2 Sakonɔ 21 - WE NU GALE 1995

¹ 'Da fala kɛ Yozafatɛ fia, nɛ wa mi a ngɔ mabi'donggo 'da nu fɛlɛ wa tɛ kɔ Gba Ngbo nwa 'da Davidi. Nɛ be 'da a Yoramɛ dungu nwa olo a.

Yoramɛ hɔa nwa ngɔ nù Yuda

² Yoramɛ be 'da Yozafatɛ, nwa ngɔ nù Yuda zi do obulu nya a gazɛlɛ: wi zi a Azaria, Yehiɛlɛ, Zakaria, Azariahu, Mikaɛlɛ do Sɛfatia.

³ Baa wa Yozafatɛ hã zi fɛ̃a mɔ bolo dɔ wena, do mɔ mbali, do gele okpamɔ hã wa. Nɛ a a wa kpo kpo ngɔ lenɔ kɛ gba ngbonɔ zĩ ma takpa tɛ ngɔ nù Yuda ni. Nɛ wi kɛ a saka zi a na, a dungu nwa olo a, wi a Yoramɛ, we kɛ a zi a kuti be.

⁴ 'Da fala kɛ a ba to nwa olo baa a ni, nɛ a dɛa na, to nwa 'da a ma nganda. Nɛ a ba nu a na, wa gbɛ onya a vɛ̃, mba do mbe owi ti nu a kɛ wa ngɔ nùi ni.

⁵ Yoramɛ nɛa we hɔ nwa, nɛ nde a do 'bu sabɛlɛ talɛ ngɔ nɛ bɔa. Nɛ a dɛa to nwa 'da a tɛ Yeruzalɛmɛ 'do sabɛlɛ ngbɛ'dɛ'dɛ.

⁶ Nɛ a dɛa zi mɔ tɛ̃ ɛ 'danga kpasaa ɔ nɛ Onwanɔ tɛ Israɛlɛ ni. Nɛ a dɛa 'bɔ 'dã mɔ ɔ nɛ kɛ nu fɛlɛ nwa Akabɛ dɛa zi ni, we kɛ a ba zi be zɔnga be 'da Akabɛ do kɛnɛ a. A dɛa mɔ tɛ̃ a dè tɛ nwa gɔ.

⁷ Gɛnɛ kɔ ni, nɛ nde nwa kɔ̃ zi we kumu nu fɛlɛ nwa kɔ̃ obe zã Davidi gɔ, we duzu gba tɔkɛ kɛ a gba zi do a ni. Mba gɔ, nwa kpua zi mbulu hã Davidi na, obe zã a wa dɛ sɛ to nwa tɛ Yeruzalɛmɛ fai.

⁸ Ma hɔa 'da fala dɛa to nwa 'da Yoramɛ, nɛ Oedɔmɛ wa dɛ nga zu, nɛ wa bɛ̃ na, lo ɔ̀ ti mbula 'da Oyuda gɔ. Nɛ wa saka nwa mɔ́ wa ngboo.

⁹ Yoramɛ nɛa we zele we nɛ, nɛ a kulu ngɔ, nɛ a kala ogã wi ngɔ sodanɔ 'da a do ongilingili bolonɔ 'da a vɛ̃, nɛ a la do ma ngɔ nù Edɔmɛ i. Wa nɛa we hɔ i mɔ, nɛ Oedɔmɛ wa linggi a. Kɔ ma hɔa gbogbo zã tũi, nɛ nwa Yoramɛ do ogã wi ba ngilingilinɔ, wa la do sanga Oedɔmɛ kɛ wa linggi wa ni do ngawi, nɛ wa hɔ nza sanga wa.

¹⁰ Ndo do ngba soe ni, Oedɔmɛ wa 'bànà zi 'bɔ ti mbula 'da Oyuda gɔ. Nɛ do kpo 'da fala ni, nɛ owi Libna wa dɛa 'bɔ nga zu, nɛ wa bɛ̃ we ɔ ti mbula 'da Yoramɛ, we kɛ a la fala dɛ mbula 'da NWA Gale 'da oyaa a do'do.

¹¹ Yoramɛ 'dafa fala we sambala do ogele galenɔ tɛ ngɔ kalanɔ ngɔ nù Yuda. Nɛ do wala ni, nɛ a dɛa na, owi Yeruzalɛmɛ do Oyuda wa bɛ̃ we dɛ mbula nu Gale.

¹² Mbe ngba soe kpo, nɛ Yoramɛ kpa mbɛti mɔ́ Elia, wi gba olo nu Gale. Kɔ mbɛti ni wa tɔ́a na: “Nɛ zélé we kɛ NWA Gale 'da yaa nɛ Davidi tɔ̃ gɛ: Mɔ dɛ̀ mɔ tɛ mɔ ɔ nɛ kɛ 'da baa mɔ Yozafatɛ, do yaa mɔ Asa, kɛ wa zi a nwa ngɔ nù Yuda ni gɔ.

¹³ Ĩ na, mɔ ba tɛlɛ tɛ dɛa mɔ tɛ Onwanɔ ngɔ nù Israɛlɛ. Nɛ mɔ dɛa na, owi Yeruzalɛmɛ do Oyuda wa siki li wa dɛ tɛ ogale bɛlɛnɔ, ɔ nɛ kɛ nu fɛlɛ Akabɛ wa dɛ ni. Nɛ mɔ gbɛa 'bɔ onya mɔ ngboo, kɛ wa zi do dĩ la mɔ ni.

¹⁴ Gulu nɛ a NWA a hã sɛ gã etumbu hã owinɔ 'da mɔ, do obenɔ 'da mɔ, do owukonɔ 'da mɔ, nɛ a 'danga sɛ mɛnɔ 'da mɔ vɛ̃.

¹⁵ Nɛ zɛlɛ kpi do kpi ma ba sɛ mɔ. Nɛ mbe ko zɛlɛnɔ ni, ma nyɔngɔ sɛ mɔ nyɔnga gbaa na, kala zã mɔ gbala sɛ nɛ de.”

¹⁶ Do ngba soe ni, nɛ NWA dɛa na Ofilisti do Oarabɛnɔ, kɛ le 'da wa kɛ zã nù Etiopi ni, wa bi Yoramɛ.

¹⁷ Wa nɛa, nɛ wa bi nù Yuda, nɛ wa le kɔ nɛ, nɛ wa kala mɛnɔ kɛ ma ko tɔa nwa ni vɛ̃. Nɛ wa kala obenɔ do owukonɔ 'da nwa Yoramɛ, nɛ wa si do wa. Nɛ wi wa bà zi a sanga obulu benɔ 'da a gɔ kpo a Ahazia, kɛ a a be 'do sanga obenɔ ni.

¹⁸ 'Do mɛnɔ ni vɛ̃, nɛ NWA hã 'bɔ zɛlɛ kɛ ma é gɔ ni hã Yoramɛ si kɔ kala zã a.

¹⁹ Ma nɛa we ɔ sabɛlɛ bɔa, nɛ ngawi 'da zɛlɛ ma zu'du zã a, nɛ kala zã a ma hɔ dɛ nza, nɛ a fia do nga zɛlɛ ni. Nɛ 'da fala fai, owinɔ 'da a wa dà zi gã we we dɔ fũ yɔmbɔ hã a, ɔ nɛ kɛ wa dɛ zi hã oyaa a ni gɔ.

²⁰ Yoramɛ hɔa zi nwa, nɛ nde a do 'bu sabɛlɛ talɛ ngɔ nɛ bɔa. Nɛ a dɛa to nwa 'da a tɛ Yeruzalɛmɛ 'do sabɛlɛ ngbɛ'dɛ'dɛ. A fia, nɛ wele kpo dɛ̃ mbe 'bako a gɔ. Wa mi zi a tɛ kɔ Gba Ngbo nwa 'da Davidi, nɛ nde wa mì a ngɔ mabi'donggo 'da Onwanɔ gɔ.