1 SAMUƐLƐ 27 - WE NU GALE 1995

Davidi yu dɛ ngɔ nù 'da Ofilisti

¹ Davidi lingga mɔ, nɛ a tɔ̃ do kɔ sila a na: “Gɛnɛ kɔ gbaa, nɛ Saulo a gbɛ sɛ mi. Ni a mbé mɔ na, mi dɛ dɛa bina, dia nɛ na, mi yu dɛ ngɔ nù 'da Ofilisti i. Mi dɛ ní, nɛ Saulo a la sɛ fala ndaka 'do mi do ngɔ nù Israɛlɛ gɛ, nɛ mi kpasa sɛ ti kɔ̃ a.”

² Nɛ Davidi kulu ngɔ do owinɔ 'da a kama gazɛlɛ ni, nɛ a la dɛ 'da Akisi, nwa ngɔ nù Gatɛ, kɛ a a be 'da Maɔkɛ ni.

³ Nɛ wa vɛ̃, wele do wele do nu fɛlɛ kula 'da a, wa 'bana dɛ 'da Akisi tɛ Gatɛ ni. Davidi zi fala nɛ kpo do owukonɔ 'da bɔa, Ahinoamɛ boko Yizreɛlɛ, do Abigailɛ boko Karmɛlɛ, wuko olo Nabalɛ ni.

⁴ 'Da fala Saulo zila na, Davidi yu dɛ tɛ Gatɛ i ni, nɛ a la fala ndaka 'do a.

⁵ Mbe tũ kpo, nɛ Davidi tɔ̃ hã Akisi na: “Aa nwa, fala kɛ mɔ zɔ na, mi wia wi kɛ mɔ gbini zã mɔ do a, nɛ mɔ hã wala hã mi, kɔ mi nɛ we dungu tɛ kɔ mbe be le do zamɔ i. Gulu kɛ mi dungu fala nɛ kpo do mɔ kɔ le nwa gɛ bina.”

⁶ Do ngba soe ni, nɛ Akisi hã le Siklagɛ hã Davidi. Gulu nɛ hã tia do sɔɛ gɛ, le ni ma hɔa le 'da onwa ngɔ nù Yuda ni.

⁷ Davidi ɔa zi ngɔ nùi 'da Ofilisti sabɛlɛ kpo do zɛkɛ nalɛ.

⁸ 'Da fala kɛ a do owinɔ 'da a wa tɛ Siklagɛ ni, nɛ wa nɛ, nɛ wa bi Ogesurɛ, Ogirzi, do Oamalɛkɛ. Owinɔ ni wa ɔ zi fai tɛ ngɔ nùi ni, do si wala Surɛ gbaa we hɔ tɛ li ngbala nù Ezipeto.

⁹ Davidi do owinɔ 'da a wa 'danga lenɔ 'da wa, nɛ wa là wi wili tabi wuko kpo do tunu li a gɔ. Wa kala obata, ngɔmbɔ, punda do samo fala nɛ kpo do otulu olo wa, nɛ wa si do ma dɛ 'da Akisi i.

¹⁰ 'Da fala fai, nɛ Akisi aka Davidi na: “Winɔ nɛ bi wa sɔɛ gɛ a wio nde?” Nɛ Davidi ɔlɔ a na: “Lɛ bi owinɔ kɔ 'bili tɛ nù Yuda, si ba gɔtɔ.” Mbe ngba soe ki ni, nɛ a na: “Lɛ bi owinɔ kɔ 'bili tɛ nù Yɛramelɛ, si ba gɔtɔ.” Tabi na: “Lɛ bi owinɔ kɔ 'bili tɛ nù Keni, si ba gɔtɔ.”

¹¹ Kɔ bolonɔ ni, Davidi kàlà zi wi wili tabi wuko do tunu li wa si do wa gɔ, we kɛ a dɛ zi kili na, da dɛ kɔ wa tɔ̃ we do zu li ɛ na: “Nɛ zɔ́ kɛ Davidi dɛ gɛ” gɔ. Tɛlɛ tɛ mɛ Davidi dɛa 'da falanɔ vɛ̃, kɛ a zi ngɔ nùi 'da Ofilisti gɛ a ni.

¹² Gulu nɛ hã Akisi gbini zã ɛ do a, we kɛ a lingga na, obe Israɛlɛ wa sɛnɛ Davidi wena. Na mɛ ni, Davidi sɛ fai tɛ dɛa toe 'da ɛ.