2 Sakonɔ 13 - WE NU GALE 1995

Dɛa to nwa 'da Abia

¹ 'Da fala kɛ Yeroboamɛ dɛa sabɛlɛ 'bu ngɔ nɛ ngbɛ'dɛ'dɛ kɔ to nwa 'da a tɛ ngɔ nù Israɛlɛ, nɛ Abia hɔ nwa ngɔ nù Yuda.

² Nɛ a dɛa to nwa sabɛlɛ talɛ tɛ Yeruzalɛmɛ. Li naa a zi a Mikaya, be 'da Uriɛlɛ, wi Gibea. Do 'da fala ni, nɛ Abia do Yeroboamɛ wa bi zi bolo.

³ Nɛ Abia kala nga osoda bolo koto kama nalɛ we bi do Yeroboamɛ. Nɛ Yeroboamɛ kala tɛ mɛ 'bɔ nga osoda koto kama ngbɛ'dɛ'dɛ we bi do Abia.

⁴ Abia nɛa, nɛ a kũ dɛ zu kala Sɛmaraimɛ, kɛ ma ngɔ kalanɔ tɛ ngɔ nù Efraimɛ ni, nɛ a zɛ nu a hã Yeroboamɛ do obe Israɛlɛ na: “Nɛ zélé mi sɛ!

⁵ Nɛ ĩ na, NWA Gale 'da obe Israɛlɛ kpua zi mbulu hã Davidi do obe zã a na, a hã sɛ nù Israɛlɛ hã wa do mɔ́ wa fai. Nɛ mbuli ni, a 'dángá sɛ ma fala kpo gɔ.

⁶ Ĩ na Yeroboamɛ, be 'da Nɛbatɛ, kɛ a zi a wi dɛa toe 'da Salɔmɔ be 'da Davidi ni, a dɛa zi nga zu hã nwa 'da a.

⁷ Nɛ a kala Owele kɛ gbãlã zã wa bina ni, nɛ a mba do wa, nɛ wa bi Roboamɛ, be 'da Salɔmɔ, kɛ a 'bana zagbãlã iko, nɛ li a tɛ ĩ̀ mɔ gɔ ni, nɛ wa nɛ ngɔ a.

⁸ Kɔ di dɔ̃ ni, nɛ kɔ̃a we bɛ̃ to nwa kɛ NWA Gale hã ma hã obe zã Davidi ni. Do gbãlã we, nɛ kala gba gili osoda, nɛ nɛ ba 'bɔ kpikima ngɔmbɛ kɛ Yeroboamɛ dɛa ma do mɔ mbali ni, takɔ ma ɔ nɛ gale 'da nɛ.

⁹ Nɛ nɛ ndaka obe zã Aroni kɛ wa a onganganɔ 'da NWA ni, mba do levitɛnɔ, nɛ nɛ saka mbé onganga ɔ nɛ kɛ owi kɔ gele lenɔ wa saka ni. Nɛ fala kɛ wele kpo kɔ̃ we hɔ nganga nde, nɛ a tɛ do ngɔmbɔ tabi obata sambo, takɔ nɛ e a do nganga we dɛ to 'da ogale bɛlɛnɔ 'da nɛ.

¹⁰ “Nɛ nde we duzu lɛ, Gale 'da lɛ wi a NWA, nɛ lɛ bɛ gɛnɛ a gɔ. Nɛ onganganɔ kɛ wa dɛ toe 'da NWA ni a obe zã Aroni. Nɛ olevitɛnɔ wa tɛ dɛ tonɔ 'da wa sanga lɛ.

¹¹ Titole do gɛ̃a wese, nɛ wa dɔ sa'de mba do fũ yɔmbɔ we dɔnggɔ do NWA. Nɛ wa a omapanɔ wa hã ma hã NWA ni dɛ ngɔ mɛsa santoe 'da a. Nɛ do gɛ̃a wese kpo kpo, nɛ wa tũ omwindanɔ kɛ wa dɛa mɔ a do ma do mɔ mbali ni. Ma bia na, lɛ dɛ toe 'da NWA do dia nɛ vɛ̃. Nɛ nde kɛ 'da nɛ, nɛ bɛ̃a gɛnɛ ngbongbo Gale.

¹² Kɔ ngangga ni, NWA ngboo a a kpia dati lɛ, nɛ onganganɔ 'da a wa kɔ lɛ gɛ boe. Wa 'bɔ we dama mɔtũlũ, takɔ winɔ wa ga zuma sɔ̃ bolo hã nɛ. Aa nɛ, Oisraɛlɛ, nɛ tɛ bì bolo do NWA Gale 'da oyaa nɛ gɔ. We kɛ nɛ nɛ́ sɛ ngɔ a gɔ.”

¹³ Nɛ do ngba soe ni, nɛ Yeroboamɛ tumba mbe ngɔ gili osodanɔ 'da a, nɛ wa usu tɛ wa do 'do osoda Yuda vɛ̃, nɛ wa e wa dɛ gbogbo.

¹⁴ Osoda Yuda wa siki li wa, nɛ wa zɔ na osodanɔ 'da Yeroboamɛ wa 'do wa gɛ boe, nɛ wa ala nu wa hã nwa na a gbaka wa, nɛ onganganɔ wa dama mɔtũlũ.

¹⁵ Nɛ osoda Yuda wa he mɔ, nɛ Abia kpe dati wa we bi bole. Nɛ dɔ̃, nɛ NWA ndaka osodanɔ 'da Yeroboamɛ dati osodanɔ 'da Abia.

¹⁶ Osoda Israɛlɛ wa tia dɛnggɛ, nɛ NWA ia wa dɛ kɔ̃ osoda Yuda.

¹⁷ Nɛ Abia do osodanɔ 'da a wa nɛa ngɔ osoda Israɛlɛ, nɛ wa gbɛa nga sodanɔ 'da wa koto kama mɔlɔ.

¹⁸ Nɛ do ngba soe ni, nɛ Oisraɛlɛ wa kpa sape, nɛ osoda Yuda wa nɛa ngɔ wa, we kɛ wa gbini zã wa do NWA Gale 'da oyaa wa.

¹⁹ Abia ndaka 'do sodanɔ 'da Yeroboamɛ, nɛ a kala mbe olenɔ gɛ: Betɛlɛ, Yɛkana do Efroni, mba do be lenɔ kɛ zã nɛ ni.

²⁰ Do ngba soe to nwa 'da Abia, nɛ nde Yeroboamɛ zi 'bɔ do ngawi nɛ kuti kɛ zi dati ni bina. Nɛ 'do nɛ, nɛ NWA dɛa na a fe.

²¹ Nɛ to nwa 'da Abia ma nganda. Abia kala zi owuko 'bu ngɔ wa nalɛ, nɛ a kua obulu be 'bu wa bɔa ngɔ wa bɔa, nɛ oboko be 'bu ngɔ wa gazɛlɛ.

²² Tala mɛnɔ vɛ̃ kɛ Abia dɛa zi ni, wa kɔma kɔ 'buki li nɛ a: “Wenɔ 'da Ido, wi gba olo nu Gale.” Nɛ kɔ 'buki ni, wa tɔ̃a we 'da Abia, do dɛa mɔ tɛ̃ a. A nɛa we fe nɛ, nɛ wa mi a tɛ kɔ Gba Ngbo nwa 'da Davidi. Nɛ be 'da a Asa dungu nwa olo a.