1 TƐSALONIKƐ 3 - WE NU GALE 1995

Polo tumba Timote we zɔ owi Tɛsalonikɛ

¹ We duzu ma, lɛ wè zi tɛ kunu 'bɔ sila lɛ gbaa gɔ, ma kɛ lɛ kɔ̃a na, lɛ 'bana tati a lɛ bɔa dɛ Atɛnɛ nga,

² nɛ lɛ tumba nya lɛ Timote hã nɛ. A a wi kɛ a mba do lɛ kpo kɔ dɛa to 'da Gale we be Dia Sakoe 'da Kristo. Lɛ tumba a na, a kpãlã sila nɛ, nɛ a nganda kɔ̃a we 'da nɛ na,

³ dɔ wele kpo sanga nɛ mbɔ́kɔ́, we duzu ngamɛnɔ kɛ nɛ zɔ ma ni gɔ. Mba gɔ, nɛ ĩ na ngamɛnɔ lɛ zɔ ni, mɛ a wala kɛ Gale saka we lɛ.

⁴ 'Da fala lɛ 'bana zi sanga nɛ i ni, nɛ lɛ tɔ̃a zi hã nɛ belee na, lɛ zɔ sɛ ngamɔ. Nɛ ma dɛa tɛ̃ ɛ ɔ nɛ kɛ nɛ ĩ ni.

⁵ Gulu nɛ a mi wè tɛ kunu sila mi gɔ, nɛ mi tumba Timote we zɔ na, kɔ̃a we 'da nɛ ɔ tabi nɛ nde? We kɛ mi dɛ kili na, da dɛ kɔ Satana ɔ́lɔ́ nɛ, kɔ do toe 'da lɛ ɔ yala iko gɔ.

⁶ Nɛ nde ngangga ni, Timote kpula tɛ̃ a, nɛ a tɔ̃a dia sakoe 'da nɛ hã lɛ na, nɛ 'bana do kɔ̃a we dɛ 'da Gale, nɛ nɛ 'bana tɛ kɔ̃ ngba nɛ. A tɔ̃a 'bɔ na, nɛ 'bana tɛ lengge lɛ de wena, nɛ nɛ do wɔ we zɔ tɛ lɛ ɔ nɛ kɛ lɛ tɛ mɛ 'bɔ do wɔ we zɔ tɛ nɛ ni.

⁷ Na mɛ ni, onyae, kɔ̃a we 'da nɛ ma nganda sila lɛ kɔ ngamɛnɔ, do zɛlɛ tɛnɔ kɛ lɛ kpa ma ni.

⁸ Kɔ ngangga ni, lɛ kpa mbé ngawi, we kɛ nɛ 'bana do nɔa sila kɔ mba li ngba wi 'da nɛ do Nwa Yezu.

⁹ Kɔ lɛ nɛ hã iɔ̃nae hã Gale we duzu nɛ tɛlɛ tɛ nɛ nɛ nde? We kɛ yangga kɛ nɛ hã ma hã lɛ dati a ni, ma nɛa ngɔ mɛnɔ vɛ̃.

¹⁰ Nɛ tũ do gba wese, lɛ sambala Gale do sila lɛ vɛ na, a hã wala hã lɛ, kɔ lɛ zɔ 'bɔ mbé tɛ nɛ, takɔ lɛ be tala mɛnɔ kɛ nɛ zɔla ma kɔ kɔ̃a we 'da nɛ ni hã nɛ.

¹¹ E kɔ Baa lɛ Gale do tɛ̃ a, do Nwa 'da lɛ Yezu wa 'dafa wala hã lɛ na, lɛ hɔ 'da nɛ i.

¹² E kɔ Nwa gã 'da kɔ̃a zã 'da nɛ dɛ 'da ngba nɛ do 'da owinɔ vɛ dɛ dati fai, takɔ ma we kɔ̃ do kɔ̃a zã lɛ kɔ̃a do nɛ ni.

¹³ Na mɛ ni, a hã sɛ kpã sila hã nɛ, kɔ do ngba soe kɛ Nwa 'da lɛ Yezu a tɛ sɛ do owinɔ 'da a ni, nɛ fo sɛ mɔ kɔ'dɔ nɛ we nɛ bina, nɛ nɛ sɛ santo gbali Baa lɛ Gale.