2 Sakonɔ 10 - WE NU GALE 1995

Obe Israɛlɛ wa mba li ngba wa tɛ Sikɛmɛ

¹ Onu kpala obe Israɛlɛ kɛ wa si gbãlã ngɔ, wa mba zi ngba wa tɛ Sikɛmɛ we e Roboamɛ do nwa. Nɛ Roboamɛ nɛa we nɛ.

² Ki ni, nɛ nde Yeroboamɛ, be 'da Nɛbatɛ 'bana zi ngɔ nù Ezipeto i, we kɛ a yu zi nwa Salɔmɔ, nɛ a usu tɛ̃ a i mɔ. Kɔ a nɛa we zele we mba li ngba wi tɛ Sikɛmɛ i ni, nɛ a yolo Ezipeto i, nɛ a si.

³ A hɔa le, nɛ wa tombo Owele na, wa sa mɔ hã a. A nɛa, nɛ a mba ngba a do onu kpala obe Israɛlɛ vɛ̃ wanɔ si gbãlã ngɔ i ni, nɛ wa nɛ, nɛ wa tɔ̃ hã Roboamɛ na:

⁴ “Baa mɔ dɛ zi lɛ fai ɔ nɛ kɛ lɛ a ongbá ni. Kɔ ngangga ni, fala kɛ mɔ kɔ̃ we fo mbe tɛ dĩ tole zu lɛ, nɛ lɛ dɛ sɛ to hã mɔ.”

⁵ Nɛ Roboamɛ gese hã wa na: “Nɛ sí, kɔ 'do tũ talɛ, nɛ nɛ kpolo tɛ nɛ, sɛ nɛ mi hã gisa nu nɛ hã nɛ de.” Nɛ wa kulu ngɔ, nɛ wa si.

⁶ Olo wa ni, nɛ nwa Roboamɛ nɛ 'da okumunɔ kɛ wa gala zi baa a Salɔmɔ kɔ to nwa 'da a ni na, wa tɔ̃ mbula hã ɛ. Nɛ a aka wa na: “Nɛ lengge na, mi wia we gese hã owinɔ gɛ na ge nde?”

⁷ Nɛ okpasa winɔ wa tɔ̃ hã a na: “Fala kɛ mɔ kɔ̃ we gala owinɔ ni do dia nɛ, nɛ mɔ tɔ̃ olɛnggɛ mbɔkɔ zã wi hã wa, nɛ wa sɛ a owi tonɔ 'da mɔ fai.”

⁸ Nɛ nwa Roboamɛ zɔa lɛnggɛ 'da okumunɔ li a yala iko. Nɛ a nɛ 'da ongba a zagbãlãnɔ, kɛ wa gã zi do a fala nɛ kpo, nɛ wa a owi ti nu a ni,

⁹ nɛ a aka wa na: “Owinɔ gɛ wa aka mi na, mi fo mbe tɛ ngamɛnɔ baa mi hã zi hã wa ni. Kɔ nɛ lengge na, mi wia we gese hã wa na ge nde?”

¹⁰ Nɛ ongba a zagbãlãnɔ wa gese hã a na: “Ɔ nɛ kɛ winɔ ni wa he tɛ wa na, baa mɔ hã zi ngamɔ hã lo, kɔ wa aka mɔ na, mɔ fo mbe tɛ nɛ ni, mɔ gésé hã wa na: Gɛzɛlɛ kɔ̃ ɛ ma gã nɛa ngɔ ngawili kɔ̃ baa ɛ!

¹¹ Baa ɛ hã zi ngamɔ hã wa, nɛ nde ɛ nganda sɛ 'bɔ 'da ngamɛ ni. Nɛ baa ɛ zɛa zi wa do zufa kpaa, nɛ nde ɛ zɛ sɛ wa nganda nɛ ngɔ ki ni.”

¹² Ma hɔa tɛ tũi kɛ talɛ, nɛ Yeroboamɛ do owinɔ vɛ̃, wa tɛ 'da nwa Roboamɛ, ɔ nɛ kɛ a tɔ̃a zi hã wa ni.

¹³ Nɛ Roboamɛ zɔa lɛnggɛ 'da okpasa winɔ li a yala iko. Nɛ a gese we hã winɔ do nga zu, ɔ nɛ kɛ ongba a zagbãlãnɔ wa tɔ̃a hã a ni.

¹⁴ A na: “Baa mi hã zi ngamɔ hã nɛ, nɛ nde mi nganda sɛ 'bɔ 'da ngamɛ ni dɛ dati. Baa mi zɛa zi nɛ do zufa kpaa, nɛ nde mi zɛ sɛ 'bɔ nɛ nganda nɛ ngɔ ki ni.”

¹⁵ Ki ni, mɛ a tɛlɛ tɛ kɛ NWA Gale 'dafa mɛnɔ, takɔ a dɛ mbuli a kpua zi hã Yeroboamɛ, be 'da Nɛbatɛ gɛ a ni. A kpua zi mbuli ni hã a do wala 'da wi gba olo nu a Ahia, wi Silo. Gulu kɛ nwa Roboamɛ bɛ̃a zi aka wenɔ 'da winɔ gɛ a ni.

Obe Israɛlɛ wa kɛ̃a sanga nùi 'da wa bɔa

¹⁶ 'Da fala kɛ obe Israɛlɛ wanɔ si gbãlã ngɔ, wa nɛa we zɔ na, nwa Roboamɛ bɛ̃a aka wenɔ 'da lo ni, nɛ wa tɔ̃ hã a na: “We mɔ́ lɛ tɛ nu fɛlɛ Davidi bina! To mɔ́ lɛ zɔ̃ be 'da Yɛse gɔ! Ma wia na lɛ kulu ngɔ, hã lɛ si. Kɔ ngangga ni, mɔ, be yaa Davidi, mɔ dungu wá nwa ngɔ nùi 'da mɔ!” Wa tɔ̃a ni do'do, nɛ wa kulu ngɔ, nɛ wa si.

¹⁷ Yolo dɛ di ni, tati a obe Yuda hã wa kɔ̃a gɛnɛ to nwa 'da Roboamɛ.

¹⁸ Roboamɛ nɛa we zɔ ni, nɛ a tombo Hadoramɛ, wi ngɔ Owi dɛ kolofenɔ, we dɛ na do obe Israɛlɛ wanɔ si gbãlã ngɔ ni. A nɛa we hɔ i mɔ, nɛ wa lo a do ta, nɛ wa gbɛ a. Nɛ Roboamɛ kpasa kɛ 'da ɛ, we kɛ a yu, nɛ a kũ ngilingili 'da a, nɛ a kpolo tɛ̃ a dɛ tɛ Yeruzalɛmɛ i.

¹⁹ Yolo dɛ di ni, nɛ nu kpala obe Israɛlɛ wanɔ si gbãlã ngɔ, wa bɛ̃a na, nu fɛlɛ Davidi tɛ dùngù 'bɔ nwa ngɔ lo gɔ. Nɛ ma 'bana ni fai tia do sɔɛ gɛ.