1 SAMUƐLƐ 4 - WE NU GALE 1995

Owi sɛnɛ Israɛlɛ wa ba Sanduku Gba Tɔkɛ

¹ Mbe tũ kpo, nɛ obe Israɛlɛ wa gɔnɔ dati Ofilisti we bi do wa. Wa 'dafa fala ɔi 'da wa tɛ kɔ le wa sa li ma na: “Ta Gala Wi.” Nɛ Ofilisti wa 'dafa tɛ mɛ 'bɔ kɛ 'da wa tɛ Afɛkɛ.

² Ofilisti wa 'dafa tɛ wa we bi bolo do obe Israɛlɛ. Wa ndua bole ni, nɛ ma nganda wena. Ofilisti wa nɛa ngɔ obe Israɛlɛ do ngawi, nɛ wa gbɛ wa wena. Nɛ wa gɛ wa fia tɛ li fanda bole ni, wa zi a Owi wili kɔlɔ do koto nalɛ.

³ Nɛ tala obe Israɛlɛ kɛ wa fè gɔ ni, wa si dɛ fala ɔi 'da wa i, nɛ okumu Israɛlɛ wa tɔ̃ na: “Gulu kɛ NWA ia lɛ dɛ kɔ̃ Ofilisti, hã wa gbɛa lɛ ni we ge nde? Lɛ nɛ́, hã lɛ bá Sanduku Gba Tɔkɛ 'da nwa tɛ Silo i. Kɔ nwa ɔ dɛ sanga lɛ, nɛ a kpasa sɛ lɛ ti kɔ̃ Owi sɛnɛ lɛ.”

⁴ Wa tɔ̃a ni do'do, nɛ wa tombo Owele tɛ Silo i na, wa tɛ do Sanduku Gba Tɔkɛ 'da NWA Gale, kɛ a do nganda, nɛ a dungu ngɔ Sanduku Gba Tɔkɛ, tɛ sanga ohi mɛnɔ kɛ ma ɔ nɛ wele ni. Wa ba Sanduku Gba Tɔkɛ do'do, nɛ benɔ 'da Heli, Hofni do Pinasi wa nɛa do wa.

⁵ Wa nɛa, kɔ wa nɛ hɔ do Sanduki tɛ fala ɔi 'da osoda Israɛlɛ ni, nɛ wa zɛ nu wa nganda wena, gbaa na nùi tana.

⁶ Ofilisti wa zele zɛ nui ni, nɛ wa na: “Gulu zɛ nu kɛ ma wele fala ɔi 'da obe Hebre gɛ a ge nde?” Kɔ wa nɛa we zele na, Sanduku Gba Tɔkɛ hɔa tɛ fala ɔi 'da obe Israɛlɛ,

⁷ nɛ kili ba wa, nɛ wa tɔ̃ dɛ sanga ngba wa na: “Gale 'da obe Israɛlɛ a hɔa tɛ fala ɔi 'da wa. A zi dati di ni bina. Lɛ kpa ngamɔ ia.

⁸ 'Bako do lɛ wena. Wi kpasa sɛ lɛ ti kɔ̃ Gale kɛ a do nganda wena ni a wio nde? A a Gale kɛ a hã zi ongamɛnɔ kpi do kpi hã Oezipeto tɛ li gba zɔ̃ i ni.

⁹ Aa Ofilisti, lɛ ɔ̃ do kpã sila. Lɛ nɛ́, nɛ lɛ dɛ mɔ wi wi wili. Lɛ dɛ̃ ni gɔ, nɛ lɛ hɔ nɛ ngbá 'da obe Hebre, ɔ nɛ kɛ wa zi tɛ mɛ 'bɔ a ongbánɔ 'da lɛ ni. Lɛ bí do wa do kpã sila.”

¹⁰ Ofilisti wa bi bole, nɛ wa nɛa ngɔ obe Israɛlɛ, nɛ wa ndaka wa gbaa dɛ tɛ fala ɔi 'da wa i. Nɛ obe Israɛlɛ wa fia li bole dè gɔ. Ofilisti wa gbɛa sodanɔ 'da wa 'bu koto talɛ,

¹¹ nɛ wa ba 'bɔ Sanduku Gba Tɔkɛ. Nɛ dɛ ngɔ nɛ, obenɔ 'da Heli, Hofni do Pinasi, wa fia do bɔa nɛ.

Nganga Heli do konduka 'da a wa fia

¹² Do kpo tũi ni, nɛ mbe wi wili kpo, kɔ nu kpala Bɛnzamɛ yu bole, nɛ a hɔ tɛ Silo i do yu. A ɛ̃a tulu tɛ̃ a, nɛ a so bũ dɛ zu a we be na, ɛ do gã 'bako.

¹³ Heli dungu zi nu ngɔ kpongbo 'da a dɛ kɛ zã wala, tɛ lengge Sanduku Gba Tɔkɛ 'da Gale kɛ ma sí gɔɛ ni. Wi wili yu bole ni, lia kɔ le, nɛ a ma ngɔ tɔ̃ sako bole. Winɔ vɛ̃ wa nɛa we zele sako bole ni, nɛ wa hia mɔ do 'bako nzee.

¹⁴ Hiamɔ 'bakoe ni lia zala Heli, nɛ a aka gulu nɛ. Nɛ wi wili ni yu do gbɛnga tɛ̃ we tɔ̃ sakoe ni hã Heli.

¹⁵ Do 'da fala ni, Heli zi do 'bu sabɛlɛ kusi ngɔ nɛ ngbɛ'dɛ'dɛ, nɛ li a lɔa do'do.

¹⁶ Wi wili ni hɔa, nɛ a tɔ̃ hã Heli na: “Mi yu bole, nɛ mi yula sɔ i mɔ do yu gbaa, ma mi hɔa nɛ dɛ gɛ.” Nɛ Heli aka a na: “Be 'daa, ma la i mɔ nɛ nde?”

¹⁷ Nɛ wi wili ni gese na: “Obe Israɛlɛ wa yu do'do. Osodanɔ 'da lɛ, wa fia tɛ bole dè gɔ. Dɛ ngɔ nɛ, obenɔ 'da mɔ Hofni, do Pinasi, wa fia bɔa nɛ. Nɛ Ofilisti wa ba 'bɔ Sanduku Gba Tɔkɛ 'da Gale si do ma.”

¹⁸ 'Da fala kɛ Heli zila na, Ofilisti wa ba Sanduku Gba Tɔkɛ ni, nɛ a zɔlɔ ngɔ kpongbe 'da a, nɛ a te do li 'do a dɛ kpongbo nu tɔa Tande 'da Gale, nɛ gɛlɛ a gbini, nɛ a fe, we kɛ a dɛ zi kpasa wena, nɛ a dĩlĩ 'bɔ wena. A dungu zi ngɔ obe Israɛlɛ 'bu sabɛlɛ nalɛ we gɔnɔ we 'da wa.

¹⁹ Do 'da fala ni, nɛ konduka 'da Heli, kɛnɛ be 'da a Pinasi, zi do zã, nɛ a kɔlɔ dɔ̃ɔ do kula. Kɔ a nɛa we zele na, Ofilisti wa ba Sanduku Gba Tɔkɛ 'da Gale, nɛ kɛfɛ a Heli, do wili a Pinasi wa fia 'bɔ do'do ni, nɛ zɛlɛ kula tua a do ti, nɛ a ko.

²⁰ 'Do kɛ a kua ni, nɛ a mbɔkɔ fio vɛ̃. Nɛ owukonɔ kɛ wa dungu kɛ zã a ni, wa tɔ̃ hã a na: “Mɔ kpãlã sila mɔ! Be mɔ kua a gɛ a bulu be.” Wa tɔ̃a hã ni, nɛ nde a wèlè we gɔ, nɛ a lènggè 'bɔ do ma gɔ.

²¹ Ma la 'bɔ 'do nɛ sĩ, nɛ a na: “Mi ia li be gɛ na, Ikabɔdɛ. Gulu nɛ na, yele ngbala 'da Gale ma fua tɛ̃ ɛ ngɔ obe Israɛlɛ do'do.” Konduka ni ia li ni, we kɛ wa ba Sanduku Gba Tɔkɛ 'da Gale do'do, nɛ kɛfɛ a Heli do wili a Pinasi wa fia.

²² Ma kɛ a tɔ̃a na, yele ngbala fua tɛ̃ ɛ ngɔ obe Israɛlɛ, we kɛ Owi sɛnɛ wa, wa ba Sanduki Gba Tɔkɛ 'da Gale do'do.