1 PETRO 2 - WE NU GALE 1995

Yezu a bɛlɛduma tɔa

¹ Kɔ we duzu ma, nɛ lá fala dɛ 'dã mɔ. Nɛ tɛ 'bìlì bɛlɛ gɔ, nɛ tɛ ɔ̀lɔ̀ wele gɔ, nɛ tɛ dè bɔnɛ gɔ, nɛ nɛ tɛ tɔ̃̀ tɛ ngba nɛ gɔ.

² Nɛ nde nɛ dɛ́ wɔ tɛ we nu Gale, ɔ nɛ kɛ onzɔ benɔ wa dɛ do wɔ tɛ lì bele naa wa ni. We nu Gale ma a sa, nɛ mɛ a li bele kɛ ma dala hi wele. Nɛ nɔ́ ma, takɔ kɔ̃a we 'da nɛ ma gã, nɛ nɛ kpa kpasi.

³ Mba gɔ, wa kɔma kɔ 'Buki 'da Gale na: “Nɛ zɔa dia zã 'da Nwa, nɛ nɛ kɔ̃a na, a a dia wi ngboo.”

⁴ Nɛ kɔ́lɔ́ do Kristo, wele kpasi. A a ta kɛ Owi dɛ tɔanɔ wa da zi ma nù, nɛ nde Gale zɔa na, a a dia wi ngboo, nɛ a saka a.

⁵ Kɔ ma wia na, nɛ winɔ kɛ nɛ kpa kpasi ni, nɛ ɔ tɛ mɛ 'bɔ nɛ tanɔ ni, takɔ Gale dɛ nɛ do tɔa ɔi 'da Hi Wi 'da a. Kɔ tɔa ni, nɛ sɛ a onganga santonɔ 'da a, takɔ nɛ hã dɔnggamɔ hã a do sila nɛ kpo. Dɔnggamɛ ni ma hã sɛ yangga hã a, we kɛ nɛ hã ma do wala 'da Yezu Kristo ni.

⁶ Mba gɔ, wa kɔma kɔ 'Buki 'da Gale na: “Nɛ zɔ́, mi saka dia ta ngboo, nɛ mi ia ma do ta bɛlɛduma kɔ le Sioni, we dɛ tɔa 'da mi ngɔ nɛ. Nɛ winɔ vɛ̃ kɛ wa kɔ̃a zu li a ni, sape bá sɛ li wa fala kpo gɔ.”

⁷ We duzu nɛ winɔ kɛ nɛ kɔ̃a zu li a ni, ta ni a dia ta ngboo. Nɛ nde we wanɔ kɛ wa kɔ̃̀ zu li a gɔ ni, ma a ní gɔ. Wa kɔma zɛ́ kɔ 'Buki na: “Ta kɛ Owi dɛ tɔanɔ wa da zi ma nù ni, ma hɔa ta bɛlɛduma tɔa, nɛ tɔa yolo we duzu ma.”

⁸ Nɛ wa kɔma 'bɔ na: “Mɛ a ta kɛ owinɔ wa kɔ do nyanga wa, nɛ ma fi wa nù ni.” Ta ni ma kɔa nyanga wa, we kɛ wa bɛ̃a we zele nu Gale. We duzu ma, Gale 'bili zɛ́ we 'da wa belee na, ma dɛ sɛ tɛ̃ ɛ hã wa na mɛ ni.

⁹ Nɛ nde we duzu nɛ, nɛ a nu fɛlɛ kula kɛ Gale saka nɛ ni. Nɛ a onganganɔ 'da Nwa. Nɛ a nu kɔnggɔ winɔ kɛ wa santo, nɛ nɛ a owinɔ 'da Gale ngboo. Gale saka zɛ́ nɛ, takɔ nɛ tɔ̃ gulu gba dia mɛnɔ 'da a hã owinɔ. A sa zɛ́ mɔ hã nɛ, nɛ a fua nɛ kɔ gba tũ dɛ nza, nɛ a a nɛ kɔ sa fala kɛ wa ɔngbɔ ma wena ni.

¹⁰ Zi dati, nɛ zi a winɔ 'da Gale gɔ. Nɛ nde ngangga gɛ, nɛ hɔa winɔ 'da a ia. Nɛ zi kɔ winɔ kɛ Gale ĩ 'bako hã wa ni bina. Kɔ ngangga gɛ, Gale ĩ 'bako hã nɛ ia.

Nɛ a Owi dɛa tonɔ 'da Gale

¹¹ Aa oyali ngba mi, nɛ ĩ na, nɛ ngɔ nù gɛ a gɛnɛ iko, ngbongbo le 'da nɛ ngɔ nù gɛ bina. We duzu ma, mi ala nu mi hã nɛ na, nɛ bɛ̃́ gɛnɛ 'dã wɔ kɔ kili tɛ nɛ, kɛ ma bi do dia linggamɛnɔ kɔ sila nɛ ni do'do.

¹² Nɛ dɛ́ bɔlɔ zu dɛa mɔ sanga owinɔ kɛ wa tɛ ĩ̀ ti Gale gɔ ni. Nɛ dɛ ní, hã gɛnɛ kɔ wa tɔ̃ na, nɛ a o'dã wi, nɛ wa zɔ sɛ de dɛa mɛnɔ kɛ nɛ dɛ ma fai ni, nɛ wa dɔnggɔ sɛ Gale do ngba soe kɛ a tɛ sɛ nɛ ni.

¹³ Nɛ́ kɛ nɛ a owinɔ 'da Nwa Yezu Kristo ni, ma wia na, nɛ zele nu onwanɔ ngɔ nù gɛ. Nɛ nɛ zélé nu gã nwa ngɔ nù Roma kɛ a ngɔ winɔ vɛ ni.

¹⁴ Nɛ nɛ zélé 'bɔ nu owi do li a, kɛ a tumba wa we hã etumbu hã owi dɛ 'dã mɛnɔ, do we dɔnggɔ owi dɛ de mɔ ni.

¹⁵ Mba gɔ, Gale kɔ̃a na nɛ dɛ de mɔ, takɔ ma kpe nu oyɔnda winɔ kɛ fo gbãlã zã wa bina ni.

¹⁶ Nɛ dɛ́ mɔ tɛ nɛ we do kɛ 'da owinɔ kɛ Yezu fua wa kɔ ngbá 'da 'dã mɔ ni. Nɛ nde ma tɛ bà wala hã nɛ we dɛ 'dã mɛnɔ vɛ kɛ zã nɛ kɔ̃a ni gɔ. Nɛ dɛ́ mɔ tɛ nɛ ɔ nɛ kɛ ma wia do owi dɛa tonɔ 'da Gale ni.

¹⁷ Nɛ dɔ́nggɔ́ winɔ vɛ, nɛ nɛ kɔ̃́ gɛnɛ onya nɛ wi kɔ̃a wenɔ. Nɛ dɛ́ kili Gale, nɛ nɛ zélé nu gã nwa ngɔ nù Roma.

Ngamɛnɔ kɛ Kristo zɔa ni ma be mɔ hã Iɛ

¹⁸ Aa nɛ, Owi dɛa tonɔ, nɛ zélé nu onwa ngɔ nɛ, nɛ nɛ dɔ́nggɔ́ wa. Nɛ tɛ dɔ̀nggɔ̀ tati a wanɔ kɛ sila wa a dia, nɛ li wa mbɔkɔ wena ni iko gɔ, nɛ nde nɛ dɔ́nggɔ́ 'bɔ wanɔ kɛ li wa kolo wena ni.

¹⁹ Fala kɛ wele lengge Gale, nɛ a kunu sila a ngɔ zɛlɛ tɛnɔ kɛ wa hã ma hã a iko ni, nɛ nde ki ni a dia mɔ li Gale.

²⁰ Kɔ fala kɛ mɔ dɛ 'dã mɔ, kɔ wa zɛ mɔ we nɛ, kɔ mɔ kpãlã sila mɔ, nɛ wi nɛ dɔnggɔ mɔ we duzu ki ni a wio nde? Kɔ mɔ dɛ de mɔ, kɔ wa hã zɛlɛ tɛ hã mɔ iko, kɔ mɔ kpãlã sila mɔ, nɛ nde ki ni a dia mɔ li Gale.

²¹ Mba gɔ, Gale sa mɔ hã nɛ na, nɛ zɔ ngamɔ na mɛ ni, we kɛ Kristo zɔa zi tɛ mɛ 'bɔ ngamɔ we duzu nɛ. Nɛ a bia wala hã nɛ, takɔ nɛ zɔ tɛlɛ tɛ kɛ a dɛa zi ni, nɛ nɛ 'bã do kɔ̃ a.

²² Kristo dɛ̀ zi mbe 'dã mɔ kpo gɔ, nɛ a 'bìlì mbe bɛlɛ fala kpo gɔ.

²³ Owinɔ wa dã zi a, nɛ a dã̀ wa olo nɛ gɔ. Wa zɛlɛ zi tɛ̃ a, nɛ a gèsè 'dã nu we hã wa gɔ. A ia zi tɛ a vɛ dɛ kɔ̃ Gale, kɛ a 'bili we do bɔlɔ nɛ ni.

²⁴ Kristo ba zi tole 'dã mɛnɔ 'da lɛ dɛ zu a tɛ ngɔ finda te. A dɛa ni, takɔ lɛ ɔ nɛ fio dati mɛnɔ kɛ ma zɔa 'dã mɔ ni, nɛ lɛ ɔ do kpasi we dɛ mɛ kɛ ma a bɔlɔ li Gale ni. Nɛ daninɔ tɛ Kristo ni, ma kpasa lɛ.

²⁵ Mba gɔ, nɛ ɔ zi nɛ obatanɔ kɛ wa yɔa wala ni. Nɛ nde ngangga gɛ, nɛ kpula tɛ nɛ dɛ 'da Wele kɛ a fɔmɔ nɛ, nɛ a zɔ 'bɔ mɔ tɛ nɛ kɔ dungu nza 'da nɛ ni.