2 Sakonɔ 22 - WE NU GALE 1995

Ahazia hɔa nwa ngɔ nù Yuda

¹ Owi Yeruzalɛmɛ wa saka zi Ahazia na, a dungu nwa olo baa a Yoramɛ. Ahazia zi a be 'do sanga obenɔ 'da Yoramɛ. Mba gɔ, Oarabɛnɔ wa gbɛa zi okpasa wi ti a vɛ̃, 'da fala wa lia tɛ kɔ ngbo 'da osoda Yuda we bi wa ni. Ma hã Ahazia hɔa nwa ngɔ nù Yuda ni.

^2-3 Ahazia hɔa nwa, nɛ nde a do 'bu sabɛlɛ bɔa. Nɛ a dɛa to nwa 'da a tɛ Yeruzalɛmɛ 'do sabɛlɛ kpo. Lì naa a a Atali, nɛ a a be 'da nwa Akabɛ, nɛ a 'bɔ a be yaa Omri, nwa ngɔ nù Israɛlɛ. Ahazia dɛa zi 'bɔ 'dã mɔ ɔ nɛ kɛ 'da nu fɛlɛ nwa Akabɛ ni. Mba gɔ, naa a Atali sɔ̃ɛ zi a do o'dã mbula.

⁴ A dɛa mɔ kɛ ma dè tɛ nwa gɔ ni, kpasaa ɔ nɛ kɛ 'da obe zã Akabɛ ni. We kɛ 'do fie 'da baa a, nɛ mbe obe zã Akabɛ wa hɔa Owi tɔ̃ mbula hã a, nɛ mbula ni 'danga dɛa to nwa 'da a.

⁵ We duzu mbula 'da obenɔ 'da Akabɛ ni, nɛ a Ahazia mba zi do Yoramɛ, nwa ngɔ nù Israɛlɛ, nɛ wa nɛ we bi Hazaɛlɛ, nwa ngɔ nù Siri. Wa nɛa, nɛ wa kpa ngba wa do Hazaɛlɛ tɛ mbe fala kpo, wa sa li nɛ na Ramɔtɛ, tɛ ngɔ nù Galadɛ, nɛ wa bi dɛ di ni. Nɛ li bole ni, nɛ osoda Siri wa e dani tɛ nwa Yoramɛ.

⁶ Nɛ Yoramɛ yolo di ni, nɛ a si dɛ kɔ le Yizreɛlɛ, takɔ wa a daninɔ tɛ̃ a ni. Na Ahazia nɛa 'dɔkɔlɔ a, we zɔ dani tɛ̃ a ni.

⁷ Ahazia hɔa 'do Yoramɛ i, nɛ Gale 'dafa na, do wala tɛa 'da a we zɔ Yoramɛ, nɛ dɛa to nwa 'da a ma e. Mba gɔ, 'da fala kɛ Ahazia hɔa i mɔ ni, nɛ wa do Yoramɛ wa kpa ngba wa do Yehu, be 'da Nimki. Ĩ na, NWA saka zi Yehu, takɔ a kumu nu fɛlɛ Akabɛ.

⁸ Yehu nɛa we kpa ngba a do ogã wi ngɔ nù Yuda, do oyamba Ahazia, kɛ wa vɛ̃ a Owi dɛa tonɔ 'da nwa ni, nɛ a gbɛ wa. Na mɛ ni, nɛ Yehu dɛa ɔ nɛ kɛ Gale 'bili we kumu do nu fɛlɛ Akabɛ ni.

⁹ 'Do nɛ, nɛ a ba nu a na, wa fa Ahazia. Wa fa a, nɛ wa kpa a tɛ le Samaria, nɛ nde a usu tɛ̃ a i mɔ, nɛ wa ba a, nɛ wa nɛ do a hã Yehu, nɛ wa gbɛ a. Gɛnɛ kɔ ní, nɛ nde wa mi a, we kɛ wa tɔ̃a zi na, a a be zã Yozafatɛ, nwa kɛ a fa zi do kɔ sila a vɛ̃ we dɛ mbula 'da NWA Gale ni. Nɛ fo zi wele kɔ nu fɛlɛ Ahazia na, a wia we dɛ to nwa olo a ni bina.

Atali ba to nwa

¹⁰ 'Da fala kɛ Atali, naa nwa Ahazia nɛa we zele na, be 'da a fia ni, nɛ a ba nu a na, wa gbɛ obe zã nwa ngɔ nù Yuda vɛ̃ do'do.

¹¹ Nɛ do ngba soe gbɛ winɔ ni, nɛ Yoseba, wuke 'da nganga Yoyada zɔ na mɛ ni, nɛ a ba Yoasi, be 'da nwa Ahazia do ti tũ nɛ, nɛ a usu a kɔ mbe 'bili tɔa ɔi kɔ Tɛmpɛloe. Yoseba a a be 'da Yoramɛ, nwa ngɔ nù Yuda, nɛ a 'bɔ a boko nya Ahazia. A usu Yoasi fala nɛ kpo do mbe wuko we dala a na, dɔ Atali gbɛ́ a gɔ.

¹² Nɛ Yoseba usu be ni dɛ kɔ Tɛmpɛloe 'da NWA gbaa 'do sabɛlɛ gazɛlɛ, do 'da kɛ Atali dungu zi nwa ngɔ nùi ni.