1 SAMUƐLƐ 30 - WE NU GALE 1995

Davidi bi bolo do Oamalɛkɛ

¹ Ma la 'do nɛ tũ bɔa, nɛ Davidi do owinɔ 'da a wa hɔ kɔ le Siklagɛ. Ĩ na, Oamalɛkɛ wa bi zi nù Yuda si ba gɔtɔ, mba do le Siklagɛ. Nɛ wa fi we tɛ le, nɛ wa 'danga ma do'do.

² Wa kala owuko, obe, do okpasa winɔ kɔ le ni, nɛ wa la do wa, nɛ nde wa gbɛ wele kpo gɔ.

³ Kɔ 'da fala Davidi do owinɔ 'da a wa nɛa we hɔ kɔ le Siklagɛ i, nɛ wa kpa na, Owele wa fi we tɛ le, nɛ wa kala 'bɔ owukonɔ, obulu benɔ do oboko benɔ kɔ le ni la do wa do'do.

⁴ Nɛ Davidi do owinɔ 'da a, wa ma ngɔ bi tɛ wa, nɛ wa hia gbaa, nɛ hi wa ma ha.

⁵ Oamalɛkɛ wa la zi 'bɔ do owukonɔ 'da Davidi bɔa kɛ li wa a Ahinoamɛ, boko Yizreɛlɛ, do Abigailɛ, boko Karmɛlɛ, kɛ a a wuko olo Nabalɛ ni.

⁶ Davidi zɔa ní, nɛ a ĩ na ɛ zɔ sɛ ngamɔ wena, we kɛ zã owinɔ 'da a nɔ̃lɔ̃ wena we obenɔ 'da wa kɛ wa yɔa ni, nɛ wa kɔ̃a we lo a do ta, kɔ wa gbɛ a. Nɛ nde 'da fala ni, NWA Gale 'da Davidi hã kpã sila hã a.

⁷ Nɛ Davidi tɔ̃ hã nganga Abiatarɛ, be 'da Ahimelɛkɛ na, a tɛ do mɛnɔ kɛ ma santo we aka do Gale ni. Abiatarɛ tɛa do mɛnɔ ni,

⁸ nɛ Davidi aka NWA na: “Fala kɛ mi ndaka 'do owinɔ wa 'danga le gɛ, nɛ mi kala sɛ wa nde?” Nɛ NWA gese hã a na, a nɛ, nɛ a kala sɛ wa, nɛ a kpasa sɛ 'bɔ winɔ wa kala wa la do wa ni.

⁹ Nɛ Davidi do owinɔ 'da a kama gazɛlɛ ni, wa lia wala we ndaka 'do wa. 'Da fala wa hɔa tɛ nu fua lì Bɛsɔrɛ ni,

¹⁰ nɛ Owele kama bɔa wa 'bana dɛ di ni, we kɛ wa mbɔkɔ wena, nɛ wa wè tɛ kũ fua lì ni gɔ. Nɛ Davidi la do mbe wanɔ kama nalɛ ni.

¹¹ Wa nɛa gbaa, nɛ wa kpa mbe be zagbãlã Ezipeto kpo tɛ zamɔ i, nɛ wa ba a si do a hã Davidi. Wa hã nyɔngɔmɔ hã a, nɛ wa hã 'bɔ lì hã a,

¹² we kɛ a nyɔngɔ zi mɔ gɔ, nɛ a nɔ zi lì gɔ 'do tũ talɛ vɛ̃. 'Do nɛ, nɛ wa hã 'bɔ mukate kɛ wa dɛa do wala te figɛ ni, do kula ganza wala te vinɔ bɔa hã a. A nɛa we nyɔngɔ mɛnɔ ni do'do, nɛ a kpa ngawi.

¹³ Nɛ Davidi aka a na: “Wele mɔ a wio nde? Nɛ mɔ yula do nde?” Nɛ a gese na: “Mi a be Ezipeto, nɛ mi a ngbá 'da be Amalɛkɛ. Nɛ wele mi la mi di ni 'do tũ talɛ, we kɛ mi tia do zɛlɛ.

¹⁴ Zi dati, lɛ bi owinɔ ngɔ o'bili tɛ nùnɔ 'da Okrɛtɛ si ba gɔtɔ do Oyudanɔ, do Okalɛbɛ. Nɛ lɛ dɔa 'bɔ le Siklagɛ.”

¹⁵ Nɛ Davidi aka a na: “Mɔ kɔ̃a we kã mi gbaa we hɔ 'da owi 'danga lenɔ ni nde?” Nɛ wi ni gese hã Davidi na: “Fala kɛ mɔ kana tɛ mɔ dati Gale na, mɔ gbɛ́ sɛ mi gɔ, tabi mɔ gésé sɛ mi hã wele mi gɔ ni, nɛ mi kpe sɛ ti mɔ gbaa we hɔ 'da wa i.”

Davidi bi do Oamalɛkɛ, nɛ a nɛ ngɔ wa

¹⁶ Wi wili ni kpia ti Davidi gbaa, nɛ wa hɔ 'da Oamalɛkɛ i. Wa kpa wa, nɛ nde wa pɛsɛ do kɔ le vɛ̃, tɛ nyɔngɔ mɔ do nɔ dɔ̃. Wa tɛ dɛ gbalimɔ do gili mɛnɔ kɛ wa kala ngɔ nù Filisti do Yuda ni.

¹⁷ Nɛ Davidi do owinɔ 'da a wa bi wa, yolo titole gbaa, nɛ fala sa 'do nɛ we hɔ gɛ̃a wese, nɛ wa nɛa ngɔ wa. Nɛ wi yu tati a obe zagbãlã kama nalɛ, kɛ wa kũ dɛ li 'do osamo, nɛ wa yu do wa ni.

¹⁸ Nɛ Davidi kpasa owinɔ 'da a do owukonɔ 'da a bɔa ni, nɛ a kala 'bɔ mɛnɔ vɛ̃ kɛ Oamalɛkɛ wa kala zi ni.

¹⁹ Obenɔ do okpasa winɔ 'da wa kɛ Oamalɛkɛ wa kala zi wa ni, wa 'bana zi vɛ̃, zu wele kpo yɔ̀ zi gɔ. Nɛ mɛnɔ ma 'bana zi 'bɔ dɛ olo nɛ vɛ̃. Nɛ Davidi kala omɛnɔ vɛ̃ kɛ owi sɛnɛ wa, wa kala zi ni.

²⁰ A kala zi tɛ mɛ 'bɔ ogili bata do ongɔmbɛnɔ 'da Oamalɛkɛ. Nɛ owinɔ wa kpe zi ti sa'denɔ we si do wa ni, wa tɔ̃ na: “Nɛ zɔ́ mɛnɔ Davidi kala li bole gɛ!”

²¹ Davidi kpula tɛ̃ a dɛ 'da owinɔ 'da a kama bɔa, kɛ wa mbɔkɔ zi wena, nɛ wa wè zi we nɛ 'do a gɔ, nɛ a la zi wa dɛ nu fua lì Bɛsɔrɛ i ni. Winɔ ni wa gɔnɔ dati Davidi do owinɔ wa nɛa bole do a ni. Nɛ Davidi do owinɔ ni wa nɛa, nɛ wa fana owanɔ kama bɔa ni.

²² Nɛ ombe 'dã winɔ do oyɔnda winɔ kɔ owinɔ kɛ Davidi la zi do wa ni, wa tɔ̃ na: “Ɔ nɛ kɛ wa nɛ do lɛ gɔ ni, lɛ hã́ sɛ mɔ kpo kɔ mɛnɔ lɛ kala gɛ hã wa gɔ. Ma wia na, wele do wele ba kɛnɛ a do benɔ 'da a iko, nɛ a la.”

²³ Nɛ Davidi gese na: “Aa mbaanɔ, nɛ tɛ dɛ do mɛnɔ nwa hã ma hã lɛ gɛ ni gɔ. A fɔmɔ lɛ, nɛ a ia 'bɔ owi 'danga lenɔ, kɛ lɛ bi wa ni dɛ kɔ lɛ.

²⁴ Wele kpo wè tɛ kɔ̃ gɛnɛ linggamɛ 'da nɛ gɔ. Mba gɔ, wele do wele a wia tɛ kpa mɔ kɛ lɛ si do ma ni. Wi nɛ bolo do wi dungu kɛ zã tolenɔ, wa gɔnɔ sɛ sanga mɛnɔ dɛ kɔ̃ ngba wa.”

²⁵ Davidi ia mbula ni, nɛ ma hɔ gã mbula ngɔ nù Israɛlɛ. Nɛ mbula ni ma 'bana dɛ tɛ̃ ɛ tia do sɔɛ gɛ.

²⁶ 'Da fala Davidi kpula tɛ̃ a dɛ Siklagɛ i ni, nɛ a tombo mbe omɛnɔ a si do ma ni hã okumunɔ 'da Oyuda, kɛ wa a oyali ngba a ni. Davidi tumba Owele na, wa tɔ̃ hã okumunɔ ni na: “Kɛ gɛ, mɛ a dia mɔ kɛ mi hã ma hã nɛ. Ma yolo kɔ mɛnɔ kɛ lɛ kala kɔ̃ owi sɛnɛ nwa ni.”

^27-29 A tumba 'bɔ mbe mɛnɔ ni hã okumunɔ tɛ kɔ lenɔ gɛ: Betɛlɛ, Ramɔtɛ, tɛ ngɔ nù Negɛvɛ, Yatirɛ, Arɔɛrɛ, Sifmɔtɛ, Ɛstɛmoa, do Rakalɛ. Nɛ owanɔ tɛ kɔ le 'da Oyɛramelɛ do Okeni wa kpa 'bɔ.

^30-31 Owanɔ tɛ kɔ le Horma, Bɔrɛ-Akanɛ, Atakɛ, Hebroni, do owanɔ kɔ be lenɔ vɛ̃, Davidi la zi nɛ dati do winɔ 'da a ni, wa kpa tɛ mɛ 'bɔ mɛnɔ ni.