2 Sakonɔ 2 - WE NU GALE 1995

Salɔmɔ 'dafa we dɛ tɔa Tɛmpɛlo

¹ Nwa Salɔmɔ 'bili zi do kɔ sila e we dɛ tɔa Tɛmpɛlo hã NWA, do dɛ 'bɔ tɔa nwa we a ngboo. Nɛ a kɔma li Owele koto 'bu wa sambo we kala tole, nɛ Owele koto 'bu wa ngbɛ'dɛ'dɛ we sɛ ta ngɔ kala i. Nɛ ogã wi zɔ mɔ tɛ owinɔ wa dɛ toe ni zi a Owele koto talɛ do kama gazɛlɛ,

² Nɛ Salɔmɔ tumba to hã Hiramɛ, nwa kɔ le Tirɛ na: “Mɔ dɛ́ do mi, ɔ nɛ kɛ mɔ dɛa zi do baa mi nwa Davidi ni. Mɔ hã zi ote sɛdrɛ hã a na, a dɛ do tɔa nwa 'da a ngboo ni.

³ Mba gɔ, mi nɛ dɛ do tɔa Tɛmpɛlo we hã dɔ̃lɔ̃ li hã NWA Gale 'da mi. Tɔa ni sɛ a fala dɔnggɔ do a. Nɛ wa dɔ sɛ dɔnggamɔ fũ yɔmbɔ hã a kɔ tɔa ni, nɛ zɛ̃ nɛ ma kpe sɛ kɔ nɛ. Nɛ omapa kɛ ma santo, we hã ma hã NWA Gale ni, ma zɔ́lɔ́ sɛ di ni gɔ. Nɛ wa dɔ sɛ sa'de we dɔnggɔ do Gale, titole do gɛ̃a wese. Nɛ wa dɛ sɛ 'bɔ ni do kɔ̃ tũ kpe tɛ wi, do kuti tũ kɔ zɛkɛ kpo kpo, do mbe gele otũ ɛngganɔ we dɔnggɔ NWA Gale 'da lɛ. Ki ni mɛ a mbula kɛ obe Israɛlɛ wa dɛ sɛ ma fai.

⁴ Nɛ Tɛmpɛloe kɛ mi nɛ dɛ ma ni, ma gã sɛ wena, we kɛ Gale 'da lɛ gã nɛa ngɔ ogele galenɔ vɛ̃.

⁵ Wele wè tɛ dɛ tɔa hã a gɔ, we kɛ gɛnɛ kɔ li nza gã wena ni, nɛ nde a wè tɛ ɔ ngɔ nɛ, nɛ ma we gɔ. Mi 'bɔ ngboo ni, mi dɔ̀nggɔ̀ tɛ mi na, mi wia tɛ dɛ tɔa ɔi hã a gɔ. Nɛ nde mi nɛ dɛ tati a fala sambala we hã do dɔnggamɔ hã a iko.

⁶ “Kɔ mi kɔ̃a na, mɔ tombo wele kɛ a ĩ ti dɛa to mɔ mbali, do fɛ̃a mɔ bolo, do tũ mɔ bolo do mɔ bolo ni hã mi. Nɛ a ĩ 'bɔ ti 'dafa tulunɔ kɛ wa gɛzɛ do fila nɛ, do kɛ ma fila kpangbangba, tabi kɛ ma a yoo ni. A ɔ 'bɔ do wi kɛ a ĩ ti gɛzɛ mɔ gɛza, nɛ a dɛ sɛ toe do owinɔ 'da mi, kɛ wa ĩ ti dɛ to wena ni. Baa mi Davidi saka zi winɔ ni hã mi, nɛ wa ɔ tɛ Yeruzalɛmɛ, do tɛ ogele falanɔ tɛ ngɔ nù Yuda.

⁷ Mi ĩ na, owi tonɔ 'da mɔ wa ĩ ti dɛ to 'bili ote sɛdrɛnɔ tɛ Libanɛ wena. Kɔ mɔ tombo 'bɔ te sɛdrɛ, do te mafuku, do te santalɛ, kɛ ma yula tɛ ngɔ kala Libanɛ ni hã mi. Nɛ owi tonɔ 'da mi, wa nɛ sɛ we gala owinɔ 'da mɔ,

⁸ takɔ wa ngɛmɛ mbɔkɔ ogili tenɔ hã mi. We kɛ tɔa Tɛmpɛloe kɛ mi nɛ dɛ ma ni, ma gã sɛ wena.

⁹ Nɛ nde mi hã sɛ nyɔngɔmɔ hã Owi dɛa to 'bili tenɔ 'da mɔ. Mi hã sɛ fũ ble tɔnɛ koto gazɛlɛ, do kpalɛ ɔrzɛ tɔnɛ koto gazɛlɛ, do dɔ̃ litrɛ koto kama ngbɛ'dɛ'dɛ, do nɔ litrɛ koto kama ngbɛ'dɛ'dɛ hã wa.”

¹⁰ Nɛ Hiramɛ, nwa kɔ le Tirɛ kɔma mbɛti we gese hã Salɔmɔ na: “Gale ia mɔ do nwa, we kɛ a kɔ̃a gɛnɛ owinɔ 'da a.

¹¹ Mi hã iɔ̃nae hã NWA Gale 'da obe Israɛlɛ, kɛ a dɛa li nza do nùi gɛ, we kɛ a hã bulu be kɛ a dunu do hã zã, do ĩ ti gɔnɔ sanga mɔ hã nwa Davidi. Be ni wia we dɛ tɔa Tɛmpɛlo hã nwa, do tɔa nwa we a wele nɛ ngboo.

¹² Kɔ mi tombo sɛ Huramɛ-Abi, kɛ a ĩ ti to wena ni hã mɔ.

¹³ Baa a a wi le Tirɛ, nɛ naa a, a wi nu kpala Danɛ. Nɛ a ĩ ti dɛa to mɔ mbali, fɛ̃a mɔ bolo, tũ mɔ bolo, mɔ bolo, ota, do ote. Nɛ a ĩ ti 'dafa tulunɔ kɛ wa gɛzɛ do fila nɛ, do kɛ ma a yoo, tabi ma fila kpangbangba ni, do tulu linɛ kɛ ma ɔ bɛndɛ bɛndɛ ni. Nɛ a ĩ 'bɔ ti dɛa to gɛzɛ mɔ, nɛ a dɛ sɛ mɛnɔ vɛ̃ kɛ wa hã sɛ hã a na, a dɛ ni. Nɛ a dɛ sɛ toe fala nɛ kpo do owinɔ 'da mɔ kɛ wa ĩ ti dɛ to nɛ ge nde ni, do owanɔ kɛ baa mɔ, nwa Davidi saka zi wa ni.

¹⁴ “Kɔ we duzu mɔ nwa, mɔ tómbó ble do ɔrzɛ, do nɔɛ do dɔ̃ɛ kɛ mɔ tɔ̃a we nɛ ni hã mi.

¹⁵ Lɛ nɛ sɛ tɛ ngɔ kala Libanɛ, nɛ lɛ 'bili otenɔ vɛ̃ kɛ mɔ kɔ̃a gɛnɛ nɛ ni. Nɛ lɛ ɛnzɛ sɛ ma dɛ tɛ ngba ɛ ɔ nɛ gbayala ni, takɔ ma la do ngɔ lì gɛ gbaa we hɔ tɛ kɔ le Yafa, sɛ nɛ yolo dɛ di ni, mɔ yɔnggɔ ma dɛ Yeruzalɛmɛ i de.”

Salɔmɔ ndua dɛ tɔa Tɛmpɛloe

¹⁶ Nwa Salɔmɔ ba nu ɛ, nɛ wa kɔma li Owi wilinɔ kɛ wa a ogele wi, nɛ wa ɔ tɛ ngɔ nù Israɛlɛ ni vɛ̃, ɔ nɛ kɛ baa a Davidi dɛa zi ni. Nɛ a kpa Owele koto kama, do 'bu wa mɔlɔ ngɔ wa talɛ do kama gazɛlɛ (153.600).

¹⁷ Nɛ a saka Owele koto 'bu wa sambo, we kala tolenɔ, nɛ Owele koto 'bu wa ngbɛ'dɛ'dɛ, we sɛ tanɔ tɛ ngɔ kala i, nɛ Owele koto talɛ do kama gazɛlɛ, ɔ nɛ ogã wi zɔ mɔ tɛ owi dɛa tonɔ ni vɛ̃.