1 SAMUƐLƐ 24 - WE NU GALE 1995

Davidi bɛ̃a we gbɛ Saulo

¹ Davidi la fala ni, nɛ a nɛ we dungu tɛ mbe fala kpo, kɛ Owele wa hɔ́ tɛ nɛ dɔ́ dɔ́ gɔ ni, ma a dɔ̃ɔ do le Ɛnɛ-Gedi.

² Nɛ 'da fala Saulo yula tɛ bi bole do Ofilisti, kɔ a si ni, nɛ a zele na, Davidi a tɛ li gba zɔ́ Ɛnɛ-Gedi.

³ Nɛ a saka Owi wili koto talɛ kɔ osoda Israɛlɛ, nɛ a mba li wa, nɛ a la do wa we fa Davidi do owinɔ 'da a, tɛ fala ma ka mɔ dɛ tɛ “Ta 'da Odua Zamɛnɔ” ni.

⁴ Saulo la do kɛ zã ngboe 'da obatanɔ, kɛ ma kɔlɔ do li wala ni, nɛ a zɔ gã ta, nɛ a le kɔ nɛ we nɛ nza. Ĩ na, Davidi do owinɔ 'da a, wa usu tɛ wa dɛ kpo kɔ ta ni do kɔlɔ 'du.

⁵ Owinɔ ni wa zɔa Saulo, nɛ wa fɔ̃lɔ̃ hã Davidi na: “Kɛ gɛ mɛ a ngba soe nwa tɔ̃a zi hã mɔ na, ɛ la sɛ wi sɛnɛ mɔ dɛ kɔ̃ mɔ na, mɔ dɛ do a ɔ nɛ kɛ zã mɔ kɔ̃a ni.” Davidi kulu ngɔ do usu nɛ, nɛ a 'bili nu gã tuli tɛ Saulo ni.

⁶ 'Do kɛ Davidi 'bili nu tuli 'da Saulo ni, nɛ sila a ma ngɔ to nganda wena.

⁷ Nɛ a tɔ̃ hã owinɔ 'da a na: “E kɔ NWA Gale gala mi na, mi tɛ dɛ̃ 'dã mɔ do nwa 'da mi Saulo, ɔ nɛ kɛ nɛ tɔ̃ gɛ gɔ. Mba gɔ, Gale do tɛ̃ a hã a saka a na, a dungu nwa.”

⁸ Nɛ Davidi ga owinɔ 'da a na, wa tɛ bì Saulo gɔ. Saulo nɛa nza do'do, nɛ a hɔ nza kɔ ta ni, nɛ a la.

⁹ 'Do a nɛa we nyɛlɛ sĩ, nɛ Davidi hɔ 'do a, nɛ a he mɔ na: “Aa nwa 'da mi.” Nɛ Saulo ka mɔ 'do ɛ, nɛ Davidi gu nù dati a, nɛ a bili zu a gbaa nɛ ma to nù we dɔnggɔ a.

¹⁰ Nɛ Davidi aka a na: “Aa nwa, gulu kɛ mɔ zele we nu winɔ wa tɔ̃ na, mi fa we dɛ 'dã mɔ do mɔ ni we ge nde?

¹¹ Mɔ ĩ́ na, NWA Gale do tɛ̃ a, a ia mɔ sɔɛ gɛ dɛ kɔ̃ mi, 'da fala mɔ sɔ kɔ ta ni. Wa tɔ̃a hã mi na, mi gbɛ mɔ. Nɛ nde i dɛa 'bako hã mɔ, nɛ mi tɔ̃a hã wa na, mi gbɛ́ sɛ mɔ gɔ, we kɛ NWA Gale a saka mɔ we dɛ to nwa gɛ.

¹² Aa nwa 'da mi, mɔ zɔ mɛ mi 'bia dɛ ti kɔ̃ mi gɛ: mɛ a nu gã tuli 'da mɔ. Mi gbɛ̀ mɔ gɔ, nɛ mi 'bili tati a nu gã tuli tɛ mɔ ni iko. Mɔ zɔ́ ma, kɔ mɔ ĩ na, mi do linggamɔ dɛ nga zu, tabi dɛ 'dã mɔ do mɔ bina. Mi dɛ̀ 'dã mɔ do mɔ gɔ, nɛ nde mɔ a mɔ fa we gbɛ mi.

¹³ E kɔ NWA 'bili we sanga tɛ ngba lɛ do mɔ gɛ. Nɛ a hã etumbu olo 'dã mɛ 'da mɔ hã mɔ. Nɛ nde kɛ 'da mi, mi dɛ́ sɛ mɔ do mɔ gɔ.

¹⁴ Mɔ ĩ ti mbe gba we, wa tɔ̃ zɛ́ na: ‘Dia linggamɔ kɔ sila 'dã wi bina.’ Nɛ nde we mi, mi dɛ́ sɛ 'dã mɔ kpo do mɔ gɔ.

¹⁵ Aa nwa, wi mɔ bi bole do a ni a wio nde? Kɛ mi a fia be tolo, nɛ mi a 'dã fɔɛ iko, nɛ mɔ ndaka 'do mi ni we ge nde?

¹⁶ NWA a 'bili sɛ we 'da lɛ do mɔ. E kɔ a zɔ gbãlã we 'da mi, nɛ a yolo gba sala 'do mi, nɛ a kpasa mi li bolonɔ 'da mɔ.”

¹⁷ Davidi tɔ̃a we ia do'do, nɛ Saulo aka a na: “Wi wele we gɛ ngboo a mɔ Davidi, be 'da mi nde?” Nɛ Saulo he wena.

¹⁸ 'Do nɛ, nɛ a tɔ̃ na: “Gbãlã we a mɔ mɔ, nɛ nde mi tia do we. Mɔ dɛa dia mɔ do mi, nɛ mi dɛa 'dã mɔ do mɔ.

¹⁹ Mɔ bia kɔ̃a zã 'da mɔ hã mi sɔɛ gɛ, we kɛ nwa ia mi dɛ kɔ̃ mɔ, nɛ mɔ gbɛ̀ mi gɔ.

²⁰ Ma fai na, wele fa wi sɛnɛ a, hã a kpa a, nɛ nde a lá a do lɔa tɛ̃ a iko gɔ. E kɔ NWA si olo dia mɛ mɔ dɛa do mi sɔɛ gɛ ni hã mɔ!

²¹ Na mɛ ni, mi ĩ na ngba soe kpo, nɛ mɔ sɛ a nwa, nɛ to nwa ma 'bana sɛ fai dɛ kɔ̃ mɔ, do nu fɛlɛ kula 'da mɔ.

²² Kɔ mɔ kana tɛ mɔ hã mi do zu li NWA Gale na, mi fe, nɛ nde mɔ gbɛ́ sɛ Owi nu fɛlɛ mi gɔ, dɔ li mi mbítí ngɔ nùi gɛ do'do gɔ.”

²³ Davidi kana tɛ̃ a, nɛ 'do nɛ, nɛ Saulo si dɛ 'da a i, nɛ Davidi do owinɔ 'da a, wa kpolo tɛ wa dɛ ngɔ kala fala wa usu do tɛ wa ni.