1 SAMUƐLƐ 23 - WE NU GALE 1995

Davidi kpasa owi kɔ le Keila

¹ Mbe ngba soe kpo, nɛ mbe wele tɔ̃ hã Davidi na, Ofilisti wa linggi le Keila, kɔ wa zũ okpalɛ ngɔ yangganɔ.

² Davidi nɛa we zele ní, nɛ a aka NWA na, ɛ wia we nɛ we bi Ofilisti nde? Nɛ NWA gese hã a na: “Mɔ nɛ́ kɔ mɔ bi wa, sɛ a mɔ kpasa owinɔ kɔ le Keila de.”

³ Nɛ owinɔ 'da Davidi wa tɔ̃ hã a na: “Mɔ zɔ́, kɛ lɛ 'bana dɛ ngɔ nù Yuda nga, kɔ lɛ dɛ kili nɛ gɛ, kɔ lɛ hɔ wá 'bɔ Keila i we bi osoda Filisti, nɛ kili ki ni ma lá sɛ 'bɔ li do'do gɔ nde?”

⁴ Na mɛ ni, nɛ Davidi aka 'bɔ NWA mbé nɛ, nɛ a gese hã a na: “Mɔ kúlú ngɔ, kɔ mɔ nɛ kɔ le Keila i. Mi 'dɔlɔ sɛ Ofilisti hã mɔ.”

⁵ Davidi nɛa we zele ní, nɛ a kulu ngɔ do owinɔ 'da a, nɛ wa la Keila i, nɛ wa bi Ofilisti, nɛ wa gbɛa wa wena, nɛ wa kala onadalamɛnɔ 'da wa. Na mɛ ni, nɛ Davidi kpasa owi Keila.

⁶ Do 'da fala Abiatarɛ, be 'da Ahimelɛkɛ, yu zi dɛ 'da Davidi tɛ kɔ le Keila i ni, nɛ a la zi 'bɔ do omɛnɔ kɛ ma santo, kɛ wa aka do NWA ni.

⁷ Saulo zila na, Davidi lia kɔ le Keila, nɛ a tɔ̃ na: “Gale 'dɔlɔ a hã mi ia, we kɛ a lia kɔ le Keila, kɛ wa kpe nu ngbo nɛ do tũ kpia ni. Na mɛ ni, mi wia sɛ we ba a.”

⁸ A tɔ̃a ni do'do, nɛ a ba nu a hã osodanɔ 'da a vɛ̃ na, wa nɛ, kɔ wa linggi Davidi do winɔ 'da a tɛ kɔ le Keila i.

⁹ Kɔ Davidi nɛa we zele na, Saulo 'dafa we ba a ni, nɛ a sa mɔ hã nganga Abiatarɛ na, a tɛ do omɛnɔ kɛ ma santo ni.

¹⁰ A tɛa do ma, nɛ Davidi aka NWA na: “Aa NWA Gale 'da lɛ obe Israɛlɛ, mi zila na Saulo 'dafa we tɛ we gbɛ owi Keila gɛ vɛ̃ fala kɛ wa 'dɔ̀lɔ̀ mi hã a gɔ ni.

¹¹ Kɔ mi aka mɔ na, we wa tɔ̃a hã mi ni, mɛ a gbãlã we nde? Kɔ fala kɛ Saulo tɛ, nɛ owinɔ kɔ le gɛ, wa 'dɔlɔ sɛ mi hã a nde? Aa NWA Gale 'da lɛ obe Israɛlɛ, mi ala nu mi hã mɔ na, mɔ gese nu we gɛ hã mi.” Nɛ NWA gese hã a na: “Saulo a tɛ sɛ.”

¹² Davidi aka 'bɔ NWA na: “Owinɔ le gɛ wa 'dɔlɔ sɛ mi do owinɔ 'da mi hã Saulo nde?” Nɛ NWA gese na: “Ĩi, wa 'dɔlɔ sɛ nɛ hã a.”

¹³ Davidi nɛa we zele ní, nɛ a kulu ngɔ kɔ le Keila do owinɔ 'da a kɛ wa zi vɛ̃ ɔ nɛ kama gazɛlɛ ni, nɛ wa ma ngɔ yɛnggɛ nde nde do falanɔ vɛ̃. Kɔ Saulo zila na, Davidi do owinɔ 'da a wa yu kɔ le ni do'do ni, nɛ a nɛ̀ 'bɔ we bi le Keila gɔ.

Davidi la dɛ ngɔ kalanɔ i

¹⁴ Davidi la dɛ li gba zɔ̃ Zifɛ, nɛ a usu tɛ̃ a ngɔ kalanɔ i. Nɛ Saulo fa fai we kpa Davidi, nɛ nde Gale hã̀ wala na, a kpa a gɔ.

¹⁵ Davidi zɔa na, Saulo fa we gbɛ ɛ ni, nɛ a 'bana de kɔ le Horka, tɛ li gba zɔ̃ Zifɛ.

¹⁶ Mbe ngba soe kpo, nɛ Yonatanɛ, be 'da Saulo nɛa 'da Davidi kɔ le Horka i, nɛ a tɔ̃ hã Davidi na, a kpãlã sila a, nɛ a gbini zã a do Gale fai.

¹⁷ A tɔ̃a hã a na: “Mɔ tɛ dɛ̀ kili gɔ. Baa mi wé sɛ we e kɔ̃ ɛ tɛ mɔ gɔ. A ĩ de wena na, mɔ sɛ a nwa ngɔ nù Israɛlɛ, nɛ mi sɛ a kosolo nwa 'da mɔ.”

¹⁸ Yonatanɛ do Davidi, wa ba 'bɔ 'bia do zu li NWA. 'Do nɛ, nɛ Yonatanɛ si dɛ 'da a i, nɛ Davidi 'bana dɛ kɔ le Horka ni.

Saulo fa we gbɛ Davidi

¹⁹ Owinɔ kɔ le Zifɛ wa nɛa, nɛ wa kpa Saulo kɔ le Gibea, nɛ wa tɔ̃ hã a na: “Davidi usu tɛ̃ a ngɔ nùi 'da lɛ dɔ̃ɔ do le Horka, tɛ ngɔ kala Hakila. Mɔ hɔ li zɔ̃ kɛ ma do kpangba ni, nɛ nde Hakila do si ba gɔtɔ.

²⁰ Kɔ aa nwa, mɔ kɔ̃ we gbanga a nde, nɛ mɔ tɛ, nɛ lɛ ba sɛ a hã mɔ.”

²¹ Nɛ Saulo tɔ̃ hã wa na: “E ko NWA wele nu a tɛ nɛ, we kɛ nɛ dɛ mi de wena.

²² Kɔ ma wia na, nɛ nɛ miã lɛnggɛ gɛ, hã nɛ ĩ ti fala ngboo a ɔ nɛ ni, nɛ nɛ ĩ 'bɔ ti wi kɛ a zɔa a ni. We kɛ wa tɔ̃a hã mi na, Davidi do 'dã hã wena.

²³ Nɛ hɔ ngɔ falanɔ vɛ̃ kɛ a wia we usu do tɛ̃ a ni, nɛ nɛ tɛ we be gulu nɛ hã mi do wala olo nɛ Na mɛ ni, nɛ lɛ nɛ sɛ do nɛ. Kɔ fala kɛ a 'bana ngɔ nù Yuda gɛ nde, nɛ mi 'bã sɛ 'do a falanɔ vɛ̃ we fa na, mi kpa a nde.”

²⁴ Owi Zifɛ wa la Saulo, nɛ wa si dɛ kɔ le 'da wa. Do 'da fala ni, nɛ nde Davidi zi a tɛ li gba zɔ̃ Maoni, kɛ mɔ yolo li zɔ̃ kpangba, nɛ nde ma si ba gɔtɔ.

²⁵ Saulo do osodanɔ 'da a wa nɛa we fa Davidi. Nɛ Owele wa tɔ̃a we nɛ hã Davidi. Nɛ a la dɛ ngɔ kala li gba zɔ̃ Maoni, kɛ ma do ta wena ni. Saulo nɛa we zele we nɛ, nɛ a ma ngɔ ndaka 'do Davidi do kɔ lenɔ ni.

²⁶ Saulo do osodanɔ 'da a wa tɛ danga nyanga li kala, nɛ nde Davidi do winɔ 'da a wa tɛ zĩlĩ mbee nyanga li nɛ. Nɛ wa tɛ wɛlɛ tɛ wa we nyɛlɛ do Saulo, we kɛ Saulo do osodanɔ 'da a wa fa we zĩ wa takpa, takɔ wa kala wa.

²⁷ Nɛ mbe wi to hɔa, nɛ a tɔ̃ hã Saulo na: “Mɔ tɛ́ dɔ̃! Ofilisti wa bi le 'da lɛ do'do.”

²⁸ Saulo zila toe ni, nɛ a la fala ndaka 'do Davidi, nɛ a si we bi bole do Ofilisti. Gulu nɛ a wa sa li fala ni na: “Ta Gɔnɔ Sanga tɛ Ngba Wi.”