1 TIMOTE 2 - WE NU GALE 1995

Mbula ngɔ sambala

¹ Dati ngboo, mi kɔ̃a na, owi Kristonɔ wa sambala Gale, nɛ wa ala nu wa hã a, nɛ wa hã iɔ̃nae hã a we winɔ vɛ.

² Ma wia na, wa sambala Gale we duzu onwanɔ do ogã winɔ vɛ, takɔ lɛ kpa dungu fĩo, nɛ lɛ ɔ do gɛa sila, nɛ lɛ dɔnggɔ Gale do sila lɛ kpo, nɛ lɛ dɛ mɔ tɛ lɛ do bɔlɔ nɛ.

³ Ki ni, ma a dia, nɛ ma dɛ yangga tɛ Gale Wi kpasa lɛ,

⁴ kɛ a kɔ̃a na winɔ vɛ wa kpasa, nɛ wa ĩ ti gbãlã we 'da a ni.

⁵ Mba gɔ, Gale zu a kpo, nɛ wi 'dafa dɛa na sanga Gale do owinɔ ni, a 'bɔ zu a kpo, a a wele, wi a Yezu Kristo.

⁶ A ba zi kili tɛ a we gɔnɔ zu winɔ vɛ. A dɛa ni do ngba soe kɛ Gale wia ni, we be na, Gale kɔ̃a we kpasa winɔ vɛ.

⁷ We duzu ma, Gale saka mi do wi nɛ toe 'da a, we be gbãlã we 'da a hã owinɔ kɛ wa a Oyuda gɔ ni na, wa kɔ̃ gɛnɛ nɛ. We mi tɔ̃ ni, mɛ a nga li we, mi 'bílí bɛlɛ gɔ.

⁸ Kɔ we duzu ma, mi kɔ̃a na, tɛ falanɔ vɛ̃ nɛ mba li ngba nɛ ni, nɛ Owi wilinɔ wa sambala do ba kɔ̃ wa dɛ ngɔ. Nɛ kɔ sila wa ɔ́ sa, nɛ wa tɛ ɔ̀ do mãlã, do linggamɔ kpa we gɔ.

⁹ Kɛ 'da owukonɔ, mi kɔ̃a na, wa he'de tulunɔ 'da wa nɛ́ kɛ ma wia ni. Ma dia fɛ na, wa 'dafa tɛ wa we dɛ tɛ nɛ, ma tɛ là li ngele gɔ. Wa tɛ 'dàfà zu wa de la li gɔ, nɛ wa tɛ hè'dè dia mɔ mbali tabi iyaka tabi tulu olo gã gole gɔ.

¹⁰ Nɛ nde wa dɛ́ de dɛa mɔ nɛ́ kɛ ma wia do owukonɔ kɛ wa zɔ tɛ wa nɛ́ owinɔ 'da Gale ni.

¹¹ Fala kɛ wele ma ngɔ tɔ̃ mbula, nɛ wukonɔ wa dúngú fio, nɛ wa bá tɛ wa dɛ nù we zele we ni iko.

¹² Mi ha wala hã wuko kpo na, a be we, tabi na a ɔ nwa ngɔ wi wili gɔ. Nɛ nde ma wia na, wa dungu fio iko.

¹³ Mba gɔ, wi kɛ Gale dɛa zi a dati wi a Adamu, sɛ hã a dɛ Eva de.

¹⁴ Nɛ wi kɛ Satana ɔlɔ zi a dati, wi a Adamu gɔ, nɛ nde a ɔlɔ zi wuko, nɛ wuke tia kɔ 'dã mɔ.

¹⁵ Kɔ 'da fala kɛ wuko dungu do nɔa sila kɔ kɔ̃a we 'da a do kɔ̃ gɛnɛ ngba wi, nɛ kɔ sila a ma a sa li Gale, nɛ a ba tɛ a dɛ nù, nɛ a kpasa sɛ do 'da fala kɛ a ko be ni.