1 PETRO 4 - WE NU GALE 1995

Lɛ kpóló ã dɛa mɔ tɛ lɛ

¹ Nɛ ĩ na, kili tɛ Yezu Kristo kpa ngamɔ. We duzu ma, ma wia na, nɛ ɔ do kpo linggamɛ nɛ́ Yezu ni, nɛ nɛ kpãlã sila nɛ kɔ ngamɛnɔ. Mba gɔ, wi kɛ kili tɛ̃ a kpa ngamɔ ni, a dɛ́ 'bɔ 'dã mɔ gɔ.

² Yolo do sɔɛ gɛ, do tala kɔ̃ tũnɔ kɛ nɛ 'bana ɔ ngɔ nù gɛ, ma wia na, nɛ dɛ mɔ tɛ nɛ nɛ́ kɛ Gale kɔ̃a ni, nɛ nɛ tɛ dɛ̀ 'dã mɔ nɛ́ kɛ wɔ kɔ kili tɛ nɛ tombo nɛ ni gɔ.

³ Mba gɔ, zi dati, nɛ nɛ 'danga kɔ̃ tũnɔ 'da nɛ wena tɛ dɛ mɛnɔ kɛ opaganɔnɔ wa kɔ̃a we dɛ ma ni. Nɛ dɛa zi vĩ zu dɛa mɔ, nɛ nɛ kɔ̃a zi gɛnɛ mɔ sape do bá dɔ̃. Nɛ nɔa zi dɔ̃, nɛ nɛ nyɔngɔ mɔ do nga'ba wena, nɛ nɛ mba zi do opaganɔnɔ ni, nɛ nɛ dɔngga okpikimanɔ, kɛ ma hã sape wena ni.

⁴ Nɛ nde ngangga ni, opaganɔnɔ wa ɔngbɔ wena we zɔ na, nɛ mbá 'bɔ do wa we yɛnggɛ vĩ zu yɛlinɔ do dɛ 'dã mɛnɔ ni gɔ, nɛ wa tɛ wele 'dã we hã nɛ.

⁵ Kɔ mbe ngba soe kpo, nɛ wa tɔ̃ sɛ gulu mɛnɔ kɛ wa dɛ zi ma ni dati Gale, kɛ a 'bili sɛ we 'da ofionɔ do owanɔ wa 'bana nza ni.

⁶ Nɛ zɔ́ gulu kɛ wa bia zi Dia Sakoe hã ofionɔ gɛ a ni. Mba gɔ, gɛnɛ kɔ Gale 'bili zi we 'da wa do 'da fala dungu nza 'da wa nù nga, nɛ́ kɛ a 'bili we 'da winɔ vɛ ni, nɛ nde wa bia 'bɔ Dia Sakoe hã wa, takɔ wa dungu do kpasi nɛ́ Gale ni do wala 'da Hi Wi 'da a.

Tɛlɛ tɛ dungi 'da owi kɔ̃a wenɔ do ongba wa

⁷ Mɛnɔ kɔlɔ fala sɔkpɔ nɛ vɛ̃ ia. We duzu ki ni, nɛ ɔ́ do gbisa zu, do sɔ̃a li, takɔ nɛ sambala Gale do dia nɛ.

⁸ Nɛ dati mɛnɔ vɛ, ma wia na, nɛ kɔ̃ gɛnɛ ngba nɛ do sila nɛ kpo. We kɛ 'da fala nɛ kɔ̃ gɛnɛ ngba nɛ, nɛ nɛ lénggé sɛ do 'dã mɛnɔ wa dɛ ni gɔ.

⁹ Nɛ dɛ́ gɛnɛ ongba nɛ, nɛ nɛ tɛ dɛ̀ do 'dã sila gɔ.

¹⁰ Gale wila nu a tɛ nɛ, nɛ a hã ngawi dɛ to hã nɛ kpi do kpi. Kɔ ma wia na, wele do wele e ngawi kɛ Gale hã ma hã a ni, we dɛ do de mɔ hã ongba a. Nɛ ki ni ma be sɛ na, nɛ ĩ ti dɛ to do ngawi Gale hã ma hã nɛ ni do wala do nɛ.

¹¹ Wi kɛ a a wi be mɔ, nɛ ma wia na, a be we nu Gale. Wi kɛ a a wi gala Owele, nɛ ma wia na, a dɛ ma do ngawi kɛ Gale hã ma hã a ni. Nɛ dɛ́ ni, takɔ dɛa mɔ tɛ nɛ vɛ, ma hã dɔ̃lɔ̃ li hã Gale we duzu Yezu Kristo, kɛ a do dɔ̃lɔ̃ li do ngawi kɛ ndɔti nɛ bina ni! Amɛ.

Nɛ kúnú sila nɛ kɔ ngamɔ ɔ nɛ Kristo ni

¹² Aa oyali ngba mi, nɛ tɛ ɔ̀ngbɔ̀ do ngamɛnɔ kɛ ma kpa nɛ ni gɔ. Nɛ tɛ zɔ̀ ma nɛ́ nga gele mɔ gɔ, we kɛ ma kpa nɛ ní we yamba sila nɛ.

¹³ Fala kɛ nɛ zɔ ngamɔ wala kpo do Kristo, nɛ nɛ dɛ́ yangga. Na mɛ ni, do ngba soe kɛ dɔ̃lɔ̃ li 'da a ma be sɛ tɛ̃ ɛ dɛ nza ni, nɛ nɛ sɛ do yangga wena.

¹⁴ Tabi Owele wa tɔ̃ 'dã nu we hã nɛ, we duzu kɛ nɛ a winɔ 'da Kristo, nɛ nde nɛ a Owi yangga. We kɛ Hi Wi 'da Gale kɛ a do dɔ̃lɔ̃ li ni, a do nɛ boe.

¹⁵ Nɛ nde li nɛ sɔ̃́, dɔ wele kpo sanga nɛ zɔ́ ngamɔ we duzu kɛ na, a gbɛa wele, tabi a zũ mɔ, tabi a dɛa 'dã mɔ, tabi a lia kɔ we mɔ́ wele gɔ.

¹⁶ Kɔ fala kɛ mbe sanga nɛ zɔ ngamɔ, we duzu kɛ a a wi Kristo, nɛ sape tɛ bà li a gɔ. Nɛ nde a gese iɔ̃nae hã Gale, we duzu li Kristo kɛ wa sa zu a ni.

¹⁷ Ngba soe kɛ Gale nɛ 'bili do we 'da winɔ ni ma wia ia. Nɛ nde a ndo sɛ 'bili we do ngɔ owinɔ 'da a. Kɔ fala kɛ a ndo 'bili we 'da a do ngɔ lɛ winɔ 'da a, kɔ ma hɔ ngɔ winɔ kɛ wa bɛa gɛnɛ Dia Sakoe 'da a ni, nɛ ma sɔkpɔ sɛ do wa nɛ nde?

¹⁸ Ma ɔ nɛ kɛ wa kɔma kɔ 'Buki 'da Gale na: “Ma sɛ a nga takɔ Owi bɔlɔ zunɔ wa kpasa. Ní, nɛ kɛ 'da owi bɛ Gale do o'dã winɔ, ma ɔ sɛ nɛ nde?”

¹⁹ We duzu ki ni, ma wia na, owanɔ kɛ wa kpa ngamɔ ɔ nɛ kɛ zã Gale kɔ̃a ni, wa 'bana tɛ dɛ dia mɔ, nɛ wa hã tɛ wa dɛ tambala kɔ̃ Gale, kɛ a dɛa zɛ́ mɛnɔ vɛ, nɛ a dɛ olo nu a dɛa fai ni.