2 Sakonɔ 11 - WE NU GALE 1995

Sɛmaya gba olo nu Gale

¹ 'Da fala kɛ Roboamɛ nɛa we hɔ tɛ Yeruzalɛmɛ i, nɛ a mba li onga sodanɔ kɔ nu kpala Yuda do Bɛnzamɛ koto kama do 'bu wa ngbɛ'dɛ'dɛ. Nɛ a ngɛmɛ wa we nɛ we bi Oisraɛlɛ wanɔ si gbãlã ngɔ ni, takɔ a gese 'bɔ wa dɛ ti mbula 'da a.

² Nɛ NWA Gale tumba wila we hã Sɛmaya, wi gba olo nu a.

³ Sɛmaya nɛa, nɛ a tɔ̃ hã nwa Roboamɛ, be 'da Salɔmɔ, mba do obe Israɛlɛ vɛ̃ kɛ wa ɔ ngɔ nù Yuda do Bɛnzamɛ ni na:

⁴ “Nɛ zélé, mi NWA mi tɔ̃a na, da dɛ kɔ nɛ nɛ we bi do kpo kpo onya nɛ, Oisraɛlɛ gɔ. Nɛ vɛ̃ nɛ sí 'do, we kɛ mi a mi 'dafa na, mɛnɔ ma dɛ tɛ̃ ɛ na mɛ ni.” Kɔ wa nɛa we zele ni, nɛ wa dɛa olo nu NWA, nɛ wa si 'do.

Roboamɛ 'dafa ole kpi do kpi

⁵ 'Do kɛ Roboamɛ dɛa fala ɔi 'da a tɛ Yeruzalɛmɛ i ni, nɛ a 'dafa olenɔ ngɔ nù Yuda do Bɛnzamɛ.

⁶ Olenɔ ni a Bɛtleɛmɛ, Etamɛ, Tekoa,

⁷ Bɛtɛ-Surɛ, Soko, Adulamɛ,

⁸ Gatɛ, Mareka, Zifɛ,

⁹ Adoraimɛ, Lakisi, Azeka,

¹⁰ Sora, Ayaloni do Hebroni.

¹¹ Roboamɛ ba zi nu a, nɛ wa zĩ gba ngbo 'do lenɔ ni. Nɛ a a ogã wi ngɔ nɛ, nɛ a usu onyɔngɔmɔ, do nɔ, do dɔ̃ dɛ di ni.

¹² Nɛ kɔ lenɔ ni kpo kpo, a a zi 'bɔ Ongele do osɛlɛ. Nɛ do wala ni, a dɛa zi na, nu kpala Yuda do Bɛnzamɛ, wa 'bana ti mbula 'da a.

Onganganɔ do olevitɛnɔ wa si 'do Roboamɛ

¹³ Onganganɔ do olevitɛnɔ wa yula ngɔ nù Israɛlɛ vɛ̃, nɛ wa si 'do Roboamɛ.

¹⁴ Olevitɛnɔ wa la zi fɔnɔ 'da wa tɛ ngɔ nù Israɛlɛ i, nɛ wa la dɛ ngɔ nù Yuda do kɔ le Yeruzalɛmɛ, we kɛ Yeroboamɛ do obulu benɔ 'da a, wa kɔ̃̀ zi na, wa dɛ to nganga 'da NWA Gale i mɔ gɔ.

¹⁵ Mba gɔ, Yeroboamɛ saka zi Owele, nɛ a a wa do onganga tɛ falanɔ kɛ wa dɔnggɔ do kpikimanɔ, kɛ wa dɛa zi ma ɔ nɛ wili dua, tabi be ngɔmbɔ ni.

¹⁶ Nɛ ombe kɔ nu kpala obe Israɛlɛ, kɛ wa kɔ̃a zi do sila wa we dɔnggɔ NWA Gale ni, wa la zi vɛ̃ do olevitɛnɔ ni, nɛ wa nɛ dɛ Yeruzalɛmɛ i, we hã dɔnggamɔ hã NWA Gale 'da oyaa wa.

¹⁷ Na mɛ ni, nɛ nù Yuda ma kpa ngawi, nɛ to nwa 'da Roboamɛ, be 'da Salɔmɔ ma nganda. Nɛ kɔ sabɛlɛ talɛ, owinɔ wa dungu ɔ nɛ kɛ wa dungu zi ti mbula 'da nwa Davidi do nwa Salɔmɔ ni.

Nu fɛlɛ kula 'da Roboamɛ

¹⁸ Roboamɛ ba Mahalatɛ do wuko 'da a. Baa Mahalatɛ zi a Yɛrimɔtɛ, be 'da Davidi, nɛ li naa Mahalatɛ zi a Abihailɛ, be 'da Eliabɛ, nɛ a 'bɔ a be yaa Yɛse.

¹⁹ Mahalatɛ kua zi obulu be talɛ: Yeusi, Sɛmaria do Zahamɛ.

²⁰ Nɛ 'do ki ni, nɛ Roboamɛ ba 'bɔ Maaka, be 'da Absalɔmɛ do kɛnɛ a. Nɛ a ko obulu be nalɛ hã a: Abia, Atai, Ziza do Sɛlɔmitɛ.

²¹ Roboamɛ kɔ̃a zi gɛnɛ Maaka, be 'da Absalɔmɛ nɛa ngɔ tala owukonɔ 'da a vɛ̃. Ĩ na, owukonɔ 'da a ngboo ni, wa zi 'bu ngɔ wa ngbɛ'dɛ'dɛ, nɛ owuko makangonɔ 'bu wa gazɛlɛ. Nɛ a kua zi do wa vɛ̃ obulu be 'bu wa bɔa ngɔ wa ngbɛ'dɛ'dɛ, nɛ oboko be 'bu wa gazɛlɛ.

²² Roboamɛ ia Abia, be 'da Maaka do gã wi ngɔ onya a kɔ nu fɛlɛ kula vɛ̃. Tua kɛ Roboamɛ lengge zi na, a dungu sɛ nwa olo ɛ.

²³ Roboamɛ dɛa zi mɔ sɔ̃a li, nɛ a kɛ̃a obenɔ 'da a dɛ kɔ lenɔ ngɔ nù Yuda do Bɛnzamɛ, kɛ a zĩ gba ngbonɔ 'do nɛ takpa ni. Nɛ a hã omɔ hã wa dɛlɛ wena, nɛ a kala 'bɔ owuko hã wa dɛlɛ wena.