1 SAMUƐLƐ 6 - WE NU GALE 1995

Ofilisti wa gisa Sanduku Gba Tɔkɛ dɛ ngɔ nu Israɛlɛ

¹ Sanduku Gba Tɔkɛ 'da nwa, ma ɔa zi tɛ ngɔ nù 'da Ofilisti zɛkɛ sambo.

² 'Do nɛ, nɛ Ofilisti, wa aka onganganɔ do Owi 'bɛnɛ mɛnɔ 'da wa na: “Mɛ lɛ nɛ dɛ do Sanduku Gba Tɔkɛ 'da nwa gɛ a ge nde? Lɛ nɛ dɛ do gese ma dɛ olo nɛ nɛ nde?”

³ Nɛ onganganɔ do owi 'bɛnɛ mɛnɔ ni, wa gisa hã wa na: “Nɛ kɔ̃ we gese Sanduku Gba Tɔkɛ 'da Gale 'da obe Israɛlɛ, nɛ nɛ tɛ gèsè ma iko gɔ. Nɛ gésé ma do dɔnggamɔ, we si olo 'dã mɛ 'da nɛ. Nɛ dɛ́ ni, nɛ mbe gɔ, nɛ Gale 'da wa a kpasa sɛ nɛ. Nɛ nɛ ĩ sɛ 'bɔ gulu kɛ a hã do ngamɛ hã nɛ ni.”

⁴ Ofilisti wa nɛa we zele ni, nɛ wa aka wa na: “Mɛ lɛ nɛ hã nɛ ni a ge nde?” Nɛ wa gese na: “Nɛ hã́ mɔ mbali kɛ ma be oyolenɔ ma gbala nɛ ni, do ozula mɔlɔ kɛ wa dɛa wa do mɔ mbali ni. Nɛ hã sɛ ma ni do 'da zu ogã wi ngɔ nɛ mɔlɔ ni. Mba gɔ, we kɛ kpo zɛlɛmɛ ni, ma ba zi nɛ vɛ̃ do Onwanɔ 'da nɛ mɔlɔ ni.

⁵ Ɔ na mɛ ni, nɛ dɛ́ omɛnɔ ni olo li oyolenɔ ma gbala nɛ ni, do olo li ozulanɔ kɛ wa 'danga mɛnɔ ngɔ nùi 'da nɛ gɛ. Nɛ nɛ hã́ 'bɔ dɔ̃lɔ̃ li hã Gale 'da obe Israɛlɛ. Nɛ dɛ na mɛ ni, nɛ mbe gɔ, nɛ a la sɛ fala be ngawi 'da a dɛ ngɔ nɛ, do ogalenɔ 'da nɛ, do nùi 'da nɛ

⁶ Nɛ tɛ dɛ nga zu ɔ nɛ kɛ nwa ngɔ nù Ezipeto do owinɔ 'da a wa dɛa zi ni gɔ. Nɛ lénggé do tɛlɛ tɛ kɛ Gale ni a dɛa zi do wa dati kɛ na, wa e obe Israɛlɛ kɔ wa la ni.

⁷ Ní a, nɛ dɛ́ mbé ngilingili. Nɛ nɛ kala ongɔmbɛ bɔa kɛ wa 'bana tɛ ɔmɔ obenɔ 'da wa, nɛ wa tɛ gbɔtɔ kuti ngilingili fala kpo gɔ ni. Nɛ kálá wa do'do, nɛ nɛ kpo wa dɛ tɛ ngilingili. Nɛ nɛ á benɔ 'da wa kɔ ngbo ɔi 'da wa i.

⁸ Nɛ kpó wa ni do'do, nɛ nɛ ba Sanduku Gba Tɔkɛ 'da NWA, nɛ nɛ e ma kɔ ngilingili ni. Nɛ kala sɛ omɔ mbalinɔ, nɛ nɛ a ma dɛ kɔ be sanduku, nɛ nɛ hã ma hã Gale, we si olo 'dã mɛ 'da nɛ. Nɛ e sɛ mɛnɔ ni dɛ kɛ zã Sanduku Gba Tɔkɛ ni. Dɛ 'do nɛ, nɛ nɛ e sɛ ngilingili na ma la.

⁹ Ma ma ngɔ la nɛ, nɛ nɛ zɔ̃ wala ma nɛ la nɛ ni. Fala kɛ ma ba wala nù Israɛlɛ do si li wala Bɛtɛ-Semɛsi, nɛ nde ma bia na, Gale 'da obe Israɛlɛ hã a dɛa 'dã mɛ gɛ vɛ̃ do lɛ. Hã fala ma bà li wala ni gɔ, nɛ lɛ ĩ sɛ na, wi dɛ̃ 'dã mɛnɔ ni do lɛ, wi a a gɔ. Ní, nɛ nde ma hɔa hã lɛ iko.”

¹⁰ Onganganɔ do Owi 'bɛnɛ mɛnɔ ni wa nɛa we da nu wa, nɛ Ofilisti wa dɛa ɔ nɛ kɛ wa tɔ̃a hã wa ni. Wa kala ongɔmbɔ bɔa, kɛ wa 'bana tɛ ɔmɔ obenɔ 'da wa ni, nɛ wa kpo wa dɛ tɛ ngilingili. Nɛ wa kala obenɔ 'da wa, nɛ wa kpe nu ngbo ɔi dɛ ngɔ wa.

¹¹ Wa ba Sanduku Gba Tɔkɛ, nɛ wa e ma kɔ ngilingili, fala nɛ kpo do be sanduki kɛ wa a ozulanɔ do mɔ mbali olo li yolenɔ kɔ nɛ ni.

¹² Wa nɛa we a mɛnɔ ni do'do, nɛ ongɔmbɛnɔ wa ba li wala Bɛtɛ-Semɛsi. Wa ba li wala ni tɛ he mɔ fai. Wa bà mbé gele wala gɔ, wa ba tati a li wala nɛ́. Do 'da fala ni, ogã wi ngɔ Ofilisti, wa tɛ la do 'do ngilingili gbaa we hɔ tɛ ngbala nu 'da wa do Bɛtɛ-Semɛsi.

¹³ Do 'da fala ni, owinɔ kɔ le Bɛtɛ-Semɛsi, wa zi tɛ kɔ fɔnɔ 'da wa i tɛ kala kpalɛnɔ 'da wa dɛ nza. Kɔ wa nɛa we zɔ Sanduku Gba Tɔkɛ ni, nɛ wa dɛa yangga wena.

¹⁴ Ngilingili nɛa, nɛ ma nɛ hɔ kɔ fɔɛ 'da mbe wele kpo li a a Yozue, nɛ ma yolo nù dɛ kɛ zã mbe gã ta di ni. Yozue zi a wi kɔ le Bɛtɛ-Semɛsi. Ma nɛa we yolo nù, nɛ wa 'bili sanga te wa dɛa do ngilingili ni kisi kisi, nɛ wa kala ongɔmbɛnɔ ni, nɛ wa gbɛ wa, nɛ wa dɔ wa do dɔnggamɔ hã NWA.

¹⁵ Dati 'bili sanga te ngilingili, nɛ nde olevitɛnɔ wa kala Sanduku Gba Tɔkɛ 'da NWA, do be sanduki wa a mɔ mbalinɔ kɔ nɛ ni, nɛ wa a dɛ ngɔ gã ta kɛ ngilingili yula nù dɛ kɛ zã nɛ ni. Do kpo soe ni, nɛ owinɔ kɔ le Bɛtɛ-Semɛsi, wa gbɛa sa'de, nɛ wa dɔ we dɔnggɔ do NWA. Nɛ wa hã 'bɔ odɔnggamɛnɔ, kɛ ma be dɛa na ni.

¹⁶ Do kpo soe ni 'bɔ, nɛ ogã winɔ mɔlɔ ngɔ Ofilisti, kɛ wa tɛa 'dɔkɔlɔ ngilingili ni, wa nɛa we zɔ mɛnɔ kɛ ma dɛa tɛ̃ ɛ ni, nɛ wa kpolo tɛ wa dɛ kɔ le Ekroni i.

¹⁷ Ofilisti wa si zi olo o'dã mɛnɔ 'da wa hã NWA, do mɔ mbali mɔlɔ, kɛ wa dɛa olo li zɛlɛ yole ni. Wa dɛa zi mɔ mbalinɔ ni kpo kpo do 'da zu lenɔ 'da wa mɔlɔ gɛ: Asdɔdɛ, Gaza, Askaloni, Gatɛ, do Ekroni.

¹⁸ Nɛ we duzu ozulanɔ wa dɛa wa do mɔ mbali ni, ngɔ gili nɛ wia kɔ̃ do 'da zu olenɔ kɛ gba ngbo zĩ ma takpa, tabi kɛnɔ gba ngbo zĩ̀ ma takpa gɔ, nɛ ogã wi ngɔ Ofilisti mɔlɔ hã wa ka mɔ tɛ nɛ ni. Nɛ gã ta kɔ fɔɛ 'da Yozue, kɛ wa ia zi Sanduku Gba Tɔkɛ 'da nwa dɛ ngɔ nɛ ni, ma 'bana dɛ di ni tia do sɔɛ gɛ, we gba ta zu winɔ ngɔ mɛ kɛ ma dɛa zi tɛ̃ ɛ di ni ni.

¹⁹ Nɛ nde do 'da fala ni, nɛ nwa hã etumbu hã owinɔ kɔ le Bɛtɛ-Semɛsi, we kɛ wa zɔa Sanduku Gba Tɔkɛ ni. A gbɛa Owi wili 'bu wa sambo kɔ owinɔ ni. Owanɔ kɛ wa fè gɔɛ ni, wa nɛa we zɔ ni, nɛ wa dungu gɛla, we kɛ nwa hã etumbu hã wa nganda wena.

Sanduku Gba Tɔkɛ la dɛ kɔ le Kiriatɛ-Yearimɛ

²⁰ Owi Bɛtɛ-Semɛsi wa nɛa we zɔ na, winɔ 'da wa wa fe wena ni, nɛ wa na: “Wele wè tɛ yolo dati nwa, nɛ a 'bana do tunu li a gɔ. A a Gale santo. Fala ngboo lɛ nɛ e do Sanduku Gba Tɔkɛ gɛ, takɔ ma nyɛlɛ do lɛ, ma ni do nde?”

²¹ Wa tɔ̃a ni do'do, nɛ wa tombo Owele we tɔ̃ hã owinɔ tɛ kɔ le Kiriatɛ-Yearimɛ na: “Ofilisti wa gisa Sanduku Gba Tɔkɛ 'da NWA dɛ 'da lɛ gɛ. Kɔ nɛ tɛ́, nɛ bá ma, nɛ nɛ si do ma dɛ 'da nɛ i.”