1 SAMUƐLƐ 8 - WE NU GALE 1995

Obe Israɛlɛ wa aka Samuɛlɛ we nwa

¹ 'Da fala kɛ Samuɛlɛ hɔa kpasa wi do'do ni, nɛ a ia obenɔ 'da a do owi kpe dati obe Israɛlɛ.

² Li kuti be 'da a a Yɔɛlɛ, nɛ wele kɛ bɔa, li a a Abia. Wa ɔ zi dɛ kɔ le Bɛrseba ni, we gɔnɔ do we 'da owinɔ.

³ Nɛ nde obenɔ 'da Samuɛlɛ wa hɔ̀ a gɔ. Wa lengge tati a do mbilinɔ winɔ wa 'dɔlɔ hã wa ni, nɛ nde wa gɔ́nɔ́ wenɔ do bɔlɔ nɛ gɔ.

⁴ We duzu nɛ, ma kɛ okumu Israɛlɛ, wa mba li ngba wa, nɛ wa nɛ 'da Samuɛlɛ tɛ Rama 'di.

⁵ Nɛ wa tɔ̃ hã a na: “Samuɛlɛ, mɔ zɔ́, mɔ hɔa kpasa wi ia, nɛ benɔ 'da mɔ wa hɔ mɔ gɔ. Kɔ ɔ nɛ kɛ wa dɛ ni ni, mɔ sáká nwa na, a fɔmɔ lɛ, ɔ nɛ kɛ ma dɛ tɛ̃ ɛ ngɔ nùi 'da ogele winɔ vɛ̃ ni.”

⁶ Samuɛlɛ nɛa we zele na, okumu Israɛlɛ wa gɔa nwa ni, nɛ sila a zɛlɛ, nɛ a sambala NWA we aka a.

⁷ NWA zele sambala 'da a, nɛ a gese hã a na: “Mɔ kɔ̃ wenɔ vɛ̃ kɛ obe Israɛlɛ wa tɔ̃a hã mɔ ni. We kɛ wi wa bɛ̃a a wi a mɔ gɔ. Wi wa bɛ̃a a ni, wi a mi. Wa kɔ̃̀ na, mi ɔ 'bɔ nwa ngɔ lo gɔ.

⁸ Yolo tɛ tũi mi fua zi wa kɔ ngbá tɛ ngɔ nù Ezipeto, gbaa we hɔ sɔɛ gɛ, wa tɛ là fala bɛ̃ gɛnɛ mi, we dɔnggɔ ogele gale bɛlɛnɔ gɔ. Mɛnɔ wa dɛa zi do mi ni, ma kɛ wa dɛ tɛ mɛ 'bɔ do mɔ gɛ.

⁹ Kɔ ma wia na, mɔ kɔ̃ gɛnɛ kɛ wa tɔ̃a ni. Nɛ nde mɔ tɔ̃́ tɛlɛ tɛ mɛnɔ vɛ̃ nwa ni a dɛ sɛ do wa ni, takɔ wa ĩ fala nɛ do dia nɛ.”

Dɛa to 'da nwa ni

¹⁰ Samuɛlɛ zele lɛnggɛ 'da NWA Gale do'do, nɛ a tɔ̃ 'da nɛ hã owinɔ kɛ wa aka na, a e nwa ngɔ lo ni.

¹¹ A tɔ̃a hã wa na: “Nɛ zélé tɛlɛ tɛ mɛnɔ kɛ nwa ni, a nɛ dɛ sɛ do nɛ tɛ kɛ a nɛ dungu nwa ni. A kala sɛ ozagbãlã benɔ 'da nɛ do soda. Ombe nɛ wa sɛ a wi dɛ to kɔ ongilingili bolonɔ 'da a, ombe wa sɛ a wi kù ombalatanɔ. Nɛ ombe wa yu sɛ do dati ngilingili 'da a.

¹² A saka sɛ ombe do wi ngɔ osoda koto kpo, nɛ ombe sɛ a wi ngɔ osoda 'bu wa mɔlɔ. A kala sɛ ombe ozagbãlã benɔ 'da nɛ, we wa fɔ hã a, do kala Okpalɛnɔ 'da a dɛ nza, tabi we dolo mɔ bolo, do 'dafa omɛnɔ tɛ ongilingilinɔ.

¹³ A kala sɛ 'bɔ be zɔnga benɔ 'da nɛ, nɛ wa sɛ a wi dɛ yɔmbɔ, tabi wi gi mɔ, tabi wi dɔ mapa.

¹⁴ A ba sɛ nùnɔ 'da nɛ, kɛ ma dia wena ni, do odia wala tenɔ, do gã fɔ olivɛnɔ 'da nɛ, nɛ a hã sɛ ma hã onwa ngɔ owi bolonɔ.

¹⁵ A fo sɛ kpo mbee 'bu kɔ okpalɛ li fɔnɔ do owala tenɔ 'da nɛ, nɛ a hã sɛ ma hã Owi dɛa tonɔ, do Owi ngɔ osodanɔ 'da a.

¹⁶ A kala sɛ owi wili, do owuko wi dɛa tonɔ 'da nɛ, do obe zagbãlãnɔ 'da nɛ, kɛ wa nganda do dɛa to wena ni. Nɛ a kala sɛ 'bɔ opundanɔ 'da nɛ, we a wa li dɛa to 'da a.

¹⁷ A ba sɛ sa'de kpo mbee 'bu kɔ obatanɔ do oduanɔ 'da nɛ. Nɛ nɛ ngboo, nɛ sɛ 'bɔ a ongbánɔ 'da a.

¹⁸ Hã fala kɛ ma dɛ sɛ tɛ̃ ɛ ni, nɛ nɛ ala sɛ nu nɛ hã NWA Gale, we duzu nwa kɛ nɛ saka a ni, nɛ nde nwa gésé sɛ we hã nɛ gɔ.”

¹⁹ Obe Israɛlɛ wa bɛ̃a we zele wenɔ Samuɛlɛ tɔ̃a hã wa ni. Nɛ wa na: “Ma dɛ́ mɔ gɔ! Lɛ kɔ̃a tɛ mɛ we kpa nwa ngɔ lɛ,

²⁰ takɔ lɛ ɔ nɛ Owi kɔ gele lenɔ ni. Lɛ kɔ̃a nwa kɛ a gɔnɔ we 'da lɛ, nɛ a kpe dati lɛ, nɛ a mba do lɛ we bi bolo ni.”

²¹ Samuɛlɛ zila wenɔ nu obe Israɛlɛ ni vɛ̃, nɛ a tɔ̃ olo nu wa hã NWA Gale.

²² Nɛ NWA gese hã a na: “Mɔ dɛ́ kɛ wa aka mɔ ni. Mɔ é nwa ngɔ wa.” Samuɛlɛ zele we nu NWA do'do, nɛ a mbese obe Israɛlɛ na, wa si dɛ nu tɔanɔ 'da wa.