1 SAMUƐLƐ 5 - WE NU GALE 1995

Sanduku Gba Tɔkɛ si dɛ 'da Ofilisti

¹ Ofilisti wa ba zi Sanduku Gba Tɔkɛ 'da Gale si do ma. Wa ba ma fala ɔi 'da osoda Israɛlɛ, kɛ li nɛ a Ta Gala Wi ni, nɛ wa si do ma dɛ tɛ le Asdɔdɛ.

² Wa nɛa we hɔ do ma tɛ Asdɔdɛ 'di, nɛ wa e ma kɔ tɔa 'da gale 'da wa, kɛ wa sa li a na Dagoni ni. Wa ia Sanduki dɔ̃ɔ do kpikima Dagoni.

³ Fala sa 'do nɛ ni, kɔ Owi Asdɔdɛ wa kulu ngɔ do titole belee, kɔ wa nɛ ka mɔ, nɛ nde kpikima Dagoni tia dɛ dati Sanduki ni. Wa nɛa we zɔ ni, nɛ wa ba ma, nɛ wa zĩ dɛ olo nɛ.

⁴ Titole 'do nɛ ni, nɛ wa zɔ 'bɔ na, kpikima ni tia 'bɔ dɛ dati Sanduku Gba Tɔkɛ. Tati nɛ a kili tɛ nɛ hã ma 'bana dɛ nù ni iko. We kɛ zu ma, do okɔ̃ ma ma gbini kisi kisi, kɔ ma pɛsɛ do kpongbo nu tɔa kɛ wa e do kpikima Dagoni ni.

⁵ Ma kɛ yolo zi do kɔ̃ tũi ni gbaa we hɔ sɔɛ gɛ, onganganɔ 'da gale Dagoni, do owanɔ wa le zi kɔ tɔa 'da a tɛ Asdɔdɛ ni, wa nɛ we le dɛ kɔ tɔa 'di, nɛ wa ba nyanga wa ngɔ kpongbo nu tɔa na, dɔ wa má fala 'bulu zu kpikima Dagoni do 'bulu nyanga a nɛ ni gɔ.

⁶ NWA bia 'bɔ ngawi 'da a hã owinɔ tɛ Asdɔdɛ nganda wena. A hã ongamɔ hã wa, nɛ a dɛ na, yole hɔ go'do owinɔ kɔ le Asdɔdɛ, do owinɔ ngɔ nùnɔ kɛ zã wa ni.

⁷ Owinɔ le ni, wa nɛa we zɔ ongamɛnɔ ma kpa wa ni, nɛ wa na: “Lɛ kɔ̃̀ 'bɔ mbé nɛ na, Sanduki Gba Tɔkɛ 'da Gale 'da obe Israɛlɛ ma 'bana dɛ 'da lɛ gɛ gɔ. Gale 'da obe Israɛlɛ a hã ngamɔ hã lɛ do hã gale 'da lɛ Dagoni wena.”

⁸ Na mɛ ni, wa sa zi mɔ hã ogã wi ngɔ Ofilisti mɔlɔ, nɛ wa aka wa na: “Mɛ ngboo ma wia na lɛ dɛ do Sanduku Gba Tɔkɛ 'da Gale 'da obe Israɛlɛ gɛ a ge nde?” Ogã winɔ mɔlɔ ni, wa gisa hã wa na: “Nɛ lá nɛ dɛ kɔ le Gatɛ i.” Owinɔ wa nɛa we zele ni, nɛ wa ba ma, nɛ wa la nɛ dɛ Gatɛ i.

⁹ Wa nɛa we hɔ do nɛ i mɔ, nɛ nwa bia ngawi 'da a hã owinɔ kɔ le Gatɛ ni. Kili ma ba wa dè gɔ, nɛ yole hɔa go'do wa vɛ̃, yolo ngɔ be bi sĩ we hɔ ngɔ kpasa wi.

¹⁰ Wa nɛa we zɔ ni, nɛ wa ba Sanduku Gba Tɔkɛ 'da Gale, nɛ wa la nɛ dɛ kɔ le Ekroni. Ma nɛa we hɔ Ekroni nɛ́, nɛ owinɔ di ni wa he mɔ nganda wena, nɛ wa na: “Wa tɛa do Sanduku Gba Tɔkɛ 'da Gale 'da obe Israɛlɛ dɛ kɔ lɛ gɛ, takɔ lɛ vɛ̃ lɛ fe iko!”

¹¹ Wa tɔ̃a ni do'do, nɛ wa sa mɔ hã ogã wi ngɔ Ofilisti, nɛ wa tɔ̃ hã wa na: “Nɛ gésé Sanduku Gba Tɔkɛ 'da obe Israɛlɛ dɛ kɔ le 'da wa wele nɛ. We kɛ ma 'bana 'da lɛ nga, nɛ lɛ fe sɛ vɛ̃.” Do 'da fala ni, nɛ nde owinɔ vɛ̃ kɔ le ni, wa zi do kili gã wena, we kɛ NWA bia zi ngawi 'da a hã wa.

¹² Owanɔ kɛ wa fè zi gɔ ni, yole hɔa go'do wa. Nɛ wa hia mɔ dɛ 'da galenɔ 'da wa na, wa kpasa lo.