1 SAMUƐLƐ 25 - WE NU GALE 1995

Samuɛlɛ fia

¹ Do 'da fala ni, nɛ Samuɛlɛ fia. Nɛ obe Israɛlɛ vɛ̃ wa mba li ngba wa we ɔ ngɔ fio a. Wa mi a kɔ le 'da a tɛ Rama. 'Do nɛ, nɛ Davidi la dɛ li gba zɔ̃ Paranɛ.

Nabalɛ bɛ̃a we gala Davidi

^2-4 Nɛ mbe wi wili kpo kɔ nu fɛlɛ Kalɛbɛ, li a a Nabalɛ, a a wi kɔ le Maoni, nɛ a do nùi 'da a kɔlɔ dɔ̃ɔ Karmɛlɛ. A zi do kpamɔ wena, nɛ a do obata koto talɛ, nɛ odua koto kpo. Li kɛnɛ a a Abigailɛ, a de zɔnga wena, nɛ a 'bɔ do bã wena. Nɛ nde sila wili a nganda wena, nɛ a 'danga 'bɔ wena. Nɛ mbe ngba soe kpo, nɛ Nabalɛ nɛa tɛ Karmɛlɛ, we kele sala tɛ obatanɔ 'da a, nɛ wa tɔ̃ we nɛ hã Davidi li gba zɔ̃ i.

⁵ Nɛ a sa mɔ hã owinɔ 'da a 'bu, nɛ a tombo wa hã Nabalɛ tɛ Karmɛlɛ i na: “Nɛ nɛ́, kɔ nɛ kpa a, nɛ nɛ fana a hã mi.

⁶ Nɛ nɛ tɔ̃ 'bɔ hã a na, e kɔ sabɛlɛ gɛ ɔ do dia sabɛlɛ we a, do owinɔ kɔ tɔa 'da a.

⁷ Nɛ nɛ tɔ̃́ 'bɔ hã a na, mi zila na, Owi kɛlɛ sala tɛ obatanɔ wa 'da a gɛ. Ĩ na, 'da fala vɛ̃ kɛ lɛ zi fala nɛ kpo do Owi fɔmɔ batanɔ 'da a tɛ Karmɛlɛ i ni, lɛ dɛ̃ 'dã mɔ kpo do wa gɔ, nɛ lɛ zũ̀ 'bɔ mɔ kpo kɔ̃ wa gɔ.

⁸ A aka wa, nɛ wa tɔ̃ sɛ hã a na mɛ ni. Mi tumba nɛ hã a do kɔ̃ tũ ɛngga sɔɛ gɛ, nɛ mi ala nu mi hã a na, a be dia kɔ sila hã lɛ, nɛ a hã mbe mɔ kɛ a do ma ni hã mi Davidi, be 'da a do owinɔ 'da mi.”

⁹ Owinɔ 'da Davidi wa nɛa, nɛ wa tɔ̃ toe 'da a hã Nabalɛ, nɛ wa 'bɔ 'da gisa nu nɛ.

¹⁰ Nɛ Nabalɛ gese hã wa na: “Davidi be 'da Yɛse gɛ a wio nde? Sɔɛ gɛ ongbánɔ kɛ wa yu ti Owele wa ni, wa dɛlɛ wena.

¹¹ Kɔ nɛ lengge na, mi wia tɛ ba mapa, do lì, do sa'de kɛ mi 'dafa hã Owi kɛlɛ sala tɛ batanɔ 'da mi ni, nɛ mi hã ma hã nɛ gɛ, kɛ mi ĩ̀ ti nɛ gɔɛ gɛ nde? Ma wé sɛ gɔ!”

¹² Owinɔ 'da Davidi wa kpula tɛ wa, nɛ wa tɔ̃ gisa nu lɛnggɛ 'da Nabalɛ hã Davidi.

¹³ A nɛa we zele gisa nu toe ni, nɛ a ba nu a hã owinɔ 'da a na, wele do wele kala du kɔya dɛ kɔ̃ ɛ. Nɛ ba du kɔya 'da a, nɛ a he'de ma dɛ 'dɛ tili a. Davidi ba tɛ mɛ 'bo kɛ 'da a, nɛ a la do Owele ɔ nɛ kama nalɛ ni, nɛ owele kama baa wa 'hana we zɔ mɔ tɛ tolenɔ.

Abigailɛ gala Davidi

¹⁴ Mbe kɔ wi tonɔ 'da Nabalɛ nɛa, nɛ a tɔ̃ hã Abigailɛ, kɛnɛ Nabalɛ na: “Mɔ zila we kɛ Davidi tumba Owele yolo tɛ li gba zɔ̃ i we fana wele lɛ, nɛ a zɔa wa yala iko ni nde?

¹⁵ Ĩ na, 'da falanɔ vɛ̃ kɛ lɛ dungu zi do owinɔ ni li zɔ̃ i ni, nɛ wa bia zi dia sila hã lɛ. Nɛ wa dɛ̃ 'dã mɔ kpo do lɛ gɔ, nɛ wa zũ̀ 'bɔ mɔ mɔ́ lɛ gɔ.

¹⁶ Kɔ tũnɔ kɛ lɛ yɛnggɛ zi do obatanɔ ni, nɛ nde wa zɔ zi mɔ tɛ lɛ fai.

¹⁷ Kɔ mɔ kɔ, nɛ mɔ fa zu mɔ ngɔ mɛ mɔ wia we dɛ nɛ ni. We kɛ kafi bina, ngamɔ ma kpa sɛ wele lɛ do nu fɛlɛ a. Nɛ wele wè tɛ tɔ̃ mbula hã a gɔ, we kɛ sila a nganda wena.”

¹⁸ Abigailɛ nɛa we zele ní, nɛ a wɛlɛ tɛ̃ a we kala mapa kama bɔa, do daka dɔ̃ bɔa, do gi obata mɔlɔ. A sua 'bɔ hana kpalɛ kɔ gã mɔ mɔlɔ, nɛ a kala ganza kula wala te vinɔ kama kpo, do mukate kɛ wa dɛa do wala te figɛ ni kama bɔa. A mba li mɛnɔ ni vɛ̃, nɛ a a ma dɛ li 'do pundanɔ,

¹⁹ nɛ a tɔ̃ hã Owi tonɔ 'da a na, wa la dati, ɛ a 'do wa ni. Nɛ nde Abigailɛ tɔ̃̀ we kpo hã wili a Nabalɛ gɔ.

²⁰ A kũ ngɔ punda 'da a, nɛ a ma ngɔ zĩlĩ kala, nɛ nde kala ni ma kele a do'do. Do 'da fala ni tɛ mɛ 'bɔ, nɛ nde Davidi do owinɔ 'da a wa tɛ tɛ dɛ dati a nga. Kɔ Abigailɛ nɛa we gbanga nɛ, nɛ nde wa hɔa dɛ dati a ia.

²¹ Mɛ ni nɛ nde Davidi tɛ tɔ̃ do kɔ sila ɛ na: “Mi gɛ, mi fɔmɔ mɛnɔ 'da bisa gɛ li gba zɔ̃ i gbaa na, da dɛ kɔ zu mɔ mɔ́ a kpo yɔ́ gɔ, nɛ a gese olo nɛ hã mi do 'dã nɛ nde?

²² E kɔ Gale gbɛ mi, fala kɛ dati a bindɛ do titole, mi la wele kpo kɔ nu fɛlɛ kula 'da Nabalɛ do tunu li a ni.”

²³ 'Da fala Abigailɛ zɔa Davidi, nɛ a zĩlĩ ngɔ punda 'da a do gbɛngɛ tɛ. Nɛ a gu li a nù

²⁴ dɛ dati Davidi ni, nɛ a tɔ̃ hã Davidi na: “Aa nwa, mɔ zélé we mi nɛ tɔ̃ hã mɔ gɛ. Wi dɛa 'dã mɔ wi a mi.

²⁵ Mɔ tɛ lènggè do Nabalɛ gɔ, we kɛ fo gbãlã zã a bina. Dia nɛ a kɛ wa sa li a na Nabalɛ, gulu nɛ na: ‘Wi bɔ’ ni. We kɛ mɛ a gbãlã we na, a a wi bɔ. Aa nwa, mi ĩ̀ fala kɛ mɔ tumba owinɔ 'da mɔ hã lɛ ni gɔ.

²⁶ Wi a nwa hã a ga mɔ na, mɔ tɛ bìlì nu gbã 'dã mɛ 'da owi sɛnɛ mɔ hã wa gɔ. Kɔ di dɔ̃ gɛ, mi kana tɛ mi do zu li NWA wele kpasi na, Owi sɛnɛ mɔ do owinɔ wa kɔ̃a we dɛ 'dã mɔ do mɔ ni, wa kpa sɛ etumbu ɔ nɛ kɛ Nabalɛ nɛ kpa ma ni.

²⁷ Kɔ mɔ kɔ̃ gɛnɛ mɛnɔ mi tɛa nɛ we 'dɔlɔ hã mɔ gɛ, nɛ mɔ kɛ̃ ma dɛ kɔ̃ obe zagbãlãnɔ mɔ yɛnggɛ do wa gɛ.

²⁸ Nɛ mɔ kɔ̃, nɛ mɔ ele 'dã mɛ 'da mi. Mba gɔ, mi ĩ ngboo na, NWA a hã sɛ dɛa to nwa hã nu fɛlɛ mɔ fai, we kɛ mɔ bi bolo hã a. Nɛ kɔ dungu 'da mɔ vɛ̃, wa kpá sɛ 'dã mɔ kpo kɔ mɔ gɔ.

²⁹ Wele fa we bi mɔ na a gbɛ mɔ, nɛ nde NWA Gale 'da mɔ a fɔmɔ sɛ mɔ kɔ nɛ vɛ̃, ɔ nɛ kɛ wele fɔmɔ do gã kpamɔ ni. Nɛ a da sɛ Owi sɛnɛ mɔ nyɛlɛ, ɔ nɛ kɛ wele e ta kɔ lasi, nɛ a da ma nyɛlɛ ni.

³⁰ NWA a dɛ sɛ dia mɔ hã mɔ, ɔ nɛ kɛ a kpua mbulu nɛ ni, nɛ a e sɛ mɔ do nwa ngɔ nù Israɛlɛ.

³¹ Do 'da fala ni, nɛ ma wia na, sila mɔ tɛ yɛkɛ gɔ, nɛ mɔ tɛ ɔ̃ 'bɔ do 'bako we kɛ na, mɔ gbɛa wele yala iko, tabi mɔ bílí nu gbã 'dã mɔ do tɛ mɔ wele nɛ ni gɔ. Aa nwa, 'da fala NWA Gale a hã sɛ dia kpasi hã mɔ ni, nɛ mɔ lengge do mi sɛ.”

³² Nɛ Davidi gese hã Abigailɛ na: “Mi hã iɔ̃nae hã NWA Gale 'da lɛ obe Israɛlɛ, kɛ a tumba mɔ na, mɔ tɛ, kɔ lɛ kpa ngba lɛ do mɔ sɔɛ gɛ ni.

³³ Mi hã 'bɔ iɔ̃nae hã mɔ we hã zã 'da mɔ kɛ ma kpia wala ti mi na, mi tɛ gbɛ̀ wi gɔ, nɛ mi tɛ bìlì nu gbã 'dã mɔ do tɛ mi wele nɛ gɔ ni.

³⁴ Do gbãlã we, NWA Gale 'da lɛ obe Israɛlɛ, kɛ a a wele kpasi ni, a ga mi na, mi tɛ dɛ mɔ do mɔ gɔ. Mi kana tɛ mi do zu li NWA hã mɔ na, mɔ tɛ gɔ̀nɔ̀ sɔ dati mi dɔ̃ gɔ, nɛ bindɛ do titole belee, nɛ nde wa kpá sɔ wele kpo do tunu li a kɔ nu fɛlɛ Nabalɛ gɔ.”

³⁵ Davidi kɔ̃a gɛnɛ mɛnɔ Abigailɛ tɛa do ma hã a ni, nɛ a tɔ̃ na: “Sila mɔ gɛ̃, nɛ mɔ si dɛ 'da mɔ i do dia nɛ. Mi zila ala nui 'da mɔ, nɛ mi kɔ̃a gɛnɛ ma de wena.”

Nabalɛ fia, nɛ Davidi ba Abigailɛ do kɛnɛ a

³⁶ 'Da fala Abigailɛ si, kɔ a nɛ hɔ nu tɔa i, nɛ nde Nabalɛ tɛ dɛ gã mɔ dɔ. Mɛ zi a nyɔngɔmɔ mɔ́ nwa ngboo. Nabalɛ dɛa yangga, nɛ dɔɛ ba 'bɔ a wena. Na mɛ ni, Abigailɛ kpà wala wele we kpo hã a dati kɛ na fala sa ni gɔ.

³⁷ A 'bɔa na, ma hɔ titole, nɛ nde bá dɔɛ sa tɛ̃ a, sɛ nɛ a ĩ ti tɔ̃ wenɔ ma la ni hã a de. Nabalɛ zila wenɔ ni, nɛ sila a gɔnɔ zurr, nɛ tɛ̃ a ma fe.

³⁸ Ma la ɔ nɛ otũ 'bu ni, nɛ NWA fi zɛlɛ tɛ Nabalɛ, nɛ a fe.

³⁹ 'Da fala Davidi zila na, Nabalɛ fia ni, nɛ a tɔ̃ na: “Mi hã iɔ̃nae hã NWA, we kɛ a bili nu gbã 'dã we Nabalɛ tɔ́a hã mi ni. Nɛ a fɔmɔ 'bɔ mi wi toe 'da a na, mi tɛ dɛ̃ 'dã mɔ gɔ. Wi hã etumbui hã Nabalɛ olo 'dã mɛ 'da a, wi a NWA do tɛ̃ a.” 'Do nɛ, nɛ Davidi tumba Owi to na, wa nɛ, kɔ wa wele we do Abigailɛ na, ɛ kɔ̃a we ba a.

⁴⁰ Owi tonɔ wa hɔa 'da Abigailɛ tɛ Karmɛlɛ i, nɛ wa tɔ̃ hã a na: “Davidi tumba lɛ na, lɛ tɛ, kɔ lɛ kpa mɔ, nɛ lɛ tɔ̃ hã mɔ na, ɛ kɔ̃a we ba mɔ.”

⁴¹ Abigailɛ nɛa we zele ni, nɛ a bili zu a gbaa, nɛ a gu li a nù, nɛ a tɔ̃ na: “Davidi a nwa 'da mi. Kɔ a tɔ̃ na, mi fɔlɔ nyanga Owi tonɔ 'da a, nɛ mi fɔlɔ sɛ.”

⁴² A kulu ngɔ do gbɛngɛ tɛ, nɛ a kũ ngɔ punda 'da a, nɛ owuko wi tonɔ 'da a mɔlɔ wa kã a. A nɛa fala nɛ kpo do wi tonɔ 'da Davidi, nɛ wa hɔ 'da Davidi i, nɛ wa ba ngba wa.

⁴³ Nɛ nde dati Abigailɛ, Davidi ba zi 'bɔ mbe wuko kpo kɔ le Yizreɛlɛ, li a a Ahinoamɛ. Ahinoamɛ do Abigailɛ, wa vɛ̃ bɔa nɛ a wukonɔ 'da Davidi.

⁴⁴ Nɛ kuti wuke 'da Davidi zi a Mikalɛ. Nɛ nde Saulo, baa Mikalɛ, ba zi a kɔ Davidi, nɛ a hã a hã Palti, be 'da Laisi, tɛ kɔ le Galimɛ na, a ba a.