1 TƐSALONIKƐ 2 - WE NU GALE 1995

Dɛa toe 'da Polo tɛ Tɛsalonikɛ

¹ Aa onyae, nɛ ngboo nɛ ĩ na, olo gɛnɛ kɛ lɛ nɛa zi 'da nɛ i ni là iko gɔ.

² Nɛ ĩ na, dati hɔ 'da nɛ i, owi kɔ le Filipɛ wa zɛlɛ zi tɛ lɛ, nɛ wa dã zi lɛ wena. Nɛ nde Gale kpãlã zi sila lɛ we be Dia Sakoe 'da a hã nɛ. Ĩ na, ombe wa bɛ̃ zi 'bɔ gɛnɛ lɛ wena.

³ Mba gɔ, lɛ bè zi wenɔ hã nɛ do bɛlɛ, tabi do gele linggamɔ gɔ. Nɛ lɛ fà zi 'bɔ we ɔlɔ wele gɔ.

⁴ Nɛ nde lɛ tɔ̃ zi fai nɛ́ kɛ Gale kɔ̃a na lɛ tɔ̃ ni. We kɛ Gale yamba zi sila lɛ dati, nɛ a zɔa na lɛ wia li a, ma kɛ a ia Dia Sakoe dɛ kɔ̃ lɛ na, lɛ be ma ni. Lɛ fá we hã yangga hã Owele gɔ, nɛ nde lɛ fa we hã ma hã Gale kɛ a ĩ ti linggamɔ kɔ sila lɛ ni.

⁵ Nɛ ĩ na, lɛ bè zi wé do ɛfɛ̃ lɛnggɛ we tɛmbɛlɛ nɛ gɔ, nɛ lɛ fà zi 'bɔ we kpa mɔ kɔ̃ nɛ gɔ, nɛ Gale ĩ 'bɔ ma.

⁶ Lɛ fà zi we kpa dɔ̃lɔ̃ li tabi kɔ̃ nɛ, tabi kɔ̃ ogele winɔ gɔ.

⁷ Gbãlã we, lɛ wia sɔ we be tɛ lɛ nɛ́ gã wi ni, we kɛ lɛ a wi nɛ tonɔ 'da Kristo, nɛ nde lɛ dɛ̀ zi ni gɔ. Lɛ dungu zi sanga nɛ do dia sila, ɔ nɛ naa be kɛ a dala obenɔ 'da a, nɛ a zɔ mɔ tɛ wa ni.

⁸ Lɛ kɔ̃ zi gɛnɛ nɛ wena, ma kɛ lɛ bè zi hã nɛ tati a Dia Sakoe 'da Gale iko gɔ, nɛ nde lɛ kɔ̃a zi 'bɔ we ba tɛ lɛ vɛ hã nɛ, we kɛ nɛ ngɔ sila lɛ.

⁹ Onyae, nɛ ĩ ti tɛlɛ tɛ kɛ lɛ gbɛa zi do tɛ lɛ li dɛa toe ni. 'Da fala kɛ lɛ be zi Dia Sakoe 'da Gale hã nɛ ni, lɛ dɛ zi to tũ do gba wese na, dɔ lɛ ha dĩ tole hã wele kpo sanga nɛ gɔ.

¹⁰ Nɛ nɛ zɔa tɛlɛ tɛ kɛ lɛ dungu zi sanga nɛ wi kɔ̃a wenɔ ni, nɛ Gale zɔa 'bɔ ma. Lɛ dɛ̀ mbe 'dã mɔ li Gale gɔ, nɛ dɛa to tɛ lɛ zi a bɔlɔ fai, fo zi mɔ kɔ'dɔ lɛ we nɛ ni bina.

¹¹ Nɛ ĩ na, lɛ dɛ zi do wele kpo kpo sanga nɛ ni, ɔ nɛ kɛ baa be dɛ do benɔ 'da a ni.

¹² Lɛ kpãlã zi sila nɛ, nɛ lɛ hã ngawi hã nɛ, nɛ lɛ hɛ̃lɛ̃ nɛ na, nɛ 'dafa dɛa mɔ tɛ nɛ na, ma de li Gale. Mba gɔ, a sa mɔ hã nɛ na, nɛ kpa dɔ̃lɔ̃ li do a kɔ le nwa 'da a.

¹³ Mbe gulu kɛ lɛ hã 'bɔ iɔ̃nae hã Gale fai ni ma kɛ: 'Da fala kɛ nɛ zila zi we 'da Gale kɛ lɛ bia hã nɛ ni, nɛ nɛ kɔ̃̀ zi gɛnɛ nɛ ɔ nɛ lɛnggɛ nu wele iko gɔ, nɛ nde nɛ kɔ̃a na, mɛ a we nu Gale ngboo, nɛ ma tɛ dɛ to kɔ sila nɛ winɔ kɛ nɛ kɔ̃a ma ni.

¹⁴ Mba gɔ, onyae, mɛ kɛ ma dɛa tɛ̃ ɛ hã nɛ ni, ma wia kɔ̃ do kɛ 'da owinɔ 'da Gale kɔ eklezianɔ tɛ ngɔ nù Yude, kɛ wa kɔ̃a zu li Yezu Kristo ni. Onya nɛ ngboo, wa zɛlɛ zi 'bɔ tɛ nɛ, ɔ nɛ kɛ Oyudanɔ wa zɛlɛ zi do tɛ Owi Kristonɔ ngɔ nù Yude i ni.

¹⁵ Oyudanɔ ni wa gbɛa zi Nwa Yezu, do owi gba olo nu Gale, nɛ wa zɛlɛ zi 'bɔ tɛ lɛ. Dɛa mɔ tɛ wa ma hã yangga hã Gale gɔ, nɛ wa sɛna winɔ vɛ̃!

¹⁶ Wa fa zi we kpe wala ti lɛ na, lɛ tɛ bè Dia Sakoe kɛ ma hã kpasi ni hã ogele winɔ gɔ. Nɛ we duzu ki ni, 'dã mɛnɔ 'da wa gã dɛ dati gã fai. Kɔ nɔ̃lɔ̃ zã 'da Gale tia ngɔ wa ia.

Polo kɔ̃a we zɔ 'bɔ owi Tɛsalonikɛ

¹⁷ Onyae, 'do kɛ lɛ gɔnɔ zi sanga tɛ ngba lɛ do nɛ we bi kɔ̃ tũi ni, lɛ gɔnɔ sanga tɛ ngba lɛ do kili tɛ lɛ iko, nɛ nde sila lɛ 'bana ngɔ nɛ fai. Ma kɛ lɛ fa do walanɔ vɛ̃ na, lɛ nɛ 'da nɛ i, we kɛ wɔ tɛ nɛ ba lɛ wena.

¹⁸ Lɛ kɔ̃a zi we gili 'bɔ tɛ lɛ 'da nɛ i. Mi Polo, mi fa zi we nɛ i mɔ fala dɛlɛ wena, nɛ nde Satana kpia wala ti lɛ.

¹⁹ Mba gɔ, 'da fala Nwa 'da lɛ Yezu a hɔ sɛ nɛ ni, nɛ lɛ gbini sɛ zã lɛ do wio nde? Nɛ lɛ dɛ sɛ yangga we wio nde? Lɛ dɔnggɔ sɛ tɛ lɛ gbali a do wio nde? Lɛ dɔ́nggɔ́ sɛ tɛ lɛ tati a do nɛ gɔ nde?

²⁰ Gbãlã we, dɔ̃lɔ̃ li, do yangga 'da lɛ wi a nɛ.