2 Sakonɔ 3 - WE NU GALE 1995

Salɔmɔ dɛa tɔa Tɛmpɛloe

¹ Salɔmɔ ndua dɛ tɔa Tɛmpɛloe 'da NWA Gale tɛ Yeruzalɛmɛ i, dɛ fala NWA bia zi do tɛ̃ ɛ hã baa a Davidi tɛ ngɔ kala Mɔria ni. Fala ni, mɛ zi dati a fala zɛ do kpalɛ 'da Ornanɛ, wi Yebuzi. Nɛ Davidi ba zi ma, nɛ a 'dafa fala tɔa Tɛmpɛloe dɛ di ni.

² Salɔmɔ dɛa zi to nwa 'da a sabɛlɛ nalɛ, nɛ ma nɛa we hɔ tɛ bɔa zɛkɛ kɔ nalɛ sabɛlɛ ni, nɛ a ndo dɛ tɔa Tɛmpɛloe.

³ 'Da du tɔa Tɛmpɛloe kɛ nwa Salɔmɔ dɛa hã Gale ni, mɛ a mɛtrɛ 'bu nɛ talɛ, nɛ 'da dɔ nɛ mɛ a mɛtrɛ 'bu.

⁴ Nɛ 'bili tɔa tɛ nu tɔa Tɛmpɛlo i mɛ a mɛtrɛ 'bu, nɛ ma wia kɔ̃ do 'da dɔ tɔa. Nɛ 'da ngala nɛ mɛ a mɛtrɛ 'bu nɛ gazɛlɛ. Nɛ wa nãlã zi kɔ nɛ vɛ̃ do mɔ mbali kɛ 'dɔlɔ nɛ kɔ nɛ bina ni.

⁵ Nɛ tɛ dɛlɛ tɔanɔ kɔ gã tɔa nga ni, wa nãlã zi vɛ̃ a ote mafuku. Nɛ wa nãlã tenɔ ni do mɔ mbali kɛ 'dɔlɔ nɛ kɔ nɛ bina ni, nɛ wa gɛzɛ ma do mɔ ɔ nɛ onwá 'bete tabi oiyaka ni.

⁶ Nɛ nwa Salɔmɔ ba nu a, nɛ wa nãlã ota olo gã gole tɛ dɛlɛ tɔa na, ma gɛzɛ tɛ nɛ. (Mɔ mbali kɛ a dɛa do mɛnɔ ni, ma yolo zi tɛ kɔ le Parvaimɛ.)

⁷ Nɛ wa nãlã zi mɔ mbali tɛ ogã te plafɔ̃nɔ, do dɛlɛ tɔa, do onu tɔanɔ, do ogbangganɔ. Nɛ wa gɛzɛ hi mɛnɔ, kɛ ma ɔ nɛ wele, nɛ sala 'baka nɛ boe ni tɛ dɛlɛ tɔanɔ.

⁸ Nɛ wa dɛa 'bɔ 'bili kɔ tɔa kɛ wa sa li ma na: Fala kɛ ma santo wena. Nɛ 'da dɔ 'bili kɔ tɔa ni mɛ a mɛtrɛ 'bu, ɔ nɛ 'da dɔ tɔa Tɛmpɛloe ni, nɛ 'da ngala nɛ mɛ a mɛtrɛ 'bu. Nɛ wa nãlã zi mɔ mbali kɛ 'dɔlɔ nɛ kɔ nɛ bina ni, we tɔnɛ 'bu nɛ bɔa kɔ nɛ.

⁹ Nɛ dĩ osɛtɛ mɔ mbali kɛ wa bɛ̃lɛ̃ zi do mɛnɔ ni a gramɛ kama mɔlɔ. Nɛ wa nãlã zi 'bɔ mɔ mbali kɔ 'bili tɔanɔ kɛ ngɔ i ni.

¹⁰ Nɛ wa kala zi omɔ bolo, nɛ wa a ma li we, nɛ ma yeke, nɛ wa dolo ma do ohi mɔ bɔa, kɛ ma ɔ nɛ wele ni, nɛ sala 'baka ma boe, nɛ wa nãlã mɔ mbali tɛ nɛ. Nɛ wa a ma dɛ fala kɛ ma santo wena ni.

^11-13 Nɛ wa a ohi mɛnɔ bɔa ni, dɛ li ngbɛ ɛ. Nɛ ozu ma siki dɛ nu tɔa Tɛmpɛlo. Hi mɔ kpo kpo zi do sala 'baka ɛ bɔa, nɛ 'da du nɛ mɛ a mɛtrɛ bɔa do dɔ nɛ. Mbe sala 'baka ma kpo tua tɛ dɛlɛ tɔa, nɛ kɛ bɔa ma to nu sala 'baka mbee hi mɛ ni. Nɛ 'da du sala 'baka ma do nalɛ nɛ zi a mɛtrɛ 'bu.

¹⁴ Nɛ wa fulu zi tulu linɛ kɛ ma ɔ bɛndɛ bɛndɛ ni do ku'bu kɔ tɔa. Mɛ zi a tulu linɛ kɛ ma ɔ yoo, do fila nɛ, do kɛ ma fila kpangbangba ni. Nɛ wa gɛ̀zɛ ohi mɛnɔ ni dɛ se'de.

Wa dula bɛlɛduma tũ mɔ bolo bɔa

¹⁵ Nɛ wa dula bɛlɛduma bɔa, nɛ 'da ngala nɛ mɛ a mɛtrɛ 'bu ngɔ nɛ sambo, we zĩ ma nu tɔa Tɛmpɛloe. Nɛ wa dula 'bɔ mɔ ɔ nɛ ndasa ni bɔa, nɛ wa gu ma dɛ zu bɛlɛdumanɔ ni. Nɛ 'da ngala ndasa kpo kpo a mɛtrɛ bɔa do dɔ nɛ.

¹⁶ Nɛ wa gɛzɛ fɛlɛ dɔkpɔ, kɛ wa kasa dɛ tɛ 'bɛ̃lɛ̃ zu obɛlɛdumanɔ ni. Dɛ 'do nɛ, nɛ wa gɛzɛ 'bɔ lɔnggɔ fɛlɛ wala te grɛnadɛ kama kpo, nɛ wa kasa ma dɛ gɛlɛ bɛlɛdumanɔ ni.

¹⁷ Nɛ wa kala obɛlɛdumanɔ ni, nɛ wa zĩ ma dɛ nu tɔa Tɛmpɛlo ni. Wa zĩ mbe kpo tɛ ngɔ ngawili kɔ̃, nɛ mbe kpo tɛ ngɔ gale. Nɛ wa sa li kɛ ngɔ ngawili kɔ na Yakinɛ, gulu nɛ na: “Gale a wi hã nganda.” Nɛ wa sa li kɛ ngɔ gale na Boazɛ, gulu nɛ na: “Ngawi yolo 'da Gale.”