1 SAMUƐLƐ 26 - WE NU GALE 1995

Davidi la 'bɔ Saulo do tunu li a

¹ Owi Zifɛ wa nɛa, nɛ wa kpa Saulo tɛ kɔ le Gibea, nɛ wa tɔ̃ hã a na, Davidi usu tɛ̃ ɛ ngɔ kalanɔ tɛ Hakila, dɔ̃ɔ do li gba zɔ́ kpangba.

² Saulo kulu ngɔ, nɛ a la tɛ li gba zɔ Zifɛ i, we fa Davidi. A kulu ngɔ do osoda koto talɛ kɔ nga osoda bolo ngɔ nù Israɛlɛ.

³ A nɛa gbaa, nɛ a 'dafa fala ɔi 'da a ngɔ okalanɔ tɛ Hakila dɔ̃ɔ do li wala. Davidi zi dɛ li gba zɔ̃ɛ ni, nɛ a zele na, Saulo tɛa we fa a.

⁴ Nɛ a tumba Owi miã, nɛ wa nɛ, nɛ wa kpa na mɛ ni na, Saulo hɔa.

⁵ Davidi nɛa, nɛ a hɔ fala ɔi 'da Saulo, we soko fala ngboo Saulo do Abnɛrɛ wa ɔ nɛ ni. Abnɛrɛ a be 'da Nɛrɛ, nɛ a a gã wi ngɔ osodanɔ 'da Saulo. Davidi zɔa nɛ nde Saulo ɔa dɛ gbogbo fanda, nɛ osodanɔ vɛ̃ wa ɔa zĩ do a takpa.

⁶ Davidi sa mɔ hã Ahimelɛkɛ, be Hiti, do Abisai, nya Yoabɛ, benɔ 'da Sɛruya, nɛ a aka wa na: “Wi kɔ nɛ gɛ, kɛ a kɔ̃a we nɛ do mi fala ɔi 'da Saulo i a wio nde?” Nɛ Abisai gese hã a na, ɛ nɛ sɛ.

⁷ Do tũi, nɛ Davidi do Abisai wa nɛa fala ɔi 'da osodanɔ 'da Saulo i. Wa hɔa, nɛ wa kpa Saulo, nɛ nde a ɔa nù dɛ gbogbo fanda. A zĩ sɛlɛ 'da a kɔlɔ dɔ̃ɔ do fala a ia do zu a ni, nɛ Abnɛrɛ do osodanɔ wa ɔa nù zĩ do a takpa.

⁸ Nɛ Abisai tɔ̃ hã Davidi na: “Gale 'dɔlɔ wi sɛnɛ mɔ tũi gɛ hã mɔ ia. Mɔ hã wala hã mi, kɔ mi nɛ, kɔ mi ba sɛlɛ 'da a, hã mi nda'da a do nùi. Mi to sɛ a kɔ̃ mi kpo iko, mi tó sɛ a fala bɔa gɔ.”

⁹ Nɛ Davidi gese hã a na: “Mɔ tɛ gbɛ a gɔ. Mɔ lengge na, wele wia tɛ dɛ 'dã mɔ do nwa kɛ Gale saka a ni, nɛ a zɔlɔ kpa etumbu nde?

¹⁰ Do zu i nwa wele kpasi, mi tɔ̃ hã mɔ na, nwa do tɛ̃ a, a gbɛ sɛ Saulo, tabi do fio tɔa, tabi do fio bolo.

¹¹ Nɛ nde e kɔ nwa fɔmɔ mi na, mi tɛ dɛ 'dã mɔ do nwa kɛ a saka a ni gɔ. Lɛ ba tati a sɛlɛ, do daka lì kɛ a ia kɔlɔ do zu a ni, kɔ lɛ la do ma.”

¹² Davidi ba sɛlɛ do daka lì 'da Saulo, nɛ wa la do ma. Nɛ wele kpo tùnù gɔ, nɛ wele kpo zɔ̀ mɛ ma la ni gɔ, nɛ wa ĩ̀ 'bɔ fala nɛ gɔ. Wa vɛ̃ a li yala, we kɛ NWA hã yala hã wa nganda wena.

¹³ Davidi kũ wala, nɛ a yolo do zu kala nyɛlɛ be sĩ do fala ɔi 'da Saulo.

¹⁴ Nɛ a he mɔ dɛ ngɔ osodanɔ 'da Saulo i, we sa mɔ hã Abnɛrɛ, be 'da Nɛrɛ na: “Mɔ, Abnɛrɛ, mi sá mɔ hã mɔ!” Abnɛrɛ zila, nɛ a aka na: “Wi kɔ̃a we yɛkɛ nwa ni a wio nde?”

¹⁵ Nɛ Davidi gese na: “Mɔ, Abnɛrɛ, mɔ a gã wi ngɔ osoda Israɛlɛ gɔ nde? Kɔ gulu kɛ wele tɛa we gbɛ nwa 'da mɔ, nɛ mɔ fɔmɔ a gɔ we ge nde?

¹⁶ Abnɛrɛ, mɔ dɛ toe 'da mɔ gɔ. Do zu li NWA wele kpasi, nɛ vɛ̃ nɛ wia sɔ do fio, we duzu kɛ nɛ fɔmɔ nwa 'da nɛ, kɛ NWA Gale saka a ni gɔ. Mɔ ka mɔ si fala nwa 'dafa we e do zu ɛ ni. Sɛlɛ do daka lì 'da a i do nde?”

¹⁷ Saulo zila gɛlɛ Davidi, nɛ a ĩ ti ma, nɛ a aka na: “Wi mi zele gɛlɛ a ni a mɔ Davidi, be 'da mi nde?” Nɛ Davidi gese hã a na: “Nwa, wi a mi a ni.

¹⁸ Kɔ gulu kɛ mɔ ndaka 'do mi we ge nde? Mɛ mi dɛa do mɔ ni a ge nde? 'Dã mɛ mi dɛa a ge nde?

¹⁹ Aa nwa, mɔ kɔ̃, nɛ mɔ zélé we mi nɛ tɔ̃ nɛ gɛ. Fala kɛ NWA Gale hã a hã wala hã mɔ na, mɔ dɛ do mi na mɛ ni nde, nɛ mi hã sɛ dɔnggamɔ hã a, takɔ sila a ma gɛ̃. Kɔ fala kɛ Owele hã wa dɛ na mɛ ni nde, nɛ e kɔ NWA fɔmbɔ wa. Mba gɔ, wa tɛ ndaka mi sɔɛ gɛ, nɛ wa bɛ̃ na, mi tɛ dùngù ngɔ nùi NWA hã zi ma hã lɛ owinɔ 'da a ni gɔ. Ma ɔ nɛ kɛ wa tɛ tɔ̃ hã mi na, mi la dɛ ngɔ gele nù, we sambala ogele gale ni.

²⁰ Nɛ nde mi kɔ̃̀ na, mi nyɛlɛ do NWA Gale, nɛ mi fe dɛ gele fala gɔ. Aa nwa, gulu kɛ mɔ kɔ̃a we bi bolo do mi, kɛ mi a fɔ̃ɛ yala iko ni we ge nde? Gulu kɛ mɔ ndaka 'do mi, ɔ nɛ kɛ wa ndi do gbalɛ ngɔ okalanɔ ni we ge nde?”

²¹ Saulo nɛa we zele ni, nɛ a he mɔ na: “Mi dɛ̃ de gɔ! Davidi be 'daa, mɔ sí 'do. Mi dɛ́ sɛ 'bɔ 'dã mɔ do mɔ gɔ, we kɛ mɔ gbɛ mi gɔ. Mi yɔa gã wena, nɛ mi dɛa mɔ tɛ mi ɔ nɛ yɔndɔ wi ni.”

²² Nɛ Davidi gese na: “Aa nwa, sɛlɛ 'da mɔ ma kɛ. Kɔ mɔ tombo mbe kɔ wi tonɔ 'da mɔ kpo na, a tɛ kɔ a ba ma.

²³ E kɔ NWA Gale 'bili we 'da lɛ do mɔ do dia zã 'da a, do bɔlɔ nɛ. NWA Gale 'dɔlɔ sɔ mɔ sɔɛ gɛ hã mi, nɛ nde mi kɔ̃̀ we dɛ 'dã mɔ do mɔ gɔ, we kɛ mɔ a nwa kɛ Gale saka mɔ.

²⁴ Ɔ nɛ kɛ gulu dungu nza 'da mɔ gã li mi wena ni, mi kɔ̃a tɛ mɛ 'bɔ na, dungu nza 'da mi ma ɔ nɛ mɔ olo gã gole ni we duzu NWA, nɛ a fo mi kɔ 'bako vɛ̃.”

²⁵ Nɛ Saulo tɔ̃ na: “E kɔ NWA wele nu a tɛ mɔ, Davidi be 'daa. Mɔ dɛ sɛ ogã mɔ, nɛ mɔ hɔ sɛ ndɔti nɛ vɛ̃ do dia nɛ.” Davidi la kɛ 'da a, nɛ Saulo si tɛ mɛ 'bɔ dɛ 'da ɛ i.