1 TIMOTE 3 - WE NU GALE 1995

We ngɔ Owi zɔ mɔ tɛ eklezia

¹ We, mi nɛ tɔ̃ nɛ gɛ, mɛ a gbãlã we. Wi kɛ a kɔ̃ we dungu wi zɔ mɔ tɛ eklezia ni, a saka dia dɛa to.

² Ma wia na, wi zɔ mɔ tɛ eklezia ɔ wi kɛ wa wè tɛ kɔ'dɔ a tɛ mɔ kpo gɔ ni. A ɔ́ do kɛnɛ a kpo, a ɔ́ wi gbisa zu, a dĩ́lĩ́ fala tɛ a, nɛ a dɛ́ mɔ tɛ̃ a do li zuma nɛ. A dɛ́ gɛnɛ owinɔ wa tɛ 'da a ni, nɛ a ĩ́ ti be we ngboo.

³ A tɛ ha tɛ a we dɔ̃ gɔ, nɛ zã a tɛ nɔ̃̀lɔ̃̀ dɔ̃ dɔ̃ gɔ. Nɛ nde a ɔ́ wi gɛ̃a sila, do wi dɛ na, nɛ wɔ mbili tɛ gà li sila a gɔ.

⁴ Ma wia na, a ɔ wi zɔ mɔ tɛ owinɔ kɔ tɔa 'da a do dia nɛ, nɛ a ĩ ti dala obenɔ 'da a na, wa zele we nu a nɛ́ kɛ ma wia ngboo ni.

⁵ Mba gɔ, wi kɛ a ĩ̀ ti zɔ mɔ tɛ owinɔ kɔ tɔa 'da a do dia nɛ gɔ ni, nɛ a dɛ sɛ fala zɔ mɔ tɛ eklezia 'da Gale nɛ nde?

⁶ Ma wè na wi zɔ mɔ tɛ eklezia ɔ do mbé wi kɔ̃a we gɔ, dɔ a dɛ́ gã zu, kɔ a te do ngbangga ɔ nɛ kɛ Satana tia zi ni gɔ.

⁷ Ma wia 'bɔ na, owinɔ kɛ wa tɛ kɔ̃̀ zu li Yezu gɔ ni, wa tɔ̃ dia we tɛ̃ a na, da dɛ kɔ sako li a 'dángá, kɔ a te li bili 'da Satana gɔ.

We ngɔ owi 'dafa to kɔ eklezia

⁸ Ma wia na, owi 'dafa to kɔ eklezia, wa dĩlĩ tɛ mɛ 'bɔ fala tɛ wa, nɛ lɛfɛ wa tɛ sàsàlà bɔa gɔ. Wa tɛ ha tɛ wa we dɔ̃ gɔ, nɛ wa tɛ fà mbili do 'dã wala gɔ.

⁹ Nɛ wa fɔ́mɔ́ usu we kɛ Gale bia hã wa, nɛ wa kɔ̃a gɛnɛ nɛ ni do sila wa kpo.

¹⁰ Nɛ nde ma wia na, wa yamba owinɔ ni dati. Kɔ fala kɛ wa zɔ na, fo mɔ kɔ'dɔ wa we nɛ bina, sɛ nɛ wa hɔ owi 'dafa to kɔ eklezia de.

¹¹ Nɛ ma wia tɛ mɛ 'bɔ na, owukonɔ 'da wa, wa dĩlĩ fala tɛ wa gbali owinɔ. Wa tɛ ɔ̀ owi tɔ̃ ngalangba gɔ, wa ɔ́ owi gbisa zu, nɛ wa dɛ́ mɛnɔ vɛ̃ do wala olo nɛ.

¹² Ma wia na, wi 'dafa to kɔ eklezia ɔ do kɛnɛ a kpo, nɛ a ĩ́ ti dala obenɔ 'da a, do zɔ mɔ tɛ owinɔ kɔ tɔa 'da a do dia nɛ.

¹³ Owi 'dafa to kɔ eklezia kɛ wa dɛ tonɔ 'da wa do wala olo nɛ ni, nɛ owinɔ wa ba sɛ wa do dĩ, nɛ wa we sɛ we tɔ̃ gulu kɔ̃a we kɛ lɛ kɔ̃a do zu lì Yezu Kristo ni hã owinɔ do dia nɛ ngboo.

Gã usu we

¹⁴ Mi kɔmɔ mbɛti gɛ hã mɔ, Timote do linggamɔ na, mi hɔ sɛ 'da mɔ i dɔ̃ gɛ.

¹⁵ Kɔ fala kɛ mi hɔ̀ dɔ̃ gɔ, nɛ mbɛti mi kɔma ma hã mɔ gɛ, ma gala sɛ mɔ we ĩ ti tɛlɛ tɛ kɛ Owi nu fɛlɛ kula 'da Gale wa wia we dungu nɛ ni. Mɔ ĩ na, nu fɛlɛ kula ni, mɛ a Eklezia 'da Gale, wele kpasi, nɛ Eklezia ma tɔndɔ gbãlã we 'da Gale, ɔ nɛ kɛ bɛlɛduma tɔndɔ do tɔa ni.

¹⁶ Gbãlã we, usu we 'da Gale kɛ lɛ kɔ̃a ma ni, ma gã wena, nɛ lɛ wè tɛ ba kafi ma gɔ. Usu we ni ma kɛ: Kristo ba kili tɛ wele, nɛ Hi Wi Santo bia na, a a wi bɔlɔ zu. Anzɛnɔ wa zɔa zi a. Wa bia zi we 'da a hã ogele nu fɛlɛ kulanɔ, nɛ ngɔ nù gɛ owinɔ wa kɔ̃a zu li a, nɛ Gale ba a dɛ li nza i.