1 TIMOTE 1 - WE NU GALE 1995

¹ Wi a mi Polo, wi nɛ toe 'da Yezu Kristo. Gale Wi kpasa lɛ, do Yezu Kristo kɛ lɛ gbini zã lɛ do a ni, wa a wa hã toe gɛ hã mi.

² Mi kɔmɔ mbɛti gɛ hã mɔ Timote, kɛ mɔ a be 'da mi ngboo, we duzu kɔ̃a we kɛ mɔ kɔ̃a do wala 'da mi ni. E kɔ Gale Baa, do Nwa 'da lɛ Yezu Kristo wa be dia zã 'da wa hã mɔ, nɛ wa ĩ 'bako hã mɔ, nɛ wa dɛ na, mɔ dungu do gɛ̃a sila.

Li mɔ sɔ̃ tɛ bia we bɛlɛnɔ

³ Ma wia na, mɔ dɛ ɔ nɛ kɛ mi tɔ̃a zi hã mɔ 'da fala la zi mɔ́ mi dɛ Masedɔanɛ i ni. Mɔ 'báná dɛ kɔ le Efɛzɛ ni, takɔ mɔ kpe nu mbe winɔ, kɛ wa be we bɛlɛ di ni ni.

⁴ Mɔ tɔ̃ hã wa na, wa la fala yambala gba tonɔ, do tɔlɔ gba du nu fɛlɛ kulanɔ 'da wa kɛ ma do ndɔti nɛ bina ni do'do. Mba gɔ, kinɔ ni ma fa tati a kpa we iko. Ma gálá lɛ we dɛ mɛ kɛ zã Gale kɔ̃a, nɛ lɛ ĩ we nɛ do wala kɔ̃a we 'da lɛ ni gɔ.

⁵ Mi tɔ̃a ni mba gɔ, we kɛ mi kɔ̃a we gã 'da kɔ̃a ngba wi 'da Owi Kristonɔ. Ĩ na, wa kɔ̃ sɛ gɛnɛ ngba wa ngboo, 'da fala kɛ sila wa ma a sa, kɔ wa ɔ do dia linggamɔ, kɔ wa kɔ̃ zu li Yezu do sila wa kpo ni.

⁶ Ombe nɛ wa la li wala dɛ de dɛa mɛ ni do'do, nɛ ma dɛa na, wa si tɛ ba kafi kɛ li zuma nɛ bina ni iko.

⁷ Wa ba tɛ wa na, lo a wi be mbula 'da Gale, nɛ nde wa ĩ̀ ti gulu lɛnggɛnɔ kɛ wa tɔ̃ ni gɔ, nɛ wa ĩ́ 'bɔ ti gulu wenɔ kɛ wa hã tɛ wa we nɛ nganda nɛ gɛ nde ni gɔ.

⁸ Lɛ ĩ na, mbula mɛ a dia mɔ 'da fala kɛ wele zele ma do wala olo nɛ ni.

⁹ Mba gɔ, Gale è zi mbula we duzu odia wi gɔ, a ia ma we duzu owi lakala we, owi nga zu, owi bɛ̃ Gale, owi dɛ 'dã mɔ, owinɔ kɛ wa faka omɛnɔ kɛ ma santo, tabi wa zɔ ma li wa yala ni. A ia ma we owi gbɛ baa wa, tabi naa wa, tabi owi gbɛ gele wele.

¹⁰ Nɛ a ia 'bɔ ma we owi yɛnggɛ vĩ zu yɛli, owi wilinɔ do owukonɔ kɛ wa ɔ do kpo kpo ngba wa, do owinɔ wa be gole ngba wa do ngbá, do owi 'bili bɛlɛ, do wanɔ kɛ wa kana tɛ wa do bɛlɛ, do owanɔ vɛ kɛ dɛa mɔ tɛ wa wè kɔ̃ do gbãlã we bia we ngɔ Gale gɔ ni.

¹¹ Bia wenɔ ni ma yula kɔ Dia Sakoe, kɛ Gale ba to nɛ hã mi na, mi be ma ni. Dia Sakoe ni ma tɔ̃ we dɔ̃lɔ̃ li 'da Gale do dia wi 'da a.

Polo hã iɔ̃nae hã Gale

¹² Mi hã iɔ̃nae hã Yezu Kristo Nwa 'da lɛ, we duzu kɛ a hã ngawi dɛ toe gɛ hã mi. Mi hã iɔ̃nae hã a, we kɛ a zɔa zi na, mi wia we dɛ toe 'da a, nɛ a saka mi we nɛ ni.

¹³ Gɛnɛ kɔ mi tɔ̃a zi 'dã we tɛ Yezu, nɛ mi zɛlɛ tɛ̃ a, nɛ mi dã zu li a, nɛ nde Gale a ĩ 'bako hã mi, we kɛ mi tɛ kɔ̃̀ zi zu li Yezu gɔ, nɛ mi ĩ̀ zi 'bo ti gulu mɛnɔ mi dɛ ni gɔ.

¹⁴ Gbãlã we, Nwa 'da lɛ Yezu bia dia zã 'da a hã mi, nɛ ma nɛa ngɔ mɛnɔ vɛ. Nɛ a dɛa na, mi ɔ do kɔ̃a we do kɔ̃ gɛnɛ ngba wi kɛ ma yolo kɔ a ni.

¹⁵ Kɔ mɔ zɔ́, we wa tɔ̃a zi na, Yezu tɛa ngɔ nù gɛ we kpasa o'dã winɔ ni, mɛ a gbãlã we. Nɛ ma wia na, winɔ vɛ wa kɔ̃ ma do sila wa kpo. Nɛ sanga owi dɛ 'dã mɛnɔ ni, mi nɛa ngɔ wa vɛ.

¹⁶ Ma kɛ Gale ĩ zi 'bako hã mi, we kɛ a kɔ̃a zi we be na, Yezu Kristo zi do du sila dɛ 'da mi, kɛ mi nɛa ngɔ winɔ vɛ do 'dã mɔ ni, takɔ mi ɔ nɛ bia mɔ we owinɔ kɛ wa tɛ sɛ 'do gɛ, nɛ wa kɔ̃ zu li a, nɛ wa kpa kpasi kɛ ma é sɛ gɔ ni.

¹⁷ E kɔ owele wa dɔnggɔ Gale, kɛ a a Nwa fai ni. A fé fio gɔ, wele zɔ́ a gɔ, nɛ a zu a kpo a Gale. E kɔ wa hã dɔ̃lɔ̃ li hã a kɔ sabɛlɛ do sabɛlɛ! Amɛ.

¹⁸ Aa Timote, be 'daa, mi a mbulanɔ gɛ dɛ kɔ̃ mɔ, nɛ ma lua ngbɛ ɛ do mbe wenɔ kɛ owi gba olo nu Gale wa tɔ̃a zi dɛ ngɔ mɔ ni. Kɔ ma wia na, wenɔ ni ma hã ngawi hã mɔ, takɔ sila mɔ nɔ li dia bole mɔ bi gɛ.

¹⁹ Kɔ mɔ dúngú do kɔ̃a we, nɛ mɔ ɔ́ do dia linggamɔ kɔ sila mɔ. Mba gɔ, ombe winɔ wa bɛa zi gɛnɛ dia linggamɛnɔ kɔ sila wa, nɛ 'do nɛ, nɛ kɔ̃a we 'da wa ma 'danga zi do'do.

²⁰ Sanga owinɔ ni, wi a Himene do Alɛkzandrɛ. Nɛ mi la zi wa hã Satana, we be hã wa na, wa wè tɛ dã zu li Gale gɔ.