1 SAMUƐLƐ 29 - WE NU GALE 1995

Ofilisti wa fua Davidi kɔ wi bolonɔ 'da wa

¹ Ofilisti wa ngɛmɛ li osodanɔ 'da wa vɛ̃ dɛ kɔ le Afɛkɛ. Nɛ nde obe Israɛlɛ wa 'dafa fala ɔi 'da wa tɛ nu be waya, dɔ̃ɔ do le Yizreɛlɛ.

² Ogã wi ngɔ Ofilisti wa la dati, ombe wa ngɔ osoda kama kpo, nɛ ombe nɛ ngɔ osoda koto kpo. Nɛ Davidi do owinɔ 'da a kɛ wa kã zi nwa Akisi ni, wa kpia kɛ 'da wa do ngɔ go'do wa.

³ Onwa ngɔ osoda Filisti wa zɔa Davidi do owinɔ 'da a, nɛ wa aka Akisi na: “Obe Hebrenɔ gɛ, wa a wio nde?” Nɛ a gese hã wa na: “Nɛ ĩ̀ ti Davidi, kɛ a zi tɛ toe 'da nwa Saulo ni gɔ nde? A ɔa 'da mi gɛ kɔlɔ do sabɛlɛ bɔa kɔla. Yolo do ngba soe a la do nwa 'da a ni gbaa we hɔ sɔɛ gɛ, mi tɛ kpà a do 'dã mɔ na, mi dãlã dɛ tɛ̃ a gɔ.”

⁴ Onwa ngɔ osoda Filisti wa nɛa we zele ni, nɛ zã wa nɔ̃lɔ̃ dɛ tɛ nwa Akisi, nɛ wa tɔ̃ hã a na: “Mɔ gésé wi gɛ, hã a kpolo tɛ̃ a dɛ kɔ le mɔ ba hã a na, a dungu nɛ ni. Ma wè na, a le kɔ bole 'da lɛ gɔ. Mbe gɔ, nɛ a wia tɛ siki li a dɛ tɛ lɛ 'da fala bole, nɛ a 'dɔlɔ winɔ 'da lɛ hã ã nwa 'da a, takɔ a de li a.

⁵ Lɛ vɛ̃ lɛ ĩ na, Davidi a wi kɛ wukonɔ wa yɔ zi yɔla, nɛ wa ga zuma do zu li a tɛ tɔ̃ na: ‘Saulo gbɛa Owi sɛnɛ lɛ koto kpo, nɛ Davidi gbɛa wa koto 'bu’ ni.”

⁶ Nɛ Akisi sa mɔ hã Davidi, nɛ a tɔ̃ hã a na: “Mi kana tɛ mi do zu li NWA wele kpasi na, mɔ wia wi kɛ na, mi gbini zã mi do mɔ. Mi kɔ̃a sɔ wena na, mɔ le kɔ bole gɛ do mi. Mba gɔ, yolo do tũi mɔ hɔa le 'da mi gɛ gbaa we hɔ sɔɛ gɛ, mi kpà mɔ do 'dã mɔ gɔ. Nɛ nde mɔ dè tɛ ombe nwa ngɔ osoda Filisti gɔ.

⁷ We duzu nɛ, mɔ sí do dia nɛ, da dɛ kɔ zã wa nɔ̃lɔ̃ gɔ.”

⁸ Nɛ Davidi aka a na: “Aa nwa, mɛ ngboo mi dɛa gɛ a ge nde? Yolo do tũi mi lia zi do toe 'da mɔ gbaa we hɔ sɔɛ gɛ ni, mbe mɛ kɛ mɔ dãlã dɛ tɛ mi we nɛ ni a ge nde? Gulu kɛ mi wè tɛ nɛ we bi Owi sɛnɛ mɔ gɔ ni we ge nde?”

⁹ Nɛ Akisi gese hã a na: “Mi ĩ na, mɔ kpo bina. Mɔ dia tɛ mi ɔ nɛ anzɛ 'da Gale ni. Kɔ tati nɛ a we onwa ngɔ osoda Filisti wa tɔ̃a hã mi na, mɔ wè tɛ le kɔ bole 'da lɛ go.

¹⁰ Kɔ ma wia na, mɔ kulu sɛ ngɔ bindɛ do titole belee do owinɔ 'da mɔ. Kɔ fala ma ngɔ sa nɛ, nɛ nɛ lá.”

¹¹ Davidi zila ní, nɛ fala sa 'do nɛ do titole belee, nɛ a kulu ngɔ do owinɔ 'da a, nɛ wa si dɛ ngɔ nù 'da Ofilisti i. Nɛ Ofilisti wa la kɛ 'da wa dɛ Yizreɛlɛ.