1 TƐSALONIKƐ 4 - WE NU GALE 1995

Nɛ dɛ mɔ tɛ nɛ ɔ nɛ kɛ Gale kɔ̃a ni

¹ Kɔ onyae, lɛ bia zi tɛlɛ tɛ kɛ nɛ wia tɛ dungu nɛ, we hã yangga hã Gale ni hã nɛ, nɛ lɛ ĩ na, nɛ ndua dɛ na mɛ ni ia. Nɛ nde ngangga ni, lɛ aka nɛ, nɛ lɛ dala nu lɛ hã nɛ do zu li Nwa Yezu na, nɛ 'dafa 'bɔ dɛa mɔ tɛ nɛ dɛ dati.

² Nɛ ĩ ti wenɔ kɛ lɛ bia zi ma hã nɛ do zu li Nwa Yezu ni.

³ Gale kɔ̃a na, nɛ ɔ́ owinɔ 'da a ngboo, nɛ nɛ yú dɛ mɔ sape.

⁴ Ma wia na, wele do wele dungu do wuko 'da a ɔ nɛ kɛ ma wia li Gale, nɛ ma wia 'bɔ li winɔ ni.

⁵ Nɛ a tɛ nɛ̀ 'dɔkɔlɔ 'dã wɔ kɔ sila a ɔ nɛ opaganɔ, kɛ wa ĩ̀ ti Gale gɔ ni gɔ.

⁶ Kɔ ba ngba wi ni, ma wè na wele ɔlɔ ngba ɛ, nɛ a dɛ a 'danga gɔ. Lɛ tɔ̃a zi hã nɛ ia, nɛ lɛ dala nu lɛ hã nɛ na, Nwa Gale a bili sɛ gbã hã winɔ kɛ wa dɛ yɔa ti mɛnɔ ɔ nɛ ki ni ni.

⁷ Gale sà zi mɔ hã lɛ we dɛ mɔ sape gɔ, nɛ nde a sa mɔ hã lɛ na, lɛ ɔ owinɔ 'da a ngboo.

⁸ We duzu ma, wi kɛ a bɛ̃ gɛnɛ mbula gɛ, nɛ nde a bɛ̃̀ gɛnɛ wele gɔ, a bɛ̃a gɛnɛ Gale, kɛ a hã Hi Wi Santo 'da a hã nɛ ni.

⁹ Kɔ ma wè 'bɔ na, lɛ kɔmɔ mbɛti hã nɛ ngɔ kɔ̃ ngba wi sanga nɛ Owi Kristonɔ kɔma gɔ. Mba gɔ, Gale a bia tɛlɛ tɛ kɛ nɛ wia tɛ kɔ̃ do ngba nɛ ni hã nɛ.

¹⁰ Nɛ mi zɔa na, nɛ dɛa na mɛ ni dɛ 'da onya nɛ tɛ ngɔ nù Masedɔanɛ vɛ̃. Nɛ nde onyae, lɛ dala 'bɔ nu lɛ hã nɛ na, nɛ kɔ̃ gɛnɛ ngba nɛ dɛ dati.

¹¹ Nɛ dɛ́ nganda na, nɛ dungu do gɛa sila do ongba nɛ, nɛ nɛ tɛ à sila nɛ ngɔ ngba nɛ gɔ. Nɛ wele do wele dɛ to do kɔ̃ a we kpasa do ma, ɔ nɛ kɛ lɛ tɔ̃a zi hã nɛ ni.

¹² Nɛ dɛ ní, nɛ owinɔ kɛ wa ĩ̀ ti Gale gɔ ni, wa dɔnggɔ sɛ nɛ, nɛ nɛ sɛ a dĩ tole we wele gɔ.

Yezu a tɛ sɛ 'bɔ

¹³ Aa onyae, lɛ kɔ̃̀ na, nɛ yɔ ti mɛ kɛ ma dɛ sɛ owinɔ kɛ wa fia ia ni gɔ, dɔ nɛ dúngú do 'bako ɔ nɛ owinɔ kɛ wa gbíní zã wa do Gale gɔ ni gɔ.

¹⁴ Mba gɔ, nɛ́ kɛ lɛ kɔ̃a na Yezu fia, nɛ a za'da nza kɔ fio, nɛ a do kpasi ni, lɛ kɔ̃a 'bɔ na, Gale a tunu sɛ owinɔ kɛ wa fia, nɛ nde wa kɔ̃a zu li a kɔ̃a ni kɔ fio fala nɛ kpo do Yezu.

¹⁵ Nɛ zɔ́ kpo we kɛ Nwa bia zi hã lɛ, nɛ lɛ be ma hã nɛ gɛ ma kɛ: Lɛ winɔ kɛ lɛ 'bana sɛ do tunu li lɛ do kɔ̃ tũi kɛ Nwa a tɛ sɛ nɛ ni, lɛ lá sɛ dati hã wanɔ wa fia zi ni gɔ.

¹⁶ Do ngba soe nɛ ni, nɛ mbisa we ma wele sɛ nganda wena, nɛ wa zele sɛ giti gɛlɛ gã nwa ngɔ anzɛnɔ, do giti mɔtũlũ 'da Gale. Nɛ Nwa Yezu Kristo do tɛ̃ a ngboo, a yolo sɛ li nza i, nɛ a zĩlĩ. Nɛ owinɔ kɛ wa fia, nɛ nde wa kɔ̃a zu li a kɔ̃a ni, wa tunu sɛ kɔ fio dati.

¹⁷ Dɛ 'do nɛ, nɛ lɛ, kɛ lɛ 'bana do tunu li lɛ 'da fala nɛ ni, Gale a kala sɛ lɛ do wa fala nɛ kpo dɛ sanga kutunɔ, we gɔnɔ dati Nwa dɛ li ngɔ i. Na mɛ ni, nɛ lɛ sɛ do Nwa fala nɛ kpo fai.

¹⁸ Kɔ ma wia na, nɛ ngándá sila ngba nɛ do wenɔ gɛ.