1 SAMUƐLƐ 7 - WE NU GALE 1995

¹ Owi Kiriatɛ-Yearimɛ wa kpa toe ni, nɛ wa nɛa, nɛ wa ba Sanduku Gba Tɔkɛ. Nɛ wa si do nɛ dɛ kɔ tɔa 'da Abinadabɛ, kɛ ma zi tɛ ngɔ kala. Dɛ 'do nɛ, nɛ wa ia kɔ̃ wa zu Elazarɛ, be 'da Abinadabɛ na, a ɔ wi zɔ mɔ tɛ Sanduku Gba Tɔkɛ 'da NWA.

Samuɛlɛ hɔa wi zɔ mɔ tɛ obe Israɛlɛ

² Olo kɛ wa ia Sanduku Gba Tɔkɛ 'da NWA tɛ kɔ le Kiriatɛ-Yearimɛ la sabɛlɛ dɔ wena. Ma zɔ́lɔ́ la mbe nɛ́ sabɛlɛ 'bu nɛ bɔa gɔ. Nɛ sila obe Israɛlɛ ma ngɔ tombo wa na, wa kpolo tɛ wa dɛ 'da NWA.

³ Samuɛlɛ nɛa we zɔ ni, nɛ a tɔ̃ hã wa na: “Fala kɛ nɛ kɔ̃ ngboo we kpolo tɛ nɛ dɛ 'da NWA, nɛ nɛ lá fala dɔnggɔ okpikimanɔ, do ogele ogalenɔ. Nɛ nɛ hã́ tɛ nɛ hã NWA. Nɛ dɛ́ to tati nɛ hã a zu a kpo. Nɛ dɛ ni, nɛ a fo sɛ nɛ ti mbula 'da Ofilisti.”

⁴ Obe Israɛlɛ wa nɛa we zele ni, nɛ wa bɛ̃a gɛnɛ okpikima gale Bala, do kɛnɔ 'da gale wuke li a a Astarte ni. Nɛ wa dɔnggɔ tati a NWA zu a kpo.

⁵ Samuɛlɛ tɔ̃a 'bɔ hã wa na: “Nɛ winɔ vɛ̃, nɛ mbá li ngba nɛ dɛ kɔ le Mispa, nɛ mi sambala sɛ NWA we duzu nɛ i mɔ.”

⁶ Obe Israɛlɛ wa mba li ngba wa vɛ̃ tɛ kɔ le Mispa. Wa sua lì, nɛ wa a ma nù dati NWA we be na, wa hã tɛ wa hã a. Do kɔ̃ tũi ni, nɛ wa bɛ̃a 'bɔ nyɔngɔmɔ we dɔnggɔ Gale. Nɛ do ndɔti nɛ vɛ̃, nɛ wa gbala tɛ wa na: “Lɛ dɛa 'dã mɔ dɛ 'da NWA.” Nɛ Samuɛlɛ hɔa wi zɔ mɔ tɛ obe Israɛlɛ dɛ Mispa ni.

⁷ 'Da fala Ofilisti wa nɛa we zele na, obe Israɛlɛ, wa mba li ngba wa tɛ Mispa, nɛ ogã wi ngɔ Ofilisti mɔlɔ, Wa kulu ngɔ do osodanɔ 'da wa, nɛ wa nɛ we bi wa. Obe Israɛlɛ wa nɛa we zele we nɛ, nɛ wa dɛa kili wena.

⁸ Nɛ wa tɔ̃ hã Samuɛlɛ na: “Mɔ tɛ là lɛ iko gɔ, kɔ mɔ 'bana aka NWA Gale 'da lɛ we duzu lɛ. Mɔ aka a na, a kpasa lɛ ti kɔ̃ Ofilisti.”

⁹ Samuɛlɛ nɛa we zele ni, nɛ a ba be bata kɛ a 'bana ɔmɔ bele, nɛ a gbɛa a, nɛ a dɔ a we dɔnggɔ do NWA. A dɛa ni do'do, nɛ a aka NWA we duzu obe Israɛlɛ. Nɛ NWA zele sambala 'da a.

¹⁰ Samuɛlɛ 'bana tɛ dɔ be bata we dɔnggɔ do NWA ni, nɛ Ofilisti wa bi obe Israɛlɛ. Nɛ do wese ni, NWA dɛa, nɛ kolo ua dã li nza i nganda wena dɛ zu Ofilisti. Nɛ Ofilisti wa dɛa kili, nɛ wa pɛsɛ, nɛ zu wa vĩ do'do, nɛ wa te dɛ kɔ̃ obe Israɛlɛ.

¹¹ Osoda Israɛlɛ wa yula kɔ le Mispa, nɛ wa ndaka 'dɔkɔlɔ Ofilisti tɛ gbɛ wa do li wala ni, gbaa we hɔ gɔtɔ tɛ le Bɛtɛ-Karɛ.

¹² Samuɛlɛ nɛa we zɔ ni, nɛ a tɔ̃ do nga gɛlɛ na: “Kɛ di gbaa ni, Nwa a tɛ gala lɛ.” A tɔ̃a ni do'do, nɛ a ba ta, nɛ a zĩ ma dɛ sanga tɛ ngba le Mispa do le Gogo. Nɛ a sa li ma na: “Ta Gala Wi.”

¹³ Bole tia do Ofilisti wena. Tɛ kɔ dungu nza 'da Samuɛlɛ vɛ̃, NWA bia zi ngawi 'da a hã Ofilisti, nɛ wa bì zi 'bɔ le 'da obe Israɛlɛ gɔ.

¹⁴ Ofilisti, wa gisa olenɔ wa kala zi kɔ̃ obe Israɛlɛ ni hã wa, yolo tɛ ngbala 'bili tɛ nù Ekroni gbaa we hɔ Gatɛ. Na mɛ ni, nɛ lenɔ ni, ma hɔa nza ti kɔ̃ Ofilisti. Nɛ obe Israɛlɛ wa dɛa zi 'bɔ na do ngba wa Oamori.

¹⁵ Samuɛlɛ zɔa zi mɔ tɛ obe Israɛlɛ kɔ dungu nza 'da a vɛ̃.

¹⁶ Sabɛlɛ kpo kpo, Samuɛlɛ kulu zi ngɔ, nɛ a yɛnggɛ kɔ olenɔ talɛ gɛ: Betɛlɛ, Gilgalɛ, do Mispa, we gɔnɔ wenɔ 'da owinɔ.

¹⁷ 'Do nɛ, nɛ a si dɛ kɔ le Rama. I mɔ ni, a gɔnɔ tɛ mɛ 'bɔ we 'da obe Israɛlɛ. Nɛ Samuɛlɛ dɛa 'bɔ gbagala dɔ do sa'de, we dɔnggɔ do NWA Gale tɛ kɔ le Rama.