1 PETRO 3 - WE NU GALE 1995

We ngɔ dungi 'da owi wili do wukonɔ 'da wa

¹ Nɛ nɛ, owukonɔ tɛ mɛ 'bɔ, nɛ zélé nu owili nɛ. Kɔ fala kɛ ombe sanga owili nɛ, wa kɔ̃̀ we nu Gale gɔ, nɛ wa zɔ sɛ dia dɛa to tɛ nɛ kɛnɛ wa. Nɛ gɛnɛ kɔ nɛ tɔ̃̀ mbula hã wa tɔ̃a gɔ,

² nɛ wa zɔ sɛ dia dɛa to tɛ nɛ, do tɛlɛ tɛ kɛ nɛ zele nu wa ni, nɛ wa kifi sɛ sila wa iko.

³ Nɛ tɛ fà we hɔ dia wuko do wala dɛ mɔ zɔnga, ɔ nɛ dɛ zu wi, he'de mɔ mbali do dia tulu dɛ tɛ nɛ iko gɔ.

⁴ Nɛ nde ma wia na, dia wi 'da nɛ ma yolo kɔ sila nɛ. Nɛ ɔ́ do gɛa sila, nɛ nɛ dungu fio, we kɛ ki ni a dia wi kɛ ma 'dángá fala kpo gɔ, nɛ Gale zɔ ma na, mɛ a de mɔ ngboo.

⁵ Owukonɔ zɛ́ dati gɛ, kɛ wa kɔ̃a zi Gale, nɛ wa gbini zi zã wa do a, nɛ wa zele nu wili wa ni, wa 'dafa zi tɛ wa na mɛ ni.

⁶ Ma ɔ nɛ kɛ Sara zele zɛ́ nu wili a Abrahama, nɛ a sa zɛ́ 'bɔ li a na nwa 'da ɛ ni. Kɔ fala kɛ nɛ dɛ de mɔ, nɛ nɛ do kili kɔ sila nɛ bina, nɛ nde nɛ hɔa benɔ 'da Sara.

⁷ We duzu nɛ Owi wilinɔ tɛ mɛ 'bɔ, ma wia na, nɛ mba sila nɛ kpo do wukonɔ 'da nɛ, nɛ nɛ lengge do kɛ na, wa ngàndà ɔ nɛ nɛ ni gɔ. Nɛ dɔ́nggɔ́ wa, we kɛ wa mba do nɛ kpo we kpa kpasi, kɛ Gale hã ma hã owele do dia zã iko ni. Kɔ nɛ dɛ ni, nɛ nɛ sambala sɛ Gale nɛ́ kɛ ma wia ni.

Nɛ zɔ ngamɔ we dɛ mɔ kɛ ma a bɔlɔ ni

⁸ Tala lɛnggɛ mi nɛ tɔ̃ hã nɛ ma kɛ: Nɛ vɛ, nɛ ɔ́ do linggamɔ kpo, nɛ nɛ ĩ 'bako hã ngba nɛ. Nɛ nɛ kɔ̃́ gɛnɛ ngba nɛ ɔ nɛ onya wi ni. Nɛ ɔ́ do de sila dɛ 'da ongba nɛ, nɛ nɛ bá 'bɔ tɛ nɛ dɛ nù.

⁹ Wele dɛ 'dã mɔ dɛ 'da nɛ, nɛ nɛ tɛ gèsè 'dã mɔ do nɛ hã a gɔ. Tabi a dã nɛ nde, nɛ nɛ tɛ dã̀ a gɔ, nɛ nde nɛ wélé nu nɛ tɛ a. Mba gɔ, 'da fala kɛ Gale sa zi mɔ hã nɛ ni, nɛ a kpua zi mbulu na, ɛ wele sɛ nu ɛ tɛ nɛ.

¹⁰ Ma ɔ nɛ kɛ wa kɔma zɛ́ kɔ 'Buki 'da Gale na: “Wi kɛ a kɔ̃ na, ɛ dungu do dia nɛ, nɛ ɛ ɔ do yangga ngɔ nù gɛ, ma wia na, a tɛ 'bìlì bɛlɛ gɔ, nɛ a tɛ ɔ̀lɔ̀ ngba a gɔ.

¹¹ A bɛ gɛnɛ dɛ 'dã mɔ, nɛ a dɛ de mɔ, nɛ a ba tɛ̃ a vɛ̃ we fa na, a e dungu fio sanga Owele.

¹² We kɛ Nwa Gale zɔ mɔ tɛ owi bɔlɔ zu, nɛ a gɛ zala a we zele sambala 'da wa. Nɛ nde a siki 'do a hã owi dɛ 'dã mɔ.”

¹³ Kɔ fala kɛ nɛ ba sila nɛ vɛ̃ we dɛ de mɔ, nɛ wi nɛ dɛ sɛ nɛ 'danga a wio nde?

¹⁴ Gɛnɛ kɔ nɛ zɔ ngamɔ we duzu bɔlɔ zu dɛa mɛ 'da nɛ, nɛ nde nɛ a wi yangga. Nɛ tɛ dɛ̀ kili owinɔ gɔ, nɛ sila nɛ tɛ yɛ̀kɛ̀ gɔ.

¹⁵ Nɛ nde nɛ dɔ́nggɔ́ Kristo do kɔ sila nɛ, nɛ nɛ kɔ̃ gɛnɛ a nɛ́ Nwa 'da nɛ. Kɔ fala kɛ owele wa aka nɛ na, gulu kɛ nɛ ia sila nɛ ngɔ Gale we ge nde, nɛ nɛ tɛ dɛ̀ kili tɔ̃ gulu nɛ hã wa gɔ.

¹⁶ Nɛ nde nɛ tɔ̃́ hã wa do gɛ̃a sila, nɛ nɛ dɔnggɔ wa. Nɛ dɛ́ fai a mɛ kɛ nɛ ĩ na, ma a bɔlɔ ni, takɔ winɔ kɛ wa dã zu li de dɛa mɛ kɛ nɛ dɛ ma do zu li Kristo ni, wa kpa sape we 'dã wenɔ wa tɔ̃ ni.

¹⁷ Mba gɔ, kpa zɛlɛ tɛ do de dɛa mɛnɔ nɛ dɛa ɔ nɛ kɛ Gale kɔ̃a ni, ma dia nɛa ngɔ kpa zɛla tɛ olo 'dã mɛnɔ nɛ dɛa ni.

¹⁸ Yezu Kristo do tɛ̃ a, a fia zi we 'dã mɛ 'da owinɔ fala kpo ia, a fé sɛ 'bɔ gɔ. A wi kɛ a dɛ̀ zi 'dã mɔ gɔ, nɛ a fia we duzu Owi dɛ 'dã mɔ, takɔ a gese nɛ dɛ 'da Gale. Wa gbɛa a, nɛ kili tɛ a fia, nɛ nde a tunu kɔ fio do ngawi 'da Hi Wi 'da Gale.

¹⁹ Nɛ do ngawi 'da kpo Hi Wi ni, a nɛa 'bɔ we be we nu Gale hã ohi winɔ kɛ wa kɔ le 'da fionɔ i ni.

²⁰ Ohi winɔ ni a wanɔ kɛ zɛ́ dati belee wa bɛa we zele nu Gale, nɛ Gale 'bɔa 'da wa do du sila na, wa kifi sila wa 'da fala kɛ zɛ́ Nowe tɛ dɛ masua, nɛ wa kìfì sila wa gɔ ni. Winɔ kɛ wa lia zɛ́ kɔ masua ni, wa dɛ̀lɛ̀ zɛ́ gɔ. Wa zɛ́ a Owele ngbɛ'dɛ'dɛ iko, nɛ Gale kpasa wa 'dɔ lì.

²¹ Nɛ lì ni, ma be lì batisimɔ kɛ ma kpasa nɛ kɔ 'dã mɛ 'da nɛ di ngangga gɛ ni. Nɛ lì nɛ kpa do batisimɔ ni, mɛ a kɛ ma fɔlɔ ndi tɛ nɛ ni gɔ, nɛ nde mɛ a kɛ lɛ aka do Gale na, a fo 'dã mɛ kɔ sila lɛ do'do ni. Batisimɔ ma kpasa nɛ, we duzu kɛ Yezu Kristo a tunu kɔ fio,

²² nɛ a si dɛ li nza i, nɛ a dungu tɛ ngawili kɔ̃ Gale. I mɔ ni, a dungu nwa ngɔ anzɛnɔ, do ogã winɔ do ohi winɔ vɛ kɛ wa do ngawi ni.