1 TIMOTE 5 - WE NU GALE 1995

Toe 'da wi zɔ mɔ tɛ Owi kɔ̃a wenɔ

¹ Mɔ tɛ ò dã zu kpasa wi gɔ, nɛ nde mɔ tɔ̃̀ mbula hã a, ɔ nɛ kɛ a a baa mɔ ni. Mɔ zɔ́ obe zagbãlãnɔ ɔ nɛ obulu nya mɔ,

² nɛ okpasa wukonɔ ɔ nɛ onaa mɔ, nɛ mɔ zɔ́ obe zɔnganɔ ɔ nɛ oboko nya mɔ ni do wala olo nɛ ngboo.

³ Mɔ gálá owi fio wilinɔ kɛ fo wi gala wa bina ni do dia sila.

⁴ Kɔ fala kɛ wi fio wili do obe mɔ́ a tabi obe yaa a boe nde, nɛ ma wia na, obenɔ ni wa yambala we dɔnggɔ owele wa, nɛ wa gese dia dɛa mɔ hã owi ko wa. Ki ni ma a dia li Gale.

⁵ Wi fio wili kɛ mɔ wia tɛ gala a ni, wi a wele kɛ a do wi gala a bina, nɛ a gbini zã a do Gale, nɛ a sambala a, nɛ a ala nu hã a tũ do gba wese ni.

⁶ Nɛ nde wi fio wili, kɛ a fa we hã yangga hã kili tɛ̃ a iko ni, gɛnɛ kɔ a 'bana do tunu li a, nɛ nde a fia li Gale ia.

⁷ Ma wia na, mɔ tɔ̃ we ni do mbula hã wa, dɔ owele wa kɔ́'dɔ́ wa gɔ.

⁸ Wi kɛ a lénggé do winɔ 'da a gɔ, nɛ wena a wi kɛ a sɔ́nzɔ́ do owinɔ kɔ tɔa 'da a gɔ ni, a la kɔ̃a we 'da a do'do, nɛ a 'danga nɛa ngɔ wi kɛ a do kɔ̃a we bina ni.

⁹ Mɔ nɛ kɔmɔ li wuko kɔ mbɛti 'da Owi fio wilinɔ, nɛ dati mɔ zɔ́ na, a la ngɔ 'bu sabɛlɛ gazɛlɛ, nɛ a ba zi wili fala kpo iko, sɛ nɛ de.

¹⁰ Nɛ ma wia na, owinɔ wa ĩ ti a we dia dɛa mɔ tɛ a. Wa ĩ na: A dala zi obenɔ 'da a do dia nɛ, nɛ a dɛ zi gbɛla ogɛnɛnɔ 'da a dɛa, nɛ a fɔla zi nyanga owinɔ 'da Gale, nɛ a gala zi Owi 'bako, nɛ a dɛa zi 'bɔ de dɛa mɔ kpi do kpi.

¹¹ Nɛ mɔ tɛ kɔ̀mɔ̀ li Owi fio wilinɔ kɛ wa 'bana ngɔ be zɔnga tɛ wa iko ni gɔ. Mba gɔ, fala kɛ wɔ kɔ sila wa ma kɛ̃ sanga tɛ ngba wa do Kristo, nɛ ma tombo sɛ wa we ba mbé wili.

¹² Kɔ wa dɛ ni, nɛ nde wa tia do we, we kɛ wa 'danga kuti mbuli 'da wa do'do.

¹³ Nɛ dɛ ngɔ ki ni, wa hɔ sɛ owi yɛlɛ, nɛ zu wa ma kpa sɛ nu tɔanɔ vɛ. Fo sɛ mɔ dɛ kɔ̃ wa bina, nɛ wa hɔ sɛ owi dɛ nu we, owi tɔ̃ ngalangba, nɛ wa fi sɛ 'bɔ nu wa kɔ we kɛ ma zɔ̀ wa gɔ ni.

¹⁴ Ma kɛ mi kɔ̃a na, wuko fio wilinɔ kɛ wa 'bana do be zɔnga ni, wa bá mbé wili, hã wa ko obe, nɛ wa dɛ to nu tɔa wili 'da wa na, dɔ ma hã wala hã Owi sɛnɛ lɛ na, wa tɔ̃ 'dã we tɛ lɛ gɔ.

¹⁵ Mba gɔ, ombe wi fio wilinɔ, wa la li bɔlɔ wala 'da Kristo we nɛ 'do Satana.

¹⁶ Wuko wi kɔ̃a we ɔ do owi fio wili kɔ nu fɛlɛ a nde, nɛ ma wia na, a gala wa, nɛ a tɛ là dɛa to gala wa dɛ tɛ owi kɔ̃a wenɔ na, wa ba dĩ tole nɛ iko gɔ. A dɛ ni, takɔ owi kɔ̃a wenɔ wa gala wanɔ kɛ wa do owi gala wa bina ni.

¹⁷ Ma wia na, owinɔ kɛ wa zɔ mɔ tɛ eklezia do dia nɛ ni, wa kpa mɔ olo toe 'da wa, nɛ ma dunu kɔ̃ wa. Nɛ wena a owanɔ kɛ wa gbɛ tɛ wa we tɔ̃ mbula do be we ni.

¹⁸ Mba gɔ, wa kɔma kɔ 'Buki 'da Gale na: “Mɔ tɛ ɛ̀nzɛ̀ nu ngɔmbɔ do 'da fala kɛ a ma sanga kpalɛ na, gbãlã kɛ fo tɛ ɛ tɛ kɔa nɛ ni gɔ.” Nɛ wa kɔma 'bɔ na: “Wi dɛa to wia we kpa mɔ olo toe 'da a.”

¹⁹ Kɔ fala kɛ wele tɛ we da mbe wi zɔ mɔ tɛ eklezia hã mɔ nde, nɛ mɔ tɛ kɔ̃̀ gɛnɛ nɛ do ti gɔ. Ma wia na, mɔ zele ma dɛ nu otemɔɛ bɔa tabi talɛ, sɛ nɛ mɔ kɔ̃ gɛnɛ nɛ de.

²⁰ Fala kɛ mbe winɔ wa dɛ 'dã mɔ nde, nɛ mɔ dãlã dɛ tɛ wa dɛ li owinɔ vɛ, sɛ nɛ ogele wanɔ wa dɛ sɛ kili de.

²¹ Mi ba nu mi hã mɔ do zu li Gale, do zu li Yezu Kristo, do zu li anzɛnɔ kɛ a saka wa ni na, mɔ dɛ́ mbulanɔ kɛ mi tɔ̃a hã mɔ gɛ vɛ, nɛ mɔ tɛ zɔ̀ bula li wele gɔ, nɛ nde mɔ dɛ́ mɔ hã winɔ vɛ we kɔ̃.

²² Fala kɛ mɔ kɔ̃ we saka wele we dɛ to kɔ eklezia, nɛ mɔ tɛ à kɔ̃ mɔ zu a dɔ̃ iko gɔ. Mɔ tɛ mbà ngɔ 'dã mɔ mɔ́ wele do a gɔ. Mɔ dɛ́ na, sila mɔ 'bana do sa nɛ li Gale fai.

²³ Mɔ tɛ nɔ̀ tati a lì iko fai gɔ, nɛ nde mɔ nɔ́ mbe dɔ̃ sĩ, takɔ ma 'dafa gba tɔa zã mɔ, we kɛ mɔ ba zɛlɛ wena.

²⁴ Ombe winɔ wa dɛ 'dã mɔ, nɛ ma be tɛ̃ ɛ dɛ wila fala, dati kɛ na wa tɛ 'bìlì we 'da wa gɔ ni. Nɛ ombe wa dɛ 'dã mɔ, nɛ ma be tɛ̃ ɛ do 'do.

²⁵ Ma 'bɔ kpasaa na mɛ ni we duzu dia dɛa mɛnɔ. Wele dɛ de mɔ, nɛ wa ĩ fala nɛ do ti, nɛ gɛnɛ kɔ ombe dia dɛa mɛnɔ, ma bè tɛ̃ ɛ dɔ gɔ, nɛ nde ma wè tɛ usu tɛ̃ ɛ fai gɔ.