2 Sakonɔ 1 - WE NU GALE 1995

Gale hã dia hã zã dɛa to nwa hã Salɔmɔ

¹ Salɔmɔ, be 'da Davidi dungu zi nwa, nɛ dɛa to nwa 'da a ma nganda zi wena. NWA Gale 'da a zi do a fala nɛ kpo, nɛ a hã dɔ̃lɔ̃ li hã a wena.

² Salɔmɔ ba nu ɛ, nɛ wa sa mɔ hã obe Israɛlɛ vɛ̃. Wa sa mɔ hã ogã wi ngɔ osoda koto kpo, do ogã wi ngɔ osoda kama kpo, do Owi 'bili wenɔ, do ogã wi kɔ nu fɛlɛ kulanɔ vɛ̃ kɛ wa a okumu ni.

³ Nɛ owinɔ ni wa tɛa, nɛ wa mba do Salɔmɔ, nɛ wa la si Gabaoni, kɛ mɛ a fala santo. Mba gɔ, mɛ zi a fala kɛ wa zĩ do tɔa Tande kpa ngba wi do NWA Gale. Tɔa Tande ni, mɛ a kɛ Mɔizɛ, wi dɛa to 'da NWA Gale dɛa zi ma tɛ li gba zɔ̃ i ni.

⁴ Nɛ nde do 'da fala ni, Sanduku Gba Tɔkɛ 'da Gale zi a tɛ Yeruzalɛmɛ. Davidi ba zi ma tɛ kɔ le Kiriatɛ-Yearimɛ, nɛ a si do ma dɛ Yeruzalɛmɛ, nɛ a e ma dɛ ti tɔa Tande kɛ a 'dafa we ma ni.

⁵ Nɛ a zĩ zi gbagala tũ mɔ bole kɛ Bɛsalɛlɛ, be 'da Uri, dɛa zi ma ni, dɛ dati tɔa Tande 'da NWA, dɛ Gabaoni ni. Bɛsalɛlɛ zi a be yaa Hurɛ. Nɛ Salɔmɔ do owinɔ vɛ̃ kɛ a yɛnggɛ do wa ni, wa hɔa dɛ fala ni, nɛ wa sambala NWA.

⁶ Nɛ Salɔmɔ kulu ngɔ, nɛ a nɛ dɛ dati NWA, nɛ a ba nu a, nɛ wa gbɛ osa'de koto kpo, nɛ wa dɔ do dɔnggamɔ hã NWA, dɛ ngɔ gbagala tũ mɔ bole, dɔ̃ɔ do tɔa Tande kpa ngba wi do Gale.

⁷ Nɛ do tũi 'do ki ni, nɛ Gale hɔa li a kɔ yalɛ, nɛ a aka a na: “Mɛ mɔ kɔ̃a na, mi hã ma hã mɔ ni a ge nde?”

⁸ Nɛ Salɔmɔ gese hã a na: “Aa NWA, mɔ kɔ̃ zi gɛnɛ baa mi Davidi wena. Nɛ sɔɛ gɛ, mɔ saka mi do nwa olo a.

⁹ Nɛ nde NWA Gale, mɔ dɛ́ olo nu mɔ kɔ mbuli kɛ mɔ kpua zi ma hã baa mi Davidi ni. Mɔ ia mi do nwa ngɔ Owele kɛ wa dɛla ɔ nɛ gbãlã kɛnzɛnɔ nù gɛ.

¹⁰ We duzu ma, aa NWA, fala kɛ mɔ kɔ̃, nɛ mɔ hã hã zã do ĩ ti gɔnɔ sanga mɔ hã mi, takɔ mi ĩ ti fɔmɔ owinɔ mɔ ia mi ngɔ wa gɛ do dia nɛ. Tua kɛ wele do hã zã bina, nɛ nde a wé sɛ we fɔmɔ winɔ 'da mɔ, kɛ wa dɛlɛ wena gɛ gɔ.”

¹¹ Nɛ NWA tɔ̃ hã a na: “Mɔ aka de wena, mɔ àkà mɔ kpo we duzu mɔ wele nɛ gɔ. Mɔ àkà we hɔ wi kpamɔ, tabi we hɔ wi dɔ̃lɔ̃ li, tabi we Owi sɛnɛ mɔ na wa fe gɔ. Nɛ mɔ àkà 'bɔ na, mɔ 'bana nza fai, ɔ nɛ kɛ zã mɔ kɔ̃a ni gɔ. Nɛ nde mɔ aka tati a we kpa hã zã do ĩ ti gɔnɔ sanga mɔ, takɔ mɔ zɔ mɔ tɛ owinɔ 'da mi, kɛ mi ia mɔ do nwa ngɔ wa ni.

¹² Gulu nɛ hã mi dɛ sɛ mɛ kɛ mɔ aka ni hã mɔ. Mi hã sɛ hã zã, do ĩ ti gɔnɔ sanga mɔ hã mɔ. Dɛ ngɔ nɛ, mi hã sɛ 'bɔ kpamɔ do dɔ̃lɔ̃ li hã mɔ, nɛ ma gã sɛ wena nɛ ngɔ kɛ 'da wanɔ zi dati mɔ, do wanɔ sɛ 'do mɔ ni.”

¹³ Fala sa 'do ki ni, nɛ Salɔmɔ kulu ngɔ nu tɔa Tande Kpa Ngba Wi do Gale tɛ fala dɔnggɔ do Gale tɛ Gabaoni ni, nɛ a si dɛ Yeruzalɛmɛ i, we dɛ to nwa 'da a ngɔ obe Israɛlɛ.

Lɛnggɛ ngɔ ngawi 'da Salɔmɔ do kpamɛnɔ 'da a

¹⁴ Salɔmɔ ngɛmɛ zi li ongilingili bolo, do ombalata, nɛ a kpa ongilingili koto do kama nalɛ, nɛ ombalata koto 'bu ngɔ nɛ bɔa. Nɛ a a mbe mɛnɔ ni dɛ kɛ zã a tɛ Yeruzalɛmɛ i, nɛ a kɛ̃ ombe nɛ dɛ kɔ lenɔ kɛ wa 'dafa zi we a do ma ni.

¹⁵ Do 'da fala dɛa to nwa 'da a, ofɛ̃a mɔ bolo do mɔ mbali, ma dɛlɛ zi tɛ Yeruzalɛmɛ ɔ nɛ ogbãlã ta ni. Nɛ oma'baya sɛdrɛ ma dɛlɛ zi 'bɔ nɛa ngɔ ote sikɔmɔrɛ, kɛ ma hɔ ngɔ nù kɛ si ba gɔtɔ ni.

¹⁶ Owi be golenɔ wa nɛ zi ngɔ nù Ezipeto do Silisi, nɛ wa oso ombalata, nɛ wa si do wa hã nwa Salɔmɔ.

¹⁷ Wa oso zi 'bɔ ngilingili tɛ Ezipeto. Ma zi kpo do mbili mɔ bolo kama gazɛlɛ. Nɛ mbalata kpo te mbili mɔ bolo kama do 'bu nɛ mɔlɔ. Nɛ kpo kpo Owi be golenɔ 'da nwa ni, hã wa be zi 'bɔ gole ngilingilinɔ, do mbalatanɔ hã onwa ngɔ Ohiti do onwa ngɔ nù Siri.