1 TIMOTE 4 - WE NU GALE 1995

Owi be we bɛlɛnɔ

¹ Hi Wi Santo tɔ̃a dɛ wila fala na, 'da fala ndɔti nùi kɔlɔ, nɛ ombe winɔ wa la sɛ fala kɔ̃a we 'da wa, nɛ wa e sɛ sila wa ngɔ hi wi bɛlɛnɔ, do bia wenɔ kɛ ma yolo kɔ o'dã hi winɔ ni.

² Wi vĩ sɛ zu wa, wi a owi ɔlɔ winɔ do owi 'bili bɛlɛnɔ, kɛ sila wa do linggamɔ zu wa ma 'danga ɔ nɛ kɛ wa dɔa ma do bawe mɔ bolo ni.

³ Owinɔ ni wa be na, owele wa tɛ bà ngba wa gɔ, nɛ wa be 'bɔ na, wa bɛ̃ ombe nyɔngɔmɛnɔ. Nɛ nde Gale a dɛa nyɔngɔmɛnɔ ni na, owi kɔ̃a wenɔ kɛ wa ĩ ti gbãlã we 'da a ia ni, wa nyɔngɔ ma. Kɔ ma wia na, wa hã iɔ̃nae hã Gale we nɛ, sɛ nɛ wa nyɔngɔ de.

⁴ We kɛ mɛnɔ vɛ̃ kɛ Gale dɛa ni, ma a dia. Mɔ kɛ ma wia na lɛ bɛ̃ ma bɛ̃a ni bina. Nɛ nde ma wia na, lɛ hã iɔ̃nae hã Gale we nɛ, sɛ nɛ de.

⁵ Mba gɔ, we nu Gale, do sambala, ma 'dafa nyɔngɔmɛnɔ vɛ̃ na, ma de li a.

Dia wi dɛa to 'da Yezu Kristo

⁶ Mɔ bé wenɔ ni vɛ̃ hã onya mɔ wi kɔ̃a wenɔ. Na mɛ ni, nɛ mɔ sɛ a dia wi dɛa toe 'da Yezu Kristo. Nɛ mɔ dálá kɔ̃a we kɔ sila mɔ do we nu Gale, do dia bia wenɔ kɛ mɔ kɔ̃a gɛnɛ nɛ ni.

⁷ Mɔ tɛ gɛ zala mɔ tɛ gba tonɔ kɛ fo gulu nɛ bina, nɛ ma 'danga kɔ̃a we 'da winɔ ni gɔ. Kɔ mɔ 'dáfá dɛa mɔ tɛ mɔ dɛ dati fai, takɔ mɔ ɔ wi 'da Gale ngboo.

⁸ Dɛa sa nga gbãlã tɛ, ma 'dafa kili tɛ wi iko, nɛ nde ba tɛ wi hã Gale, ma 'dafa wi vɛ̃. Mba gɔ, ma hã kpasi hã wele li dungi 'da a ngangga gɛ, do kɛ 'do gɛ, ɔ nɛ kɛ Gale kpua mbulu nɛ ni.

⁹ We mi tɔ̃a ni, mɛ a gbãlã we ngboo, nɛ ma wia na, winɔ vɛ̃ wa kɔ̃ ma do sila wa kpo.

¹⁰ Mɔ zɔ́ gulu kɛ lɛ bi nganda, nɛ lɛ gbɛ tɛ lɛ li dɛa toe gɛ a ni. Mba gɔ, lɛ gbini zã lɛ do Gale, wele kpasi, kɛ a hã kpasi hã owinɔ vɛ̃, nɛ nde dati ngboo hã wanɔ kɛ wa kɔ̃a zu li a ni.

¹¹ Ma wia na, mɔ mbese winɔ do wenɔ ni, nɛ mɔ tɔ̃́ gulu nɛ hã wa.

¹² Dɔ li wele gbó do mɔ, we kɛ mɔ 'bana do be zagbãlã iko ni gɔ. Nɛ nde ma wia na, Owi kɔ̃a wenɔ wa nɛ 'do dia wila we nu mɔ, do dia dɛa to tɛ mɔ, do kɔ̃a zã, do kɔ̃a we, do dia mɛnɔ mɔ dɛ li Gale ni.

¹³ Nɛ mɔ ba tɛ mɔ vɛ we tɔlɔ 'Buki 'da Gale hã winɔ. Mɔ bé ma, nɛ mɔ tɔ̃ gulu nɛ hã wa. Mɔ dɛ ní we 'bɔ do 'da kɛ mi nɛ nɛ 'da mɔ i ni.

¹⁴ Mɔ tɛ zɔ̀ ngawi dɛa tonɔ kɛ Hi Wi Santo hã ma hã mɔ ni yala iko gɔ. A hã zi ma hã mɔ do 'da fala Owi gba do nu Gale wa tɔ̃a zi do we si ngɔ mɔ, nɛ Owi zɔ mɔ tɛ eklezia wa ia do kɔ̃ wa zu mɔ ni.

¹⁵ Mɔ é sila mɔ ngɔ wenɔ ni vɛ, nɛ mɔ bá tɛ mɔ we ma. Mɔ dɛ ní, nɛ owinɔ vɛ wa zɔ sɛ na, mɔ nɛ dɛ dati nɛa.

¹⁶ Li mɔ sɔ̃́ngɔ kili tɛ mɔ, do ngɔ wenɔ mɔ be ni, nɛ mɔ hã́ tɛ mɔ we nɛ. Mɔ dɛ ní, nɛ mɔ kpasa sɛ, fala nɛ kpo do winɔ kɛ wa zele mɔ ni.