1 SAMUƐLƐ 9 - WE NU GALE 1995

Onaa pundanɔ 'da Saulo wa yɔa

¹ Do 'da fala ni, nɛ nde mbe wi wili kpo tɛ kɔ nu kpala Bɛnzamɛ, a zi boe, li a a Kisi. A zi do kpamɔ wena, nɛ a zi a wi dĩ. A zi a be 'da Abiɛlɛ, nɛ a a be yaa Sɛrɔrɛ. Kisi zi a kanggadɔkɔ Bɛkɔratɛ, wi nu fɛlɛ kula 'da Afia.

² A zi do mbe zagbãlã be 'da a li a a Saulo. A de zagbãlã wena. Zagbãlã 'da a la li ngele. Nɛ a ngala nɛa ngɔ owinɔ ngɔ nù Israɛlɛ vɛ̃.

³ Mbe 'da fala kpo, nɛ onaa pundanɔ 'da Kisi, wa yɔa. Kisi nɛa we zɔ ni, nɛ a tɔ̃ hã be 'da a Saulo na, a bá mbe wele kpo kɔ wi dɛa tonɔ, kɔ a nɛ do a we fa naa pundanɔ.

⁴ Saulo do wi dɛa toe wa nɛa gbaa, nɛ wa la ngɔ kala Efraimɛ, do 'bili tɛ nù Salisa, nɛ nde wa kpà onaa pundanɔ ni gɔ. Nɛ wa yolo di ni, nɛ wa la do ngɔ 'bili tɛ nù Salimɛ, nɛ nde fo wa di ni bina. Wa la 'bɔ do ngɔ nù Bɛnzamɛ, nɛ nde wa kpà 'bɔ wa gɔ.

⁵ Wa nɛa we hɔ tɛ 'bili tɛ nù Sufɛ, nɛ Saulo tɔ̃ hã wi dɛa toe 'da a na: “Lɛ kpóló tɛ lɛ, dɔ baa mi sí tɛ lengge lɛ iko, kɔ tɛ̃ a ele ngɔ onaa pundanɔ gɔ.”

⁶ Nɛ wi dɛa toe gese hã a na: “Mɔ zɔ́, mbe wi gba olo nu Gale kpo kɔ le i mɔ ni. Sako li a dɔ̃lɔ̃ wena. Wenɔ vɛ̃ a tɔ̃ ni, nɛ ma dɛ gbãlã we. Kɔ lɛ nɛ́ 'da a i. Mbe gɔ, nɛ a be sɛ fala kɛ ma wia na, lɛ fa do onaa pundanɔ ni.”

⁷ Nɛ Saulo gese na: “Lɛ nɛ we zɔ a, nɛ mɛ ngboo lɛ hã sɛ hã a ni a ge nde? Lɛ do nyɔngɔmɔ kɔ koe kɔ lɛ gɛ bina, nɛ fo 'bɔ mɔ na, lɛ 'dɔlɔ hã a bina.”

⁸ Nɛ wi dɛa toe tɔ̃ na: “Mi do be mbili kɔ̃ mi gɛ. Lɛ hã sɛ ma hã a, nɛ a be sɛ wala lɛ wia tɛ ba nɛ ni hã lɛ.”

^9-11 Nɛ Saulo tɔ̃ hã a na: “Mɔ tɔ̃ de wena. Lɛ nɛ́.” Wa nɛa, nɛ wa hɔ kɔ le kɛ wi gba olo nu Gale ɔ nɛ ni. 'Da fala kɛ wa tɛ nɛ dɛ i mɔ ni, nɛ wa kpa ngba wa do obe zɔnganɔ kɛ wa yula kɔ le ni, hã wa nɛ we so lì. Nɛ wa aka obe zɔnganɔ ni na: “Mbe wi zɔ mɔ dɛ boe nde?” (Wa aka ni mba gɔ, we kɛ zi tɛ ngɔ nù Israɛlɛ, wa sa zi li wi gba olo nu Gale na, wi zɔ mɔ. Nɛ 'da fala kɛ wa kɔ̃ zi we aka Gale do we ni, nɛ wa na: “Lɛ nɛ́ 'da wi zɔ mɔ.”)

^12-13 Nɛ obe zɔnganɔ ni, wa gisa hã wa na: “Ĩi, a boe. A la sɔ di d gɛ. Fala nɛ gbɛngɛ tɛ nɛ, nɛ nɛ kpa sɛ a tɛ li wala gɛ. A tɛa kɔ le gɛ sɔɛ gɛ, we kɛ owinɔ wa kɔ̃a we hã dɔnggamɔ, tɛ fala wa dɔnggɔ do Gale ngɔ kala i ni. Wele kpo nyɔ́ngɔ́ sɛ mɔ dati a kɛ na a hɔ ni gɔ. We kɛ ma wia na, a wele nu a tɛ dɔnggamɛ dati, sɛ nɛ wa nyɔngɔ de. Nɛ wɛlɛ tɛ nɛ, nɛ nɛ kpa sɛ a dati a kɛ na a kũ ngɔ kala i we nyɔngɔ mɔ ni.”

Saulo kpa ngba a do Samuɛlɛ

¹⁴ Wa zila ni, nɛ wa la. Kɔ wa nɛa we le dɛ kɔ le i, nɛ Samuɛlɛ hɔ tɛ mɛ 'bɔ nza kɔ le, we nɛ tɛ fala kɛ a dɔnggɔ do Gale ni. Nɛ wa kpa ngba wa do a.

¹⁵ Ĩ na, tũ kpo dati kɛ na Saulo do wi dɛa toe 'da a wa hɔ ni, nɛ nde nwa tɔ́a we kɛ na, Samuɛlɛ a kpa sɛ ngba a do Saulo ni ia. A na:

¹⁶ “Bindɛ do kpo sa gɛ, nɛ mi dɛ sɛ na, mɔ kpa ngba mɔ do mbe wi wili kpo kɔ nu kpala Bɛnzamɛ. Nɛ mɔ a sɛ nɔ zu a na, a ɔ nwa ngɔ owinɔ 'da mi, obe Israɛlɛ. Nɛ a fo sɛ wa ti kɔ̃ Ofilisti. Mi zɔa ngamɛ 'da owinɔ 'da mi, nɛ mi zila ala nu wi 'da wa.”

¹⁷ Samuɛlɛ nɛa we zɔ Saulo, nɛ NWA tɔ̃ hã a na: “Mɔ zɔ wi kɛ mi tɔ̃a zi hã mɔ na, a dungu sɛ nwa ngɔ owinɔ 'da mi ni, a kɛ.”

¹⁸ Saulo kɔla do nu ngbo le, nɛ wa kpa ngba wa do Samuɛlɛ. Nɛ a aka a na: “Mɔ ĩ ti fala wi zɔ mɛ ɔ nɛ ni nde?”

¹⁹ Nɛ Samuɛlɛ gese na: “Wi zɔ mɛ wi a mi. Kɔ mɔ kpé dɛ dati mi gɛ, hã lɛ nɛ tɛ fala wa dɔnggɔ do Gale i ni. We kɛ sɔɛ gɛ, nɛ nyɔngɔ sɛ mɔ fala nɛ kpo do mi. Nɛ bindɛ do titole, mi gese sɛ nu aka wenɔ 'da mɔ vɛ̃, sɛ nɛ mi e sɛ mɔ na mɔ si de.

²⁰ Nɛ nde mɔ lɛ bì tɛ mɔ we duzu onaa pundanɔ wa yɔa dɛ 'do tũ talɛ ni gɔ. Wa kpa wa ia. Kɔ mɔ ĩ́ na, wi kɛ obe Israɛlɛ wa ia sila wa ngɔ a ngboo ni, wi a mɔ, do nu fɛlɛ kula 'da baa mɔ.”

²¹ Saulo nɛa we zele ni, nɛ a gese na: “Mi gɛ a wi nu kpala Bɛnzamɛ iko. Nɛ lɛ dɛlɛ kɔ obe Israɛlɛ gɔ. Nɛ kɔ nu fɛlɛ Bɛnzamɛ, nu fɛlɛ kula 'da baa mi 'bɔ a bi sĩ iko. Kɔ gulu kɛ mɔ tɔ̃ we ɔ ni hã mi we ge nde?”

²² Saulo tɔ̃a ni do'do, nɛ Samuɛlɛ nɛa do a, fala nɛ kpo do wi dɛa toe 'da a, nɛ a le do wa tɛ kɔ tɔa nyɔngɔmɔ. Nɛ a ia wa tɛ fala dɔ̃lɔ̃ li, fala nɛ kpo do Owele kɔlɔ do 'bu wa talɛ, kɛ a sa mɔ hã wa ni.

^23-24 'Do nɛ, nɛ Samuɛlɛ tɔ̃ hã wi gi mɛ na, a tɛ do mulu sa'de sɔ ɛ tɔ̃a hã a na, a e do tɛ̃ ɛ ni. Wi gi mɛ tɛa do ma, nɛ a e ma dɛ dati Saulo ni. Nɛ Samuɛlɛ tɔ̃ hã Saulo na: “Mɔ zɔ́ mulu sa'de wa usu sɔ hã mɔ gɛ kɛ. Mɔ bá hã mɔ nyɔngɔ. Mi usu sɔ na, mɔ nyɔngɔ ma fala nɛ kpo do owinɔ kɛ mi sa mɔ hã wa gɛ.” Nɛ ngba soe ni, nɛ Saulo nyɔngɔ mɛ fala nɛ kpo do Samuɛlɛ.

²⁵ Wa yula ngɔ kala tɛ fala dɔnggɔ do Gale, kɔ wa nɛ zĩlĩ dɛ kɔ le nga ni, nɛ Samuɛlɛ do Saulo wa kũ dɛ ngɔ tɔa i, nɛ wa tɔ̃ lɛnggɛ.

Samuɛlɛ a nɔ zu Saulo na a hɔ nwa ngɔ nù Israɛlɛ

²⁶ Wa ɔa nù, nɛ ma nɛ hɔ titole belee, nɛ wa kulu ngɔ, nɛ Samuɛlɛ sa mɔ hã Saulo na: “Lɛ nɛ, kɔ mi la mɔ li wala i.” Saulo kulu ngɔ, nɛ wa la fala nɛ kpo do Samuɛlɛ.

²⁷ Wa nɛa we hɔ tɛ nu ngba le i, nɛ Samuɛlɛ tɔ̃ hã Saulo na: “Mɔ tɔ̃̀ hã wi toe 'da mɔ na, a la dati.” Wi toe la do'do, nɛ Samuɛlɛ tɔ̃ 'bɔ hã Saulo na: “Mɔ yóló nù dɛ bi sĩ, kɔ mi tɔ̃ olo nu Gale hã mɔ.”