1 TIMOTE 6 - WE NU GALE 1995

We ngɔ ongbá

¹ Ma wia na, winɔ vɛ̃ kɛ wa a ongbá ni, wa dɔnggɔ onwa ngɔ wa ɔ nɛ kɛ ma wia do wa ni na, da dɛ kɔ owele wa 'dángá zu li Gale, do bia wenɔ 'da lɛ gɔ.

² Nɛ ongbánɔ kɛ onwa ngɔ wa wa a owi kɔ̃a we ni, wa tɛ è kɔ̃a we 'da onwanɔ ni do li wa na, wa a onya lo wi kɔ̃a we, kɔ wa zɔ wa yala iko gɔ. Nɛ nde ma dia fɛ̃ na, wa dɛ tonɔ hã wa de dɛ dati, we kɛ owi kpa de mɔ olo toe ni, wi a onya wa wi kɔ̃a wenɔ, kɛ wa kɔ̃a gɛnɛ wa ni. Mɔ zɔ́ wenɔ kɛ mɔ wia tɛ be ma, nɛ mɔ dala nu mɔ tɛ nɛ ni, ma kɛ:

Gbãlã we kpamɔ

³ Wi kɛ a be gele we, nɛ a kɔ̃̀ gɛnɛ gbãlã we 'da Nwa 'da lɛ Yezu Kristo, do ngbongbo kɔ̃a we 'da lɛ gɔ ni,

⁴ a a wi gã zu, nɛ a ĩ̀ ti mɔ kpo gɔ. A fa tati a kpawe do ba kafi ngɔ olɛnggɛ mba mba iko, nɛ ma dɛ a nɛ́ zɛlɛ ni. Nɛ ki ni ko sɛnɛmɔ, mɔ̃lã, dɛla, do e sila wi ngɔ ngba wi.

⁵ Nɛ ma dɛ 'bɔ na, kafi le sanga owinɔ kɛ hã zã wa 'danga do'do, nɛ wa ĩ̀ ti gbãlã we gɔ, nɛ wa zɔ ba tɛ wi hã Gale nɛ́ wala fa do kpamɔ ni.

⁶ Nɛ nde mɛ a gbãlã we na, ba tɛ wi hã Gale mɛ a wala hɔ wi kpamɔ we wi kɛ a dɛ yangga do mɛnɔ kɛ a do ma ni.

⁷ Mba gɔ, lɛ tɛ̀ zi ngɔ nù nga do mɔ kpo kɔ̃ lɛ gɔ, nɛ lɛ sí sɛ 'bɔ do mɔ kpo kɔ̃ lɛ gɔ.

⁸ Ní a fala kɛ lɛ do nyɔngɔmɔ, do tulu boe nde, nɛ lɛ dɛ́ yangga nɛ.

⁹ Nɛ nde owinɔ kɛ wa fa we hɔ wi kpamɔ ni, sila wa ma ɔkɔlɔ sɛ wa, nɛ wa te sɛ li bili 'da Satana we 'dã wɔnɔ kɔ sila wa kpi do kpi kɛ li zuma nɛ bina ni. Nɛ o'dã wɔnɔ ni ma 'danga wa, nɛ ma tombo wa dɛ li fio.

¹⁰ Mba gɔ, wɔ tɛ mbili, mɛ a gulu 'dã mɛnɔ vɛ. Ombe wele wa yɔa wala 'da Kristo kɛ wa kɔ̃a zi a ni do'do, we kɛ wa ba zi tɛ wa vɛ we mbili iko, nɛ wa kpa ngamɔ kɔ sila wa wena.

Polo tɔ̃a tala mbula hã Timote

¹¹ Nɛ nde mɔ, kɛ mɔ a wi 'da Gale, mɔ yú mɛnɔ ni vɛ. Mɔ fá mɛ kɛ ma a bɔlɔ ni, nɛ mɔ bá tɛ mɔ hã Gale, nɛ mɔ ɔ́ do kɔ̃a we, do kɔ̃ ngba wi, do du sila, do gɛa sila dɛ 'da winɔ.

¹² Mɔ bá tɛ mɔ vɛ we dia bole kɛ mɔ bi we duzu Yezu kɛ mɔ kɔ̃a zu li a ni. Nɛ mɔ dɛ́ nganda na, mɔ 'bana do kpasi kɛ ma é sɛ gɔ ni. Mba gɔ, Gale sa zi mɔ hã mɔ we kpasi ni, do 'da fala kɛ mɔ tɔ̃a zi gulu kɔ̃a we 'da mɔ do sila mɔ vɛ̃ dɛ gbali ogba gili winɔ ni.

¹³ Mi ba nu mi hã mɔ dɛ gbali Gale, kɛ a hã kpasi hã mɛnɔ vɛ̃, do gbali Yezu Kristo, kɛ a tɔ̃a zi gulu kɔ̃a we 'da a dati Pɔnsɛ Pilatɛ do sila a vɛ ni na,

¹⁴ mɔ dɛ́ mɛnɔ mi tɔ̃a hã mɔ ni do wala do nɛ vɛ́, dɔ mɔ kpá kɔ'da kɔ nɛ gɔ. Mɔ dɛ́ ni gbaa we 'bɔ do 'da tɛa 'da Nwa 'da lɛ Yezu Kristo,

¹⁵ kɛ Gale a be sɛ a dɛ gbali owinɔ vɛ̃ do kɔ̃ tũ kɛ a wia ni. Gale kpo a Nwa, nɛ a a wele dia sila. A a Nwa ngɔ onwanɔ, nɛ to nwa 'da a nɛa ngɔ to nwanɔ vɛ.

¹⁶ A zu a kpo ni, a fé sɛ gɔ. A ɔ tɛ kɔ yele ngbala, kɛ wele wè tɛ kɔlɔ do ma gɔ ni. Wele zɔ̀ zi kuti a fala kpo gɔ, nɛ wele wè 'bɔ tɛ zɔ a gɔ. E kɔ a kpa dɔ̃lɔ̃ li, do ngawi kɔ sabɛlɛ do sabɛlɛ! Amɛ.

¹⁷ Mɔ tɔ̃̀ hã owinɔ kɛ wa do kpamɔ ngɔ nù gɛ wena ni na, wa tɛ ɔ̀ do gã zu gɔ, nɛ wa tɛ gbìnì zã wa do kpamɛnɔ 'da wa kɛ ma 'danga sɛ dɔ̃ iko ni gɔ. Nɛ nde wa gbini zã wa do Gale kɛ a hã mɛnɔ vɛ́ hã lɛ dɛlɛ wena na, lɛ dɛ yangga do ma ni.

¹⁸ Mɔ dálá nu mɔ hã wa na, wa dɛ de mɔ, nɛ de dɛa mɛnɔ 'da wa dɛlɛ wena. Wa hã́ mɔ do de sila, nɛ wa kɛ sanga mɛnɔ 'da wa do ngba wa.

¹⁹ Fala kɛ wa dɛ ni, nɛ wa ngɛmɛ sɛ ngbongbo kpamɛnɔ kɛ ma 'dángá gɔ ni, we ngba soenɔ kɛ ma tɛ sɛ 'do gɛ. Na mɛ ni, nɛ wa kpa sɛ ngbongbo kpasi.

²⁰ Aa Timote, mɔ fɔ́mɔ́ wenɔ kɛ wa ia dɛ tambala kɔ̃ mɔ ni do dia nɛ. Mɔ yú lɛnggɛnɔ kɛ li zuma nɛ bina, nɛ ma 'danga kɔ̃a we 'da winɔ 'danga ni. Nɛ mɔ bɛ̃́ gɛnɛ oaka wenɔ 'da owinɔ kɛ wa ba tɛ wa nɛ́ owi hã zãnɔ ni do'do.

²¹ Ombe wa ba tɛ wa na, lo a owi hã zã, nɛ nde wa la li wala 'da Kristo kɛ wa kɔ̃a zi ma ni do'do. E kɔ dia zã 'da Gale ma 'bana do nɛ vɛ́.