1 PETRO 1 - WE NU GALE 1995

¹ Wi a mi Petro, wi nɛ toe 'da Yezu Kristo, mi kɔmɔ mbɛti gɛ hã nɛ, winɔ kɛ Gale saka nɛ do winɔ 'da a ni. Ngangga gɛ, nɛ pɛsa do ngɔ nù Pɔ̃, do Galati, Kapadɔsɛ, Azi, do Bitini, nɛ nɛ i mɔ a ogɛnɛ.

² Baa lɛ Gale 'bili zɛ́ do kɔ sila ɛ belee we saka nɛ do owinɔ 'da a, nɛ a hã 'bɔ Hi Wi 'da a hã nɛ, we 'dafa sila nɛ, takɔ nɛ zele we nu Yezu Kristo, nɛ tɔkɔ tɛ Yezu fɔlɔ 'dã mɛnɔ 'da nɛ na, nɛ hɔ sa wi li Gale. E kɔ Gale be dia zã 'da a hã nɛ, nɛ a dɛ na, nɛ ɔ do gɛ̃a sila fai.

Lɛ dɔ́nggɔ́ Gale we kpasi a ha hã lɛ ni

³ Lɛ dɔ́nggɔ́ Gale, Baa Nwa 'da lɛ Yezu Kristo, we kɛ a ĩ 'bako hã lɛ wena, nɛ a hã mbé kpasi hã lɛ do wala 'da Yezu Kristo, kɛ a tunu a kɔ fio ni. Ma kɛ lɛ e sila lɛ ngɔ kpasi kɛ lɛ kpa sɛ ma ni.

⁴ Nɛ lɛ gbini zã lɛ do Gale na, a hã sɛ 'bɔ dia mɛ kɛ a usu ma ngɔ i we duzu winɔ 'da a ni hã lɛ. Mɛ a dia mɛ kɛ ma wè tɛ mbulu nɛ gɔ, nɛ ma bá ndi gɔ, nɛ ma 'dángá sɛ 'bɔ gɔ ni.

⁵ Nɛ́ kɛ nɛ do kɔ̃a we dɛ 'da Gale ni, ma kɛ a fɔmɔ nɛ do ngawi 'da a gbaa na, nɛ kpa sɛ kpasi ni. Mɛ a kpasi kɛ ma be sɛ tɛ̃ ɛ nza do ndɔti nùi ni.

⁶ We duzu ki ni, gɛnɛ kɔ nɛ kpa ngamɔ kpi do kpi kɔ bi tũnɔ sĩ lɛ do ma gɛ nde, nɛ nɛ dɛ́ yangga.

⁷ Mba gɔ, ngamɛnɔ ni, ma yamba nɛ we ĩ na, kɔ̃a we 'da nɛ mɛ a ngbongbo kɔ̃a we nde? Nɛ zɔ́ mɔ mbali, gɛnɛ kɔ ma ɔ́ fai gɔ, nɛ nde owele wa ba ma, nɛ wa fi li we we yamba ma na, ma a dia nde. Do kpo wala ni, Gale yamba kɔ̃a we 'da nɛ kɛ ma dia nɛa ngɔ mɔ mbali wena ni, we ĩ na, mɛ a ngbongbo kɔ̃a we nde? A dɛ ni, takɔ nɛ kpa dɔngga wi, do dɔ̃lɔ̃ li, nɛ sako li nɛ he do ngba soe kɛ Yezu Kristo a tɛ sɛ 'bɔ nɛ ni.

⁸ Gɛnɛ kɔ nɛ tɛ zɔ̀ Yezu do gbali nɛ gɔ, nɛ nde nɛ kɔ̃a gɛnɛ a. Nɛ gɛnɛ kɔ nɛ zɔ́ 'bɔ a di ngangga ni gɔ, nɛ nde nɛ kɔ̃a zu li a. We duzu ma, nɛ dɛ yangga gã la li, do tɛlɛ tɛ kɛ wele wè tɛ tɔ̃ ma tɔ̃a gɔ ni,

⁹ we kɛ Gale a hã sɛ kpasi kɛ nɛ e sila nɛ ngɔ nɛ ni hã nɛ.

¹⁰ Owi gba do nu Gale wa yambala zɛ́ gulu kpasi ni, nɛ wa tɔ̃a gulu dia mɛ kɛ Gale nɛ hã hã nɛ do dia zã 'da a ni.

¹¹ Nɛ Hi Wi 'da Kristo kɛ a zi kɔ sila wa ni, a tɔ̃a zi hã wa na, Kristo a kpa sɛ zɛlɛ tɛ dati kɛ na a kpa dɔ̃lɔ̃ li ni. Nɛ owi gba olo nu Gale ni wa fa zɛ́ wena we ĩ ti tũnɔ kɛ mɛnɔ ni ma hɔ sɛ nɛ ni, do tɛlɛ tɛ kɛ mɛnɔ ni ma dɛ sɛ do tɛ̃ ɛ ni.

¹² Nɛ Gale bia hã wa na, toe kɛ ɛ tumba wa we tɔ̃ ma ni, ma we duzu wa wele nɛ gɔ, nɛ nde ma we duzu nɛ, winɔ sɔɛ gɛ. Ma kɛ ngangga gɛ, winɔ kɛ wa be Dia Sakoe ni, wa tɔ̃a toe ni hã nɛ ia. Nɛ wa tɔ̃a ma do ngawi 'da Hi Wi Santo kɛ Gale tumba a yolo do li nza i ni. Nɛ anzɛnɔ wa kɔ̃a sɔ 'bɔ we ĩ ti mɛnɔ ni.

Dɛa mɔ tɛ wi kɛ ma hã yangga ha Gale

¹³ We duzu ma, nɛ 'dáfá linggamɛnɔ 'da nɛ we dɛ to hã Gale. Nɛ ɔ́ do sɔ̃a li, nɛ nɛ é sila nɛ ngɔ dia mɛ kɛ nɛ kpa sɛ do ngba soe kɛ Yezu a tɛ sɛ nɛ ni.

¹⁴ Nɛ zélé nu Gale ɔ nɛ kɛ obe wa zele do nu baa wa ni. Nɛ nɛ tɛ kɔ̃̀ 'bɔ gɛnɛ o'dã wɔ kɔ kili tɛ nɛ, kɛ nɛ zi do ma dati kɛ nɛ tɛ ĩ̀ ti Dia Sakoe 'da Yezu Kristo gɔ ni gɔ.

¹⁵ Gale kɛ a sa zi mɔ hã nɛ ni, a a santo. Nɛ ma wia na, nɛ tɛ mɛ 'bɔ, nɛ ɔ santo kɔ dɛa mɔ tɛ nɛ vɛ.

¹⁶ Mba gɔ, wa kɔma kɔ 'Buki 'da Gale na: “Nɛ ɔ́ santo, we kɛ mi Gale, mi santo.”

¹⁷ Fala kɛ nɛ sambala, nɛ nɛ sa li Gale na, Baa nɛ. Gale a zɔ́ bula li wi gɔ, nɛ nde a 'bili we 'da wele do wele we do 'da mɛnɔ a dɛ ni. Na mɛ ni, ma wia na, 'da fala kɛ nɛ 'bana ngɔ nù gɛ ni, nɛ dɔnggɔ a do dia dɛa mɔ tɛ nɛ.

¹⁸ Mba gɔ, nɛ ĩ ti wala kɛ Gale gɔna do zu nɛ ti yia dungi oyaa nɛ wa bia hã nɛ ni. A gɔ̀nɔ̀ zu nɛ do mbili tabi mɔ mbali, kɛ ma 'danga dɔ̃ iko ni gɔ.

¹⁹ Nɛ nde a gɔna zu nɛ do tɔkɔ tɛ Kristo, kɛ ma dia nɛa ngɔ mɔ vɛ ni. Kristo ɔ nɛ be bata kɛ a do 'dã mɔ tabi ndi bi sĩ tɛ a bina, nɛ wa gbɛa a hã Gale ni.

²⁰ Dati kɛ na Gale dɛ nùi ni, nɛ a saka zɛ́ Yezu na, a kpasa sɛ nɛ. Nɛ nde do ndɔti ngba soenɔ gɛ, Gale dɛa na, Yezu hɔ nù gɛ we duzu nɛ.

²¹ Kɔ we duzu a, nɛ nɛ kɔ̃a zu li Gale, kɛ a tunu zi a kɔ fio, nɛ a hã dɔ̃lɔ̃ li hã a ni. Gale dɛa ni, takɔ nɛ ɔ do kɔ̃a we, nɛ nɛ gbini 'bɔ zã nɛ do a.

²² Di ngangga gɛ, nɛ zila nu Gale, nɛ bɛ̃a gɛnɛ 'dã mɔ, nɛ sila nɛ sa, nɛ nɛ kɔ̃a gɛnɛ onya nɛ wi kɔ̃a wenɔ do ngbongbo nɛ. Kɔ ma wia na, nɛ kɔ̃ gɛnɛ ngba nɛ dɛ dati do sila nɛ vɛ.

²³ Nɛ ĩ́ na, wa kua nɛ fala bɔa. Wi ko nɛ, wi a obaa wi kɛ wa fe fio fia ni gɔ, nɛ nde wi a Baa nɛ Gale kɛ a fé fio gɔ ni. A kua nɛ do we nu a kɛ ma hã kpasi, nɛ ma 'bana sɛ fai ndɔti nɛ bina ni.

²⁴ Wa kɔma zɛ́ kɔ 'Buki 'da Gale na: “Wele ɔ nɛ wɔkɔsɔ ni, a dúngú nza 'do nɛ nyɛlɛ gɔ. Dɔ̃lɔ̃ li 'da wele ɔ nɛ do te ni. Wɔkɔsɔ kolo, nɛ do nɛ ala.

²⁵ Nɛ nde we nu Nwa Gale ma 'bana sɛ fai ndɔti nɛ bina.” We nu Gale ni, mɛ a Dia Sakoe kɛ wa tɔ̃a hã nɛ ni.