2 Sakonɔ 16 - WE NU GALE 1995

Asa bi bolo do Basa nwa ngɔ nù Israɛlɛ

¹ 'Da fala kɛ Asa ɔa tɛ to nwa 'da a 'bu sabɛlɛ talɛ ngɔ nɛ gazɛlɛ, nɛ mbe ngba soe kpo, he Basa, nwa ngɔ nù Israɛlɛ nɛa, nɛ a bi Owi ngɔ nù Yuda, nɛ a ba le Rama. Nɛ a ndo zĩ ngbo dɛ 'do ma na, da dɛ kɔ Asa do obe Yuda wa yolo ngɔ nù 'da wa i, kɔ wa lé di ni go.

² Kɔ Asa nɛa we zɔ ni, nɛ a kala mbe ofɛ̃a mɔ bolonɔ, do mɔ mbalinɔ, kɛ ma 'bana kɔ tɔa Tɛmpɛloe do kɔ tɔa nwa ni, nɛ a tombo ma tɛ Damasi, we hã ma hã Bɛnɛ-Hadadɛ, nwa ngɔ nù Siri. Nɛ a tombo 'bɔ to hã a na:

³ “Mɔ kɔ̃, nɛ lɛ dɛ na do mɔ, nɛ lɛ gba tɔkɔ sanga tɛ ngba lɛ, ɔ nɛ kɛ obaa lɛ wa dɛa zi ni. Gulu nɛ hã mi 'dɔlɔ fɛ̃a mɔ bole, do mɔ mbali gɛ hã mɔ ni. Kɔ mɔ nɛ, hã mɔ 'dángá gba tɔkɛ 'da mɔ do Basa, nwa ngɔ nù Israɛlɛ do'do, sɛ a a fua osodanɔ 'da a ngɔ nùi 'da mi de.”

⁴ Nɛ nwa Bɛnɛ-Hadadɛ kɔ̃a gɛnɛ linggamɛ 'da Asa, nɛ a tombo ogã wi ngɔ sodanɔ 'da a we bi lenɔ tɛ Israɛlɛ i. Wa nɛa, nɛ wa bi, nɛ wa kala lenɔ gɛ: Yoni, Danɛ, Abɛlɛ-Maimɛ, mba do lenɔ ngɔ nù Nɛftali vɛ̃, kɛ wa usu mɛnɔ kɔ nɛ ni.

⁵ 'Da fala kɛ Basa nɛa we zele sakoe ni, nɛ a la fala zĩ ngboe 'do le Rama.

⁶ Nɛ nwa Asa sa mɔ hã Owi ngɔ nù Yuda vɛ̃, nɛ a ba nu a hã wa na, wa kala otanɔ, do ogã ma'bayanɔ, kɛ Basa ngɛmɛ zi li nɛ we zĩ do ngboe 'do le Rama ni, hã wa zĩ do ongbo 'do le Geba do Mispa.

Hanani wi gba olo nu Gale

⁷ Do ngba soe ni, nɛ Hanani, wi gba olo nu Gale nɛa, nɛ a kpa nwa Asa, nɛ a tɔ̃ hã a na: “Mɔ gbìnì zã mɔ do NWA Gale 'da mɔ na, a gbaka mɔ gɔ, nɛ nde mɔ gbìnì zã mɔ do nwa ngɔ nù Siri. Ma kɛ osodanɔ 'da nwa ngɔ nù Israɛlɛ wa yu ti kɔ̃ mɔ.

⁸ Owi Etiopi do Libi wa zi do onga soda, do ongilingili dɛlɛ wena, do owi kũ mbalata. Nɛ wa tɛa zi we bi mɔ, nɛ we duzu kɛ mɔ gbini zã mɔ do nwa ni, nɛ a dɛa na mɔ nɛ ngɔ wa.

⁹ Mba gɔ, nwa ka mɔ, nɛ a zɔ mɛnɔ ngɔ nù gɛ vɛ̃, takɔ a gbaka owinɔ kɛ wa kɔ̃a gɛnɛ a do sila wa vɛ̃ ni. Nɛ nde sɔɛ gɛ, mɔ dɛa mɔ tɛ mɔ ɔ nɛ yia wi ni. Kɔ 'do gɛ, nɛ bolo ma bi sɛ mɔ.”

¹⁰ Asa nɛa we zele ni, nɛ zã a nɔ̃lɔ̃ dɛ tɛ wi gba olo nu Gale. Nɛ a ba a, nɛ a fi a bɔlɔkɔ. Nɛ do kpo soe ni, nɛ nwa Asa ma ngɔ zɛlɛ tɛ ombe wi kɔ lenɔ.

Sɔkpɔ dɛa to nwa 'da Asa

¹¹ Mɛnɔ vɛ̃ kɛ nwa Asa dɛa zi ndo do nyanga nɛ gbaa we hɔ Sɔkpɔ nɛ ni, wa kɔma ma kɔ 'buki li nɛ a “Dɛa tonɔ 'da onwa ngɔ nù Yuda do Israɛlɛ.”

¹² Nɛ ma hɔa kɔ 'bu sabɛlɛ talɛ ngɔ nɛ kusi kɔ dɛa to nwa 'da Asa, nɛ nga zɛlɛ kala nyanga a. Nɛ takɔ a gbini zã a do NWA nde, nɛ a nɛ 'da owi dɛ ina na, wa zɔ zɛlɛ 'da a.

¹³ Kɔ ma nɛa we hɔ tɛ 'bu sabɛlɛ nalɛ ngɔ nɛ kpo kɔ dɛa to nwa 'da a, nɛ a fe.

¹⁴ Nɛ wa mi a kɔ mbe kpo kɔ zununɔ kɛ a zã zi ma tɛ kɔ Gba Ngbo Nwa 'da Davidi ni. Nɛ wa ia wɔlɔ a tɛ fala kɛ wa a nɔ yɔmbɔnɔ kpi do kpi se'de ni, nɛ wa dã gã we, nɛ wa dɔ mbe fũ yɔmbɔnɔ ni we be dɔ̃lɔ̃ li 'da a.