1 SAMUƐLƐ 31 - WE NU GALE 1995

Saulo fia

¹ Do 'da fala ni, nɛ Ofilisti wa tɛa, nɛ wa bi obe Israɛlɛ tɛ ngɔ kala Gilboa. Nɛ wa gbɛ obe Israɛlɛ wena, nɛ tala wa mba do Saulo do benɔ 'da a, wa yu.

² Ofilisti wa ndaka 'do Saulo do obenɔ 'da a, nɛ wa kpa obenɔ 'da a Yonatanɛ, Abinadabɛ do Malkisua, nɛ wa gbɛ wa.

³ Nɛ wa linggi Saulo, nɛ ngawi bole vɛ̃ ma si dɛ ngɔ a. Nɛ owi da nzabele wa hɔ ngɔ a, nɛ kili ba a nganda wena.

⁴ A nɛa we zɔ ni, nɛ a tɔ̃ hã wi 'be mɔ bi bolonɔ 'da a na: “Mɔ bá du kɔya 'da mɔ, kɔ mɔ gbɛ́ mi, we kɛ mi kɔ̃̀ na, Ofilisti kɛ wa a manda'ba iko ni, wa gbɛ mi hã wa mɔmɔ wɔlɔ mi gɔ.” Nɛ kili ba wi 'be mɔ bi bolonɔ ni wena, nɛ a bɛ̃. Nɛ Saulo ba du kɔya 'da a, nɛ a te dɛ li nɛ, nɛ a fe.

⁵ 'Da fala wi 'be mɔ bi bolonɔ zɔa na, nwa 'da a fia do'do ni, nɛ a ba tɛ mɛ 'bɔ du kɔya 'da a, nɛ a te dɛ li nɛ, nɛ a fe.

⁶ Tɛlɛ tɛ kɛ Saulo do obulu benɔ 'da a talɛ, do wi 'be mɔ bi bolonɔ 'da a, do osodanɔ 'da a, wa fia zi vɛ̃ li wese kpo gɛ a ni.

⁷ Obe Israɛlɛ kɛ wa ɔ zi tɛ mbee kulu gbangɔlɔ̃ Yizreɛlɛ, do owanɔ wa ɔ tɛ mbee nu kolo lì Yɔrdanɛ ni, wa nɛa we zele na, onya wa wa yu bole do'do, nɛ Saulo do obenɔ 'da a wa fia 'bɔ ni, nɛ wa yu, nɛ wa la lenɔ 'da wa, nɛ Ofilisti wa nɛ, nɛ wa kala ma, nɛ wa kulu dɛ kɔ nɛ.

⁸ Fala sa 'do bole, nɛ Ofilisti wa yɛnggɛ we kala mɔ tɛ ofionɔ, nɛ wa kpa wɔlɔ Saulo do obenɔ 'da a talɛ ni dɛ ngɔ be kala tɛ Gilboa ni.

⁹ Wa 'bili gɛlɛ Saulo, nɛ wa kala mɔ bi bolonɔ 'da a. Nɛ wa tombo Owele tɛ ngɔ nù Filisti, we tɔ̃ dia sakoe ni kɔ tɔa dɔnggɔ okpikimanɔ 'da wa, do tɛ sanga owinɔ.

¹⁰ Nɛ wa a mɔ bi bolonɔ olo Saulo ni kɔ tɔa tɛmpɛloe 'da gale Astarte, nɛ wa gãlã wɔlɔ Saulo tɛ gba ngbo tɛ Bɛtɛ-Seanɛ.

¹¹ Owi Yabɛsi, tɛ ngɔ nù Galadɛ, wa zila tɛlɛ tɛ kɛ Ofilisti wa dɛa do Saulo ni.

¹² Nɛ mbe Owi kpã silanɔ kɔ le ni, wa nɛa do tũ gɛ gbaa we hɔ tɛ Bɛtɛ-Seanɛ. Nɛ wa fua wɔlɔ Saulo, do kɛnɔ 'da benɔ 'da a tɛ gba ngbo le ni, nɛ wa si do ma dɛ Yabɛsi i, nɛ wa dɔ ma.

¹³ 'Do nɛ, nɛ wa ngɛmɛ gbãlã wa, nɛ wa mi ma ti mbe te tamarisi dɛ kɔ le Yabɛsi ni. Nɛ wa bɛ̃ nyɔngɔmɔ 'do tũ sambo.