1 SAMUƐLƐ 3 - WE NU GALE 1995

Gale ia Samuɛlɛ do wi gba olo nu ɛ

¹ Samuɛlɛ 'bana zi do be, nɛ a dɛ toe hã NWA ti Heli. Nɛ nde do 'da fala ni, NWA wélé we do wele ngbo ngbo gɔ, nɛ a bé 'bɔ mɔ li wele wena wena gɔ.

² Nɛ mbe tũ kpo, nɛ Heli kɛ a zɔ́ zi 'bɔ mɔ ngboo gɔ ni, a tɛ ɔ yala tɛ fala 'da a.

³ Nɛ Samuɛlɛ ɔa tɛ mɛ 'bɔ yala kɔ tɔa Gale, kɛ Sanduku Gba Tɔkɛ kɔ nɛ ni. Do dati kɛ na fala ma ngɔ sa nɛ ni, nɛ nde nyɛa we kɔ tɔa Gale 'bana nyɛ nɛ,

⁴ nɛ NWA sa mɔ na: “Samuɛlɛ!” Nɛ Samuɛlɛ gese na: “Mi boe!”

⁵ A kulu ngɔ, nɛ a wɛlɛ tɛ̃ a dɛ 'da Heli i, nɛ a tɔ̃ hã a na: “Mɔ sa mɔ hã mi nde, mi kɛ.” Nɛ Heli gese hã a na: “Mi sà mɔ hã mɔ gɔ. Mɔ kpóló tɛ mɔ, hã mɔ ɔ nù.” Nɛ Samuɛlɛ kpolo tɛ̃ a, nɛ a ɔ nù.

⁶ NWA sa 'bɔ mbé mɔ hã a na: “Samuɛlɛ!” Nɛ Samuɛlɛ kulu ngɔ, nɛ a nɛ 'bɔ 'da Heli i, nɛ a na: “Mɔ sa mɔ hã mi nde, mi kɛ.” Nɛ Heli gese hã a na: “Mi sà mɔ hã mɔ gɔ, be 'daa. Mɔ kpóló tɛ mɔ, hã mɔ ɔ nù.”

⁷ Nɛ nde Samuɛlɛ tɛ ĩ̀ zi ti NWA gɔ, we kɛ NWA tɛ wèlè mbe we do a fala kpo gɔ.

⁸ Fala talɛ kɛ, nɛ NWA sa 'bɔ mɔ hã Samuɛlɛ na: “Samuɛlɛ!” Nɛ Samuɛlɛ kulu ngɔ, nɛ a nɛ 'bɔ 'da Heli i, nɛ a na: “Mɔ sa mɔ hã mi nde, mi kɛ.” Do 'da fala ni, nɛ Heli ĩ na, wi a nwa hã a sa mɔ hã be.

⁹ Nɛ a tɔ̃ hã Samuɛlɛ na: “Mɔ kpóló tɛ mɔ, hã mɔ ɔ nù. Kɔ fala kɛ a sa 'bɔ mbé mɔ hã mɔ, nɛ mɔ gese sɛ na: ‘NWA, mɔ tɔ̃ hã mi, wi dɛa to 'da mɔ, hã mi zele.’ ” Nɛ Samuɛlɛ kpolo tɛ̃ a, nɛ a ɔ nù.

¹⁰ Nɛ NWA tɛa, nɛ a yolo, nɛ a sa mɔ ɔ nɛ kɛnɔ sɔ dati ni. A na: “Samuɛlɛ, Samuɛlɛ!” Nɛ Samuɛlɛ gese na: “NWA, mɔ tɔ̃́ hã mi, wi dɛa toe 'da mɔ, hã mi zele.”

¹¹ Nɛ NWA tɔ̃ hã Samuɛlɛ na: “Mi nɛ tombo ngamɔ hã owinɔ tɛ ngɔ nù Israɛlɛ. Nɛ winɔ vɛ̃ kɛ wa zele sɛ we ngamɛ ni, nɛ zu wa ma vĩ sɛ.

¹² Nɛ do kpo kɔ̃ tũi ni, mi dɛ sɛ na, ngamɛnɔ vɛ̃ mi tɔ̃a zi nɛ ni, ma kpa nu fɛlɛ Heli. Nɛ mi élé sɛ olo nu mi kpo gɔ.

¹³ Mi tɔ̃a hã a ia na, mi nɛ hã etumbu kɛ ma é sɛ gɔ ni hã nu fɛlɛ a, we duzu kɛ obenɔ 'da a wa dã zu li mi, nɛ a ĩ fala nɛ, nɛ nde a gà wa gɔ.

¹⁴ Ma kɛ mi fɔmbɔ nu fɛlɛ a na, gɛnɛ kɔ wa gbɛ sa'de we dɔnggɔ do mi, tabi wa hã dɔnggamɔ, nɛ nde ma fó sɛ ku'da 'dã mɔ zu wa fala kpo gɔ.”

¹⁵ NWA tɔ̃a we hã Samuɛlɛ ni do'do, nɛ a la. Nɛ dɛ olo nɛ ni, nɛ Samuɛlɛ ɔa nù gbaa titole. Nɛ do titole ni, nɛ a kulu ngɔ, nɛ a hũi nu tɔa Tɛmpɛloe. Nɛ a dɛa kili be gulu mɛ a zɔa ni hã Heli do'do.

¹⁶ Nɛ Heli sa mɔ hã a na: “Samuɛlɛ, be 'daa.” Nɛ a kɔ̃.

¹⁷ Nɛ Heli aka a na: “NWA tɔ̃a hã mɔ na ge nde? Mɔ tɛ ùsù we kpo do mi gɔ. Fala kɛ mɔ usu we do mi, nɛ Gale hã nga etumbu hã mɔ.”

¹⁸ Samuɛlɛ nɛa we zele ni, nɛ a bia gulu wenɔ vɛ̃ kɛ Gale tɔ̃a ni hã Heli. A ùsù we kpo gɔ. Heli zila do'do, nɛ a tɔ̃ na: “A a NWA. E kɔ a dɛ ɔ nɛ kɛ ma dia tɛ̃ a ni.”

¹⁹ Ma ɔa gbaa, nɛ Samuɛlɛ gã. Nɛ NWA fala nɛ kpo do a. NWA dɛa na, olɛnggɛnɔ vɛ̃ kɛ Samuɛlɛ tɔ̃ ni, ma dɛ tɛ̃ ɛ do olo nu a ni.

²⁰ Ma kɛ ngɔ nù Israɛlɛ vɛ̃, yolo ndɔti nɛ we hɔ Sɔkpɔ nɛ, wa ĩ na, Samuɛlɛ a ngbongbo wi gba olo nu NWA.

²¹ NWA 'bana zi tɛ be tɛ̃ a tɛ Silo i bia fai. Mba gɔ, mɛ a fala a be do tɛ̃ a hã Samuɛlɛ, nɛ a be do gulu lɛnggɛ 'da a, sɛ nɛ Samuɛlɛ gba nu nɛ hã nu kɔnggɔ Israɛlɛ vɛ̃ de.