa a tala nɛ mɔlɔ si ngɔ gale. Wa a zi lì kɔ nɛ we fɔlɔ do mɛnɔ, takɔ ma hɔ santo li Gale. Nɛ wa fɔlɔ zi mulu sa'denɔ kɛ wa nɛ dɔ we dɔnggɔ do Gale ni dɛ di ni. Nɛ onganganɔ wa fɔlɔ zi tɛ wa do lì kɔ gba sani, takɔ wa hɔ sa wi li Gale.

⁷ Wa dɛa mɔ a do mwinda 'bu do mɔ mbali, ɔ nɛ tɛlɛ tɛ kɛ NWA ba do nu a ni, nɛ wa a ma kɔ tɔa Tɛmpɛloe. Wa a mbe mɔlɔ si ngɔ ngawili kɔ̃, nɛ mbee nɛ mɔlɔ si ngɔ gale.

⁸ Nɛ wa dɛ 'bɔ mɛsa 'bu, nɛ wa a ma kɔ tɔa Tɛmpɛloe. Wa a mbe mɔlɔ si ngɔ ngawili kɔ̃, nɛ mbe mɔlɔ si ngɔ gale. Nɛ wa dolo obila kama kpo do mɔ mbali, we kpɔ tɔkɔ sa'denɔ.

⁹ 'Do nɛ, nɛ wa dɛ li fanda hã onganganɔ. Nɛ wa dɛ 'bɔ mbé gele li fanda gã wena, nɛ wa dɛ onu nɛ, nɛ wa nãlã tũ mɔ bolo tɛ nu tɔanɔ ni vɛ̃.

¹⁰ Nɛ wa e 'bɔ gba sani a korr ni si ngɔ ngawili, kɔ dɔ̃ɔ do kulu tɔa Tɛmpɛloe.

Li omɛnɔ kɛ Huramɛ dula zi

¹¹ Huramɛ dɛa omɔ a bũ kɔ nɛ, do opau, do obila kpɔ tɔkɔ sa'denɔ. Nɛ a ia wá to dolo mɛnɔ vɛ̃ kɛ nwa Salɔmɔ sa zi mɔ hã a na, a dɛ we tɔa Tɛmpɛloe 'da NWA ni.

^12-16 Mɛnɔ ni zi a: obɛlɛduma bɔa, omɛnɔ bɔa kɛ ma ɔ korr nɛ ndasa, we gu ma dɛ zu obɛlɛdumanɔ ni, tɛlɛ tɛ mɔ ɔ nɛ ofɛlɛ ni bɔa, takɔ wa kasa ma tɛ ndasanɔ kɛ ma ɔ korr tɛ zu obɛlɛdumanɔ ni, olɔnggɔ fɛlɛ wala te grɛnadɛ kama nalɛ, kɛ wa lɔnggɔ ma ngɔ gili nɛ bɔa, wala te kama bɔa tɛ ngɔ lɔnggɔ fɛlɛ kpo kpo, we kasa ma dɛ zu ndasa kpo kpo, ongilingili, do ogã saninɔ dɛ ngɔ nɛ, gba sani kɛ ma ɔ korr ni, owili ngɔmbɛ 'bu ngɔ wa bɔa, kɛ wa ia zi gba sani dɛ li 'do wa ni, omɔ a bũ kɔ nɛ, opau, do okanya dumu do mulu sa'de. Mɛnɔ vɛ̃ kɛ nwa Salɔmɔ ba zi nu a hã Huramɛ na, a dɛ ma we tɔa Tɛmpɛloe 'da NWA ni, a dula zi ma do tũ mɔ bolo kɛ wa hɔnɔ tɛ nɛ, nɛ ma lɔa de wena ni.

¹⁷ Huramɛ dula mɛnɔ ni vɛ̃ kɔ gbangɔlɔ̃ lì Yɔrdanɛ, tɛ ngbala ole Sukɔtɛ do Sɛredata.

¹⁸ Wa dɛa zi mɛnɔ ni vɛ̃, nɛ nde wa ĩ̀ ti kilo tũ mɔ bole gɔ, tua kɛ ma dɛlɛ zi la li ngele, nɛ fala ĩ ti kilo nɛ bina.

^19-22 Nɛ Salɔmɔ ba zi 'bɔ nu ɛ, nɛ wa dula omɔ kpi do kpi do mɔ mbali, we tɔa Tɛmpɛloe 'da NWA. Mɛnɔ ni zi a: gbagala dɔ do fũ yɔmbɔ we dɔnggɔ do Gale, omɛsa kɛ wa a mapa dɔnggamɛ ngɔ nɛ hã Gale ni, omɔ a do mwindanɔ do mwindanɔ dɛ ngɔ nɛ na, wa tũ ma dɛ dati fala kɛ ma santo wena, ɔ nɛ kɛ mbula tɔ̃a ni, ofulɛlɛ dɛ ngɔ omɔ a do mwindanɔ, omwinda, do obe mɔ 'be do mɔ, omɔ bi do mwinda, obila kpɔ do tɔkɔ sa'denɔ, obila, omɔ u do we, nu 'bili tɔa Tɛmpɛloe, do onu tɔa tɛ fala kɛ ma santo wena ni. Wa dɛa zi mɛnɔ ni do dia mɔ mbali kɛ fo 'dɔlɔ nɛ zã nɛ bina ni.