2 Sakonɔ 12 - WE NU GALE 1995

Sisakɛ nwa ngɔ nù Ezipeto bi nù Yuda

¹ 'Da fala kɛ to nwa 'da Roboamɛ nɛa we nganda nɛ ni, nɛ a fala nɛ kpo do owinɔ 'da a, wa bɛ̃ we dɛ mbula nu NWA Gale.

² Nɛ kɔ mɔlɔ sabɛlɛ dɛa to nwa 'da Roboamɛ, nɛ Sisakɛ, nwa ngɔ nù Ezipeto nɛa we bi Yeruzalɛmɛ. NWA Gale hã zi etumbui ni hã wa, tua kɛ wa kɔ̃̀ zi we zele we nu a gɔ.

³ Sisakɛ kala osoda kɛ wa zi do ongilingili bolo ni koto kama bɔa, nɛ owi kũ ombalata 'bu koto gazɛlɛ. Nɛ a kala zi 'bɔ ogba gili osoda kɛ wa yula ngɔ nù Libi, Sukɔtɛ do Etiopi,

⁴ nɛ a bi lenɔ ngɔ nù Yuda, kɛ gba ngbo zĩ ma takpa ni. Nɛ a kala lenɔ ni gbaa dɛ tɛ Yeruzalɛmɛ i.

⁵ Nɛ Sɛmaya, wi gba olo nu Gale nɛa, nɛ a kpa Roboamɛ do ogã winɔ ngɔ nù Yuda, kɛ wa mba ngba wa tɛ Yeruzalɛmɛ ni. Nɛ do ngba soe ni, nɛ nde nwa Sisakɛ zi dɔ̃ɔ dɛ di ni. Nɛ Sɛmaya tɔ̃ hã wa na: “Nɛ zélé we NWA Gale tɔ̃a gɛ! A na: ‘Nɛ bɛ̃a gɛnɛ mi, nɛ mi, mi bɛ̃a tɛ mɛ 'bɔ gɛnɛ nɛ, nɛ mi a nɛ ti mbula 'da Sisakɛ.’ ”

⁶ Nwa Roboamɛ do ogã winɔ 'da a wa nɛa we zele ni, nɛ wa ĩ ti 'dã mɛ 'da wa, nɛ wa tɔ̃ na: “Aa NWA, mɔ tɔ̃a gbãlã we.”

⁷ Kɔ NWA Gale nɛa we zɔ ni, nɛ a tɔ̃ na: “We duzu kɛ nɛ ĩ ti 'dã mɛ 'da nɛ ni, mi gbɛ́ sɛ 'bɔ nɛ gɔ. Nɛ nde 'da fala kɛ Sisakɛ tɛ we bi le Yeruzalɛmɛ, nɛ mi ga sɛ a na, a tɛ 'dàngà le gɔ, we kɛ nɔ̃lɔ̃ zã 'da mi dɛ ngɔ nɛ ma ia.

⁸ Gɛnɛ kɔ ní, nɛ nde mi a sɛ nɛ ti mbula 'da a, sɛ a nɛ ĩ ti gɔnɔ sanga dɛ mbula 'da mi Gale, do dɛ mbulanɔ 'da Onwanɔ ngɔ nù gɛ de.”

⁹ Sisakɛ, nwa ngɔ nù Ezipeto nɛa, nɛ a bi Yeruzalɛmɛ, nɛ a kala omɔ olo gã golenɔ kɔ tɔa Tɛmpɛloe 'da nwa, mba do kɛnɔ kɔ tɔa nwa ni vɛ̃. Nɛ a kala 'bɔ ongelenɔ kɛ Salɔmɔ dɛa zi ma do mɔ mbali ni, nɛ a là mɔ kpo gɔ.

¹⁰ Nɛ Roboamɛ dula Ongele tũ mɔ bolo we duzu a dɛ olo ki ni, nɛ a hã ma hã sodanɔ kɛ wa zɔ mɔ tɛ nu tɔanɔ 'da a ni.

¹¹ Na mɛ ni, 'da falanɔ vɛ̃ kɛ Roboamɛ kulu ngɔ we nɛ kɔ tɔa Tɛmpɛlo 'da nwa i, nɛ Owi zɔ mɔ tɛ nu ngbonɔ wa kala ongelenɔ ni dɛ kɔ̃ wa. Kɔ fala kɛ a kpolo tɛ̃ a, nɛ wa gese ma dɛ olo nɛ kɔ 'bili tɔa wa usu do ma ni.

¹² Nɛ nɔ̃lɔ̃ zã 'da nwa dɛ tɛ Roboamɛ ma gbɛsɛ zi, we kɛ a ĩ zi ti 'dã mɛ 'da a. Nɛ dɛ ngɔ nɛ, dia mɔ zi 'bɔ ngɔ nù Yuda boe.

Sɔkpɔ dɛa to nwa 'da Roboamɛ

¹³ Nwa Roboamɛ, kɛ li naa a Nama, boko Amoni, dɛa zi to nwa 'da a tɛ Yeruzalɛmɛ, nɛ ma nganda. A nɛa we dungu nwa, nɛ nde a zi do 'bu sabɛlɛ nalɛ ngɔ nɛ kpo. Nɛ a dɛa to nwa 'da a sabɛlɛ 'bu ngɔ nɛ sambo tɛ Yeruzalɛmɛ. Mba gɔ, mɛ a le kɛ NWA saka zi tɛ ngɔ nù Israɛlɛ vɛ̃, takɔ owinɔ 'da a wa tɛ we dɔnggɔ a dɛ di ni.

¹⁴ Roboamɛ dɛa zi mɔ kɛ ma dè tɛ NWA gɔ ni. A kɔ̃̀ zi we e sila a ngɔ dɛ mbula 'da nwa gɔ.

¹⁵ Tala mɛnɔ vɛ̃ kɛ Roboamɛ dɛa zi yolo do ndo nyanga nɛ, gbaa we hɔ Sɔkpɔ nɛ, do li onu fɛlɛ a vɛ̃ wa kɔma ma kɔ 'bukunɔ kɛ li nɛ a: “Wenɔ 'da Sɛmaya, wi gba olo nu Gale” do “Wenɔ 'da Ido, wi zɔ gulu mɛnɔ.” Roboamɛ bi zi Yeroboamɛ bi fai.

¹⁶ Kɔ Roboamɛ fia, nɛ wa mi a kɔ Gba Ngbo nwa 'da Davidi. Nɛ be 'da a Abia dungu nwa olo a.