1 SAMUƐLƐ 22 - WE NU GALE 1995

Davidi hɔa nwa ngɔ Owele kama nalɛ

¹ Dɛ 'do ki ni, nɛ Davidi yu di ni do'do, nɛ a nɛ, nɛ a usu tɛ̃ a kɔ ta dɔ̃ɔ do le Adulamɛ. 'Da fala onya a do owinɔ 'da a wa nɛa we zele na, a tɛ kɔ ta ni, nɛ wa nɛa we kpa a.

² Nɛ ombe wi kpa ngamɔ, do Owi ba ku'da, do Owi nɔ̃lɔ̃ zã, wa mba 'bɔ do wa, nɛ Davidi hɔ nwa ngɔ wa. Wa zi vɛ̃ Owele kama nalɛ.

³ Nɛ Davidi yolo 'bɔ Adulamɛ ni, nɛ a la dɛ kɔ le Mispe, tɛ ngɔ nù Moabɛ. A hɔa i mɔ, nɛ a tɔ̃ hã nwa ngɔ nù Moabɛ na: “Mɔ kɔ̃́, nɛ mɔ hã́ wala na, baa mi do naa mi, wa ɔ dɛ 'da mɔ gɛ gbaa na, mi ĩ ti mɛ kɛ Gale kɔ̃a we dɛ hã mi ni, sɛ nɛ de.” Nɛ nwa ngɔ nù Moabɛ kɔ̃a.

⁴ Nɛ Davidi kã baa ɛ do naa ɛ dɛ kɔ ngboe 'da nwa ni. Nɛ 'da falanɔ vɛ̃ kɛ Davidi usu tɛ̃ a kɔ tanɔ ni, nɛ nde Owi ko a wa 'bana dɛ di ni.

⁵ Mbe tũ kpo, nɛ Gadɛ, wi gba olo nu Gale, tɔ̃ hã Davidi na: “Mɔ tɛ 'bànà dɛ kɔ ta gɛ fai gɔ. Mɔ si dɛ ngɔ nù Yuda i.” Davidi la, nɛ a le zamɔ Herɛtɛ.

Saulo gbɛa onganganɔ 'da Gale

⁶ Mbe tũ kpo, nɛ Saulo zele na, wa zɔa Davidi do owinɔ 'da a. Do 'da fala ni, nɛ nde nwa Saulo tɛa dɛ kɔ le Gibea, nɛ a dungu nù do ngɔ kala dɛ ti gɔ̃lɔ̃ te. A 'bia sɛlɛ 'da a dɛ kɔ̃ a, nɛ Owi tonɔ 'da a vɛ̃ wa yula dɛ kɛ zã a ni.

⁷ Nɛ a tɔ̃ hã wa na: “Nɛ, Owi nu kpala Bɛnzamɛ, nɛ zélé! Nɛ lengge na, Davidi wia we hã nù do ofɔ hã nɛ gɛ vɛ̃, nɛ a e nɛ do nwa ngɔ osodanɔ 'da a, ɔ nɛ kɛ mi dɛa ni nde?

⁸ Kɔ gulu kɛ nɛ ba zã zu we na, nɛ gbɛ mi ni we ge nde? Be 'da mi ba 'bia do Davidi, nɛ nde wele kpo tɔ̃̀ we nɛ hã mi gɔ. Do 'da fala be 'da mi hɛ̃lɛ̃ 'bɔ Davidi na, a fa wala we gbɛ mi, ɔ nɛ kɛ a dɛa sɔɛ gɛ ni, nɛ nde nɛ vɛ̃ nɛ tɔ̃̀ mbe we nɛ hã mi gɔ.”

⁹ Nɛ Dɔɛgɛ, wi ngɔ nù Edɔmɛ kɛ a kɔ owinɔ 'da Saulo ni, a tɔ̃ hã a na: “Mbe ngba soe kpo, mi zɔa zi Davidi tɛ 'da Ahimelɛkɛ, be 'da Ahitubɛ, tɛ kɔ le Nɔbɛ.

¹⁰ A hɔa, nɛ Ahimelɛkɛ aka nwa we a, nɛ a hã nyɔngɔmɔ hã a, nɛ a hã 'bɔ du kɔya olo Goliatɛ, wi Filisti ni hã a.”

¹¹ Saulo nɛa we zele ni, nɛ a tombo Owele na, wa nɛ tɛ kɔ le Nɔbɛ, kɔ wa kala nganga Ahimelɛkɛ, do owi nu fɛlɛ a vɛ̃, kɛ wa a onganganɔ i mɔ ni, kɔ wa tɛ do wa. Wa nɛa, nɛ wa kala wa tɛa do wa, nɛ wa vɛ̃ wa yolo dɛ dati Saulo ni.

¹² Nɛ Saulo tɔ̃ hã Ahimelɛkɛ na: “Mɔ, be 'da Ahitubɛ gɛ, mɔ zélé!” Nɛ nganga Ahimelɛkɛ gese na: “Nwa, mɔ tɔ̃́!”

¹³ Nɛ Saulo tɔ̃ hã a na: “Gulu kɛ mɔ do Davidi, nɛ ba zã zu gbɛ mi we ge nde? Mɔ hã zi nyɔngɔmɔ do du kɔya hã a. Nɛ mɔ aka 'bɔ Gale we duzu a, takɔ a dɛ nga zu, kɔ a fa wala we gbɛ mi.”

¹⁴ Nɛ Ahimelɛkɛ gese na: “Aa nwa, wele mbe kɔ owinɔ 'da mɔ gɛ, kɛ a dɛ olo nu mɔ ɔ nɛ Davidi ni, a boe nde? A a wili kɛfɛ 'da mɔ, nɛ a 'bɔ a wi ngɔ osodanɔ wa zɔ mɔ tɛ mɔ ni. Wa hã dɔ̃lɔ̃ li hã a kɔ ngbo nwa 'da mɔ gɛ wena.

¹⁵ Mɛ a gbãlã we na, mi aka zi Gale we duzu a, nɛ mi aka zi 'bɔ Gale we duzu a dati. Nɛ nde mi do linggamɔ ba zã zu gbɛ mɔ fala kpo bina. Mɔ tɛ 'bã̀ mi, tabi Owi nu fɛlɛ kula 'da mi do ngalangba gɔ Ta mi ngɔ we gɛ bina.”

¹⁶ Nɛ Saulo tɔ̃ na: “Mɔ Ahimelɛkɛ, do owi nu fɛlɛ mɔ vɛ̃, nɛ fe sɛ.”

¹⁷ 'Do kɛ Saulo tɔ̃a na mɛ ni, nɛ a ba nu a hã osodanɔ wa zɔ mɔ tɛ̃ a ni na: “Nɛ nɛ́, kɔ nɛ gbɛ́ onganganɔ 'da NWA, we kɛ wa gala Davidi ni. Wa ĩ na Davidi yu, nɛ wa tɔ̃̀ we nɛ hã mi gɔ.” Nɛ nde wele kpo kɔ i osodanɔ ni kɔ̃ we e kɔ̃ ɛ tɛ onganganɔ we gbɛ wa gɔ.

¹⁸ Saulo zɔa ni, nɛ a tɔ̃ hã Dɔɛgɛ, wi ngɔ nù Edɔmɛ na: “Mɔ nɛ́, kɔ mɔ gbɛ́ onganganɔ gɛ.” Nɛ Dɔɛgɛ nɛa, nɛ a gbɛ onganganɔ. Do kpo soe ni, a gbɛa owinɔ kɛ wa wia we he'de tulu nganga ni 'bu wa ngbɛ'dɛ'dɛ ngɔ wa mɔlɔ.

¹⁹ Saulo ba 'bɔ nu a na, wa nɛ tɛ Nɔbɛ, le 'da onganganɔ, kɔ wa gbɛ Owi wili, owuko, obe do onzɔ benɔ di ni ni. Nɛ wa gbɛ 'bɔ ongɔmbɔnɔ, opunda, obata, do oduanɔ tɛ le ni vɛ̃.

²⁰ Tati a Abiatarɛ, mbe be 'da Ahimelɛkɛ, a kpasa, nɛ a yu dɛ 'da Davidi i. Abiatarɛ a kanggadɔkɔ Ahitubɛ.

²¹ A hɔa 'da Davidi i, nɛ a tɔ̃ hã a na, wa gbɛa onganganɔ 'da NWA.

²² Nɛ Davidi gese hã a na: “Mbe ngba soe kpo, mi zɔa Dɔɛgɛ, wi ngɔ nù Edɔmɛ, tɛ kɔ le Nɔbɛ ni. Nɛ mi ĩ zi na, a tɔ̃ sɛ we nɛ hã Saulo. Na mɛ ni, fie 'da owinɔ 'da mɔ vɛ̃ yolo ngɔ mi.

²³ Nɛ nde ma wia na, mɔ 'bana dɛ kɛ zã mi gɛ, nɛ mɔ tɛ dɛ̀ kili gɔ. Wi sɛnɛ mɔ kɛ a fa we gbɛ mɔ ni, a 'bɔ a kpo wi a fa we gbɛ mi ni. Kɔ nɛ́ kɛ mɔ dɛ kɛ zã mi gɛ ni, mɔ kpo dɛ́ sɛ mɔ gɔ.”