1 TƐSALONIKƐ 1 - WE NU GALE 1995

¹ Wi a mi Polo, do Silasi, do Timote, lɛ kɔmɔ mbɛti gɛ hã nɛ owi Kristonɔ kɔ le Tɛsalonikɛ, kɛ nɛ mba kpo do Baa lɛ Gale, do Nwa 'da lɛ Yezu Kristo ni. E kɔ wa be dia zã 'da wa hã nɛ, nɛ wa dɛ na, nɛ dungu do gɛ̃a sila.

Polo hã iɔ̃nae hã Gale we owi Kristonɔ tɛ Tɛsalonikɛ

² Lɛ hã iɔ̃nae hã Gale fai we duzu nɛ vɛ̃, nɛ lɛ ɔ́mɔ́ tɛ sambala a we nɛ gɔ.

³ Ta zu lɛ 'bana ngɔ dɛa toe kɛ nɛ dɛ ma olo kɔ̃a we 'da nɛ, do tɛlɛ tɛ kɛ nɛ kɔ̃a ngba nɛ do sila nɛ kpo, nɛ nɛ gbini zã nɛ do Nwa 'da lɛ Yezu Kristo do nɔa sila ngboo ni, nɛ lɛ lengge ma dati Baa lɛ Gale 'da fala fai.

⁴ Onyae, lɛ ĩ na Gale kɔ̃a gɛnɛ nɛ, nɛ a saka nɛ do owinɔ 'da a.

⁵ Mba gɔ, Dia Sakoe kɛ lɛ bia zi hã nɛ ni, lɛ bè zi do ngawi 'da lɛ iko gɔ, nɛ nde lɛ bia do ngawi 'da Hi Wi Santo. Nɛ lɛ bia hã nɛ na, Dia Sakoe ni a gbãlã we ngboo. Nɛ nɛ ĩ ti tɛlɛ tɛ kɛ lɛ dungu zi nɛ sanga nɛ we gala nɛ na, nɛ dungu do dia nɛ ni.

⁶ Nɛ nɛ 'bã zi do kɔ̃ lɛ, do olo kɔ̃ Nwa Yezu. Nɛ gɛnɛ kɔ nɛ zɔ zi ngamɔ wena, nɛ nde nɛ kɔ̃a zi gɛnɛ we 'da Gale do yangga kɛ Hi Wi Santo hã ma hã nɛ ni.

⁷ Na mɛ ni, nɛ dɛa mɔ tɛ nɛ bia wala hã owi kɔ̃a wenɔ ngɔ nù Masedɔanɛ do Akai vɛ.

⁸ Mba gɔ, we 'da Nwa yula 'da nɛ ni, nɛ ma sɔ̀kpɔ̀ dɛ Masedɔanɛ do Akai iko gɔ, nɛ nde sako kɔ̃a we 'da nɛ yɛ'ba falanɔ vɛ. Nɛ lɛ wè 'bɔ tɛ tɔ̃ mbé lɛnggɛ ngɔ ma tɔ̃a gɔ.

⁹ We kɛ owinɔ vɛ wa tɔ̃a tɛlɛ tɛ kɛ lɛ nɛa zi 'da nɛ i, nɛ nɛ dɛa do gɛnɛ lɛ ni, do tɛlɛ tɛ kɛ nɛ la fala dɔnggɔ okpikimanɔ, nɛ nɛ kifi sila nɛ hã Gale, wele kpasi do wele gbãlã we, nɛ nɛ dɛ to hã a ni.

¹⁰ Nɛ wa tɔ̃ 'bɔ tɛlɛ tɛ kɛ nɛ ia sila nɛ we 'bɔ 'da tɛa 'da Yezu Be 'da Gale, kɛ Gale tunu zi a sanga ofionɔ, nɛ a kpasa sɛ lɛ ti nɔ̃lɔ̃ zã 'da Gale 'da fala a nɛ 'bili do ngbangga 'da owinɔ ni.