1 SAMUƐLƐ 28 - WE NU GALE 1995

¹ Do 'da fala ni, nɛ Ofilisti wa ngɛmɛ ngɔ gili osodanɔ 'da wa vɛ̃, takɔ wa bi bolo do obe Israɛlɛ. Nɛ Akisi tɔ̃ hã Davidi na: “Mɔ ĩ na, mɔ do owinɔ 'da mɔ, nɛ bi sɛ mbe bole hã lɛ.”

² Nɛ Davidi gese hã a na: “Nwa, mi kɔ̃a! Mɔ zɔ sɛ mɛ mi nɛ dɛ nɛ ni.” Nɛ nwa Akisi tɔ̃ hã Davidi na: “Ma a dia, kɔ mi ba mɔ do soda zɔ mɔ tɛ mi fai.”

Saulo nɛa 'da wi sɔ̃ tɛ kɔ le Ɛnɛ-Dɔrɛ

³ Do 'da fala ni, nɛ Samuɛlɛ fia, nɛ obe Israɛlɛ vɛ̃ wa nɛ ngɔ fio a, nɛ wa mi a tɛ kɔ le 'da a tɛ Rama. Wa mi a, nɛ Saulo ndaka wi sɔ̃nɔ do owinɔ wa wele we do obɔzɔnɔ ngɔ nùi 'da a ni do'do.

⁴ Mbe tũ kpo, nɛ Ofilisti wa mba ngba wa, nɛ wa nɛ, nɛ wa 'dafa fala ɔi 'da wa dɔ̃ɔ do Sunɛmɛ. Saulo ngɛmɛ tɛ mɛ 'bɔ li osoda Israɛlɛ, nɛ wa 'dafa fala ɔi 'da wa dɔ̃ɔ do kala Gilboa.

⁵ 'Da fala Saulo nɛa we zɔ osoda Filisti ni, nɛ kili ba a, nɛ a ma ngɔ tana tuku tuku ɔ nɛ nwá te ni.

⁶ Nɛ a aka NWA Gale na, ɛ dɛ nɛ nde? Nɛ nde nwa gèsè nu we hã a do yalɛ tabi do wala 'da wi gba olo nu a gɔ. A gèsè 'bɔ we do wala 'da mɔ kɛ ma santo we aka do a Gale ni gɔ.

⁷ Nɛ Saulo ba nu a hã ogã wi ngɔ sodanɔ 'da a na: “Nɛ fa mbe wuko kɛ a wia tɛ aka ofionɔ ni hã mi, takɔ mi nɛ we wele we do a.” Nɛ wa gese hã a na: “Mbe wuko ɔ ni tɛ kɔ le Ɛnɛ-Dɔrɛ gɛ boe.”

⁸ Saulo kpolo tulu tɛ̃ a na, wa yɔ ti a, nɛ a kala wele bɔa la do wa tɛ Ɛnɛ-Dɔrɛ i. Wa hɔa 'da wuke ni do tũ, nɛ Saulo tɔ̃ hã a na: “Mɔ kɔ̃, nɛ mɔ wele we do mbe bɔzɔ kpo hã mi, we ĩ ti mɛ ma nɛ dɛ tɛ̃ ɛ ni. Nɛ mɔ sa mɔ hã wi kɛ mi sa sɛ li a hã mɔ ni dɛ nza.”

⁹ Nɛ wuke ni gese hã a na: “Mɔ ĩ na, Saulo ndaka owinɔ wa wele we do obɔzɔnɔ ni ngɔ nùi 'da a do'do. Kɔ gulu kɛ mɔ kɔ̃a we ndɔ bili hã mi na, mi fe we ge nde?”

¹⁰ Nɛ Saulo kana tɛ̃ ɛ hã a do zu li nwa na, a kpá sɛ etumbu gɔ.

¹¹ Nɛ wuke aka a na: “Wi ngboo mɔ kɔ̃a na, mi sa mɔ hã a dɛ nza hã mɔ a wio nde?” Nɛ Saulo gese hã a na, a sa mɔ hã Samuɛlɛ.

¹² 'Da fala wuke nɛa we zɔ Samuɛlɛ ni, nɛ a he mɔ nganda wena, nɛ a tɔ̃ hã Saulo na: “Wi gɛ a mɔ Saulo, kɔ gulu kɛ mɔ ɔlɔ mi ní we ge nde?”

¹³ Nɛ nwa Saulo gese hã a na, a tɛ dɛ̀ kili gɔ. A tɔ̃ we mɛ a zɔa ni hã ɛ. Nɛ wuke tɔ̃ hã a na: “Mi zɔa bɔzɔ, a yula ti nù i, kɔ a hɔ dɛ nza nga.”

¹⁴ Saulo aka a na, a ɔ nɛ nde? Nɛ a tɔ̃ hã a na: “Mɛ a kpasa wi, nɛ a hi'da gã tulu ngɔ.” Saulo nɛa we zele ni, nɛ a ĩ na, wi ni a Samuɛlɛ. Nɛ Saulo gu gba zugolo, nɛ a bili gbaa nɛ zu a to nù we dɔnggɔ Samuɛlɛ.

¹⁵ Nɛ Samuɛlɛ aka Saulo na: “Gulu kɛ mɔ yɛkɛ mi we ge nde? Mɔ sa mɔ hã mi na ge nde?” Nɛ Saulo gese hã a na: “Mi do 'bako wena, we kɛ Ofilisti wa kɔ̃a we bi bolo do lɛ, nɛ Gale kifi 'do a hã mi do'do. A gèsè nu we hã mi do wala 'da wi gba olo nu a, tabi do wala yalɛ 'bɔ gɔ. Gulu nɛ hã mi sa mɔ hã mɔ na, mɔ tɛ kɔ mɔ tɔ̃ we kɛ mi wia tɛ dɛ nɛ ni hã mi.”

¹⁶ Nɛ Samuɛlɛ tɔ̃ hã a na: “Gulu kɛ mɔ aka mi we ge nde? Mɔ ĩ na nwa siki 'do a hã mɔ, nɛ a sɛnɛ mɔ ia.

¹⁷ A dɛa gɛ a olo kɛ mi tɔ̃a zi hã mɔ ni. A ba to nwa kɔ̃ mɔ we hã ma hã Davidi.

¹⁸ We kɛ nwa tɔ̃a zi hã mɔ na, mɔ gbɛ Oamalɛkɛ vɛ̃, nɛ mɔ bɛ̃a mbula 'da a. Gulu nɛ hã a dɛa do mɔ na mɛ ni.

¹⁹ A e sɛ mɔ, do owinɔ 'da mɔ ti mbula 'da Ofilisti. Nɛ bindɛ, nɛ mɔ do obenɔ 'da mɔ, nɛ kpa sɛ mi kɔ le 'da ofionɔ nga. Nɛ osodanɔ 'da mɔ, wa sɛ ti mbula 'da Ofilisti.”

²⁰ Saulo nɛa we zele wenɔ Samuɛlɛ tɔ̃a ni, nɛ gbãlã tɛ̃ a gbini, nɛ a te nu, nɛ kili ba a nganda wena. Dɛ ngɔ nɛ, a zi 'bɔ do ngawi kɔ kili tɛ̃ a bina, we kɛ ngba soe ni vɛ̃ a nyɔngɔ mɔ gɔ.

²¹ Wuke ni tɛa, nɛ a kɔlɔ do Saulo, nɛ a zɔ kɛ kili ba a wena ni, nɛ a tɔ̃ hã a na: “Aa nwa, mi dɛa we nu mɔ, nɛ mi hɔa fɛna fio we dɛ kɛ mɔ aka mi ni.

²² Kɔ ma wia na, mɔ zele tɛ mɛ 'bɔ mi sɛ! Mi nɛ tɛ do be nyɔngɔmɔ hã mɔ na, mɔ nyɔngɔ, hã mɔ kpa ngawi, sɛ nɛ mɔ si de.”

²³ Saulo bɛ̃a we nyɔngɔ mɛnɔ vɛ̃. Nɛ owinɔ 'da a do wuke ni, wa ala nu wa hã a ni gbaa, nɛ a kɔ̃. Nɛ a kulu ngɔ nùi, nɛ a dungu ngɔ mɔ ɔi.

²⁴ Wuke la do ti, nɛ a ba be ngɔmbɔ kɛ a dala a na, a ɔ do nɔ wena ni, nɛ a gbɛ a. Nɛ a ba farini, nɛ a zanga ma, nɛ a dɔ do mapa kɛ wa à ina hana mapa tɛ nɛ gɔ ni.

²⁵ Nɛ a hã nyɔngɔmɛ ni hã Saulo do owinɔ 'da a. Wa nyɔnga mɛ do'do, nɛ wa kulu ngɔ, nɛ wa si do tũi ni.