1 TƐSALONIKƐ 5 - WE NU GALE 1995

Nɛ 'dáfá tɛ nɛ we 'bɔ 'da tɛa 'da Yezu

¹ Onyae, lɛ wè do kɔmɔ mbɛti hã nɛ ngɔ ngba soe kɛ mɛnɔ ni ma dɛ sɛ tɛ̃ ɛ ni kɔma gɔ.

² Mba gɔ, nɛ ngboo nɛ ĩ na, ngba soe kɛ Nwa a tɛ sɛ nɛ ni, ma gbanga sɛ lɛ ɔ nɛ wi zũ, kɛ a tɛ we zũ mɔ do tũ ni.

³ 'Da fala kɛ owele wa ma sɛ ngɔ tɔ̃ na: “Lɛ vɛ a dia iko, fo mɔ yɛkɛ lɛ bina” ni, nɛ ngamɔ ma gbanga sɛ wa nɛ́ kɛ zɛlɛ kula gbanga do wi zã ni, nɛ nde fo sɛ wala na wa yu ma bina.

⁴ Kɔ we duzu nɛ, onyae, nɛ a kɔ gba tũ gɔ, ngba soe ni wè tɛ mbala nɛ ɔ nɛ hɔa 'da wi zũ gɔ.

⁵ We kɛ nɛ vɛ, nɛ a owi kɔ sa fala do gba wese. Lɛ a owi kɔ gba tũ, tabi kɔ tũ fala gɔ.

⁶ Na mɛ ni, lɛ tɛ ɔ̀ yala nɛ́ ogele winɔ gɔ, nɛ nde lɛ dúngú do sɔ̃a li, nɛ lɛ dĩ́lĩ́ fala tɛ lɛ.

⁷ Owi ɔ yala wa ɔ yala do tũ, nɛ owi bá dɔ̃ wa te bá dɔ̃ do tũ.

⁸ Nɛ nde lɛ, kɛ lɛ kɔ sa fala ni, ma wia na lɛ dĩlĩ fala tɛ lɛ. Lɛ dúngú do kɔ̃a we dɛ 'da Gale, nɛ lɛ 'bana tɛ kɔ̃ gɛnɛ ngba lɛ, nɛ ma ɔ nɛ tulu bolo kɛ lɛ hi'da dɛ tɛ lɛ ni. Lɛ gbíní zã lɛ do kpasi kɛ Yezu a hã sɛ ma hã lɛ ni, ma ɔ nɛ ndasa bolo kɛ lɛ gu zu lɛ ni.

⁹ Mba gɔ, Gale sàkà zi lɛ na, nɔ̃lɔ̃ zã 'da a te ngɔ lɛ gɔ, nɛ nde a saka lɛ na, lɛ kpa kpasi do wala 'da Nwa 'da lɛ Yezu Kristo.

¹⁰ Mba gɔ, Yezu fia we duzu lɛ, takɔ do ngba soe a tɛ sɛ ni, gɛnɛ kɔ lɛ fe fia, tabi lɛ 'bana nza nde, nɛ lɛ ɔ do kpasi fala nɛ kpo do a.

¹¹ We duzu ma, nɛ kpãlã sila ngba nɛ, nɛ nɛ dɛ́ nganda na, nɛ gã 'da kɔ̃a we 'da ngba nɛ, ɔ nɛ kɛ nɛ dɛ ni.

Ndɔti lɛnggɛ 'da Polo

¹² Onyae, lɛ aka nɛ na, nɛ dɔ́nggɔ́ owinɔ sanga nɛ, kɛ Nwa ia wa na wa kpe ti nɛ, nɛ wa bɔlɔ nɛ ni.

¹³ Nɛ kɔ̃́ gɛnɛ wa, nɛ nɛ dɔ́nggɔ́ wa wena, we duzu dɛa toe wa dɛ ma sanga nɛ ni. Nɛ nɛ dɛ́ na do ongba nɛ.

¹⁴ Onyae, mɛ lɛ aka nɛ we nɛ ni ma kɛ: Nɛ kɔ́'dɔ́ osulu winɔ, nɛ nɛ ngándá sila owi dɛ kilinɔ, nɛ nɛ gálá owanɔ kɛ wa do ngawi bina ni, nɛ nɛ ɔ́ do du sila dɛ 'da winɔ vɛ.

¹⁵ Nɛ fi nɛ sɔ̃́ na, da dɛ kɔ wele bílí gbã hã ngba a olo 'dã mɔ gɔ, nɛ nde nɛ fá fai we dɛ dia mɔ hã ngba nɛ, nɛ nɛ dɛ ni dɛ 'da owinɔ vɛ.

¹⁶ Nɛ dúngú fai do yangga.

¹⁷ Nɛ nɛ tɛ ɔ̀mɔ̀ tɛ sambala Gale gɔ,

¹⁸ nɛ há iɔ̃nae hã a 'da falanɔ vɛ. Mɛ kɛ Gale kɔ̃a na nɛ, Owi Kristonɔ nɛ dɛ ma gɛ a ni.

¹⁹ Nɛ tɛ kpè wala ti Hi Wi Santo gɔ.

²⁰ 'Da fala kɛ wele gba olo nu Gale, nɛ nɛ tɛ zɔ̀ ma yala iko gɔ.

²¹ Nɛ nde nɛ yámbá wenɔ ni vɛ̃, nɛ nɛ saka dia kɛ, nɛ nɛ kɔ̃ gɛnɛ nɛ,

²² nɛ nɛ bɛ̃́ gɛnɛ 'dã mɛnɔ vɛ̃.

²³ E kɔ Gale, wele gɛa sila dɛ na, nɛ hɔ owinɔ 'da a ngboo, nɛ a zɔ́ mɔ tɛ hi nɛ, do sila nɛ, do kifi tɛ nɛ vɛ̃ do dia nɛ na, da dɛ kɔ nɛ kpá kɔ'dɔ wi do ngba soe kɛ Nwa 'da lɛ Yezu Kristo a tɛ sɛ nɛ ni gɔ.

²⁴ Wi kɛ a sa mɔ hã nɛ ni, a dɛ sɛ olo nu a, we kɛ a lá fala dɛ olo nu a gɔ.

²⁵ Aa onyae, nɛ sámbálá 'bɔ Gale we duzu lɛ.

²⁶ Nɛ nɛ fáná onya lɛ vɛ̃, nɛ nɛ úfú zala wa ɔ nɛ kɛ ma wia do owinɔ 'da Gale ni.

²⁷ Mi aka nɛ do zu fi Nwa na, nɛ tɔ́lɔ́ mbɛti gɛ hã onya lɛ wi kɔ̃a wenɔ vɛ̃.

²⁸ E kɔ dia zã 'da Nwa 'da lɛ Yezu Kristo ma 'bana do nɛ.